Uretse umurimo w’ivugabutumwa binyuze mu ndirimbo zihimbaza Imana, Unity Choir yasuye abarwayi bo mu bitaro bya Remera-Rukoma mu karere ka Kamonyi, bafasha abarwayi babuze ubushobozi bwo kwishyura amafaranga y’ibitaro, kugurira imiti ababuze ubushobozi, ndetse banabaha n’ibiribwa n’ibindi bikoresho.
Ku Cyumweru tariki ya 22 Ukuboza 2013, Unity Choir ihuriyemo Chorale Bethel ya EPR Kiyovu na Chorale Ubushake bw’Imana ya EPR Remera –Kicukiro, yifatanyije n’abarwayi bo mu bitaro bya Remera-Rukoma. Nyuma yo kubagezaho ijambo ry’Imana, Unity Choir yarabataramiye mu ndirimbo zibahumuriza no kubagarurira icyizere cy’ubuzima, ndetse abaririmbyi basangira n’abarwayi ibiryo bitunga umubiri.
Nk’uko IGIHE twabitangarijwe n’umwe mu baririmbyi, Narcisse Nyamunaga, iyo Chorale igizwe nAbaririmbyi basaga 35 bafatanyije nItsinda ryitwa Umusamaliya mwiza, bafasha abarwayi barwariye mu bitaro bya Remera-Rukoma bagera ku 143.
Prezida wa Unity Choir, Habinshuti Deo, atangaza ko umurimo w’Imana utakagombye kuba uwo kuririmba gusa, ko no gufasha abababaye biri mu nshingano z’abakirisito. Agira ati “Aba barwayi twabazaniye inkunga igera kuri miliyoni ebyiri z’amafaranga y’u Rwanda (2,000,000Rwf). Twashoboye gufasha ababuze ubushobozi, tubishyurira amafaranga y’ibitaro ndetse n’imiti ihenze. Twabahaye kandi ibiribwa birimo umuceri, isukari, Kawunga, Amavuta yo kwisiga, amata y’Inyange, amasabuni, Colgate.” Akomeza avuga ko bahembye ababyeyi babyaye ibitenge 12 kandi baha n’impinja zavutse imyenda yo kwambara n’ibindi bintu bitandukanye.
Nyuma yo guhabwa ibyo bintu byose abarwayi batandukanye batanze ubuhamya. Umutesi Angelique yatanze ubuhamya ko amaze imyaka ine arwariye mu bitaro bya Remera-Rukoma aho yinjiyemo mu 2009. Agira ati “Naje ndwaye akaguru, ariko narivurije ahantu henshi sinashobora gukira kubera ubushobozi. Nyuma noherejwe mu bitaro by’i Kanombe, banyandikira umuti ugura amafaranga ibihumbi mirongo itandatu na bitanu (65.000Rwf). Nabuze amikoro ndarekera ariko nshimiye cyane Unity choir iwunguriye.”
Mukawera Marie Rose na we urwariye mu bitaro bya Remera-Rukoma, atangaza ko yishimiye ubufasha ahawe na Unity Choir. Agira ati “Iki ni igitangaza gikomeye, kuko Unity Choir ibashije kunyishyurira amafaranga ibihumbi mirongo itandatu na kimwe na Magana abiri (61,200Rwf). Nari narabuze ubwishyu kubera ubukene, bambuza gutaha.”
Nk`uko twabitangarijwe na Uramutse Jean Pierre, ushinzwe ubutegetsi n’imari mu bitaro bya Remera-Rukoma, avuga ko na we yatangajwe n’igikorwa Unity Choir yakoreye abarwayi, by’umwihariko ariko n’ibitaro byabyungukiyemo, kuko babonye amafaranga y’u Rwanda 200.000 yishyuriwe abarwayi bari barabuze ubwishyu, bigatuma bagumishwa mu bitaro. Agira ati “Iki cyari ikibazo gikomereye ibitaro, kuko iyo bananiwe kwishyura bahaguma bategereje bene wabo ngo bazaze kubishyurira, bigatuma ibitaro bibamo abarwayi benshi biyongeraho n’abaza ari bashyashya, rimwe na rimwe abantu bakaryama ari babiri ku gitanda.”
Ubuyobozi bw’Itorero rya EPR bwari buhagariwe na Mme Therese Gasenge, watangaje ko na bo bashimira Unity choir yateguye igikorwa cyo gufasha abarwayi batishoboye, asaba ko n’abandi bakora umurimo w’Imana bakwiye gushyira muri gahunda zabo gufasha abababaye.
TANGA IGITEKEREZO