Iki gitaramo cyabaye ku wa Gatandatu, tariki ya 14 Ukwakira 2023. Ni cyo cyasoje urugendo rw’ibyabereye mu ntara zitandukanye z’igihugu; rwatangiriye mu Karere ka Musanze mu Majyaruguru ku wa 23 Nzeri, bikomereza mu ka Huye mu Majyepfo ku wa 30 Nzeri 2023. Tariki ya 7 Ukwakira byakorewe i Ngoma mu Burasirazuba mbere y’uko bisorezwa i Rubavu.

Abahanzi umunani ni bo bazengurutse muri ibyo bice bitandukanye basusurutsa abakunzi b’umuziki Nyarwanda. Aba barimo Afrique, Bwiza, Niyo Bosco, Alyn Sano, Chriss Eazy, Bushali, Riderman na Bruce Melodie.

Ab’i Rubavu bari bakumbuye by’umwihariko ibi bitaramo kuko kuri iki kibuga haherukaga guhurira abahanzi b’amazina akomeye mu myaka isaga ine ishize.

Icyo gihe hari ku wa 29 Nyakanga 2019, ubwo haririmbiraga abahanzi barimo Makanyaga Abdul, Christopher, Social Mula, Riderman, Queen Cha, Nsengiyumva François ‘Igisupusupu’ na Amalon.

Kuri uyu munsi, abakunzi ba muzika bongeye kuryoherwa n’umuziki bacurangiwe ndetse igitaramo cyasojwe bamwe batifuza gutaha.

Iki gitaramo cyamaze amasaha asaga atandatu, abacyitabiriye banyuzwe kuva ku muhanzi Afrique wageze ku rubyiniro bwa mbere kugera kuri Bruce Melodie wagishyizeho akadomo.

Nyuma y’ibitaramo bizenguruka intara biteganyijwe ko hazakorwa icya nyuma kizabera mu Mujyi wa Kigali mu gihe kitaramenyekana.

Mwarakoze cyane kubana natwe mu bitaramo bizenguruka igihugu. Mugume mudukurikire ku mbuga nkoranyambaga zacu ku makuru atandukanye.

UKO IGITARAMO CYAGENZE UMUNOTA KU WUNDI:

MTN IWACU MUZIKA FESTIVAL YASOREJWE I RUBAVU MBERE YO KUGERA I KIGALI

19:05: Bruce Melodie ni we muhanzi wasoje ibitaramo bya MTN Iwacu Muzika Festival byazengurutse intara z’igihugu.

Uyu muhanzi umaze igihe kirekire mu muziki Nyarwanda ndetse uri mu bawuyoboye, yongeye kwishimira bihambaye.

Yaririmbye indirimbo zitandukanye mbere yo gusoreza ku ze zakunzwe cyane mu myaka ya vuba zirimo “Henzapu” na “Kungola” yahuriyemo n’Umuhanzikazi Sunny.

Abakunzi b’umuziki batashye banyuzwe n’umuziki mwiza kandi w’umwimerere wacurangiwe abitabiriye igitaramo cyabereye kuri Stade Nengo mu Karere ka Rubavu.

–  Dj Pius yatunguranye ku rubyiniro

18:55: Bruce Melodie yageze ku ndirimbo “Ubushyuhe’’ yakoranye na Dj Pius, uyu mugabo ahita amusanganira ku rubyiniro bafatanya kuyiririmba.

Indirimbo “Ubushyuhe” yagiye ku rubuga rwa YouTube ku wa 2 Nyakanga 2020. Kugeza ubu imaze kurebwa n’abarenga miliyoni imwe n’ibihumbi 100.

Nyuma yo kuririmba, Bruce Melodie yagize ati “Dj Pius yakoze kuza kumfasha. Ni we muntu utuma ngaragara nk’aho ndi mugufi ariko siko biri.’’

Umuhanzi Bruce Melodie yiyambaje Dj Pius bafatanya kuririmba indirimbo bakoranye yitwa "Ubushyuhe". pic.twitter.com/LDJcY4Hoe4

— IGIHE (@IGIHE) October 14, 2023

–  Bruce Melodie yashinze imizi mu muziki

Mbere yo gutangira kuririmba yabwiye Abanyarubavu ko yiteguye kubataramira bigashyira kera. Ati “Ngiye kubatamo imiziki. Muriteguye.’’

Mu ndirimbo zose yaririmbye, Bruce Melodie yashimishije abakunzi b’umuziki we. Buri yose bafatanyaga kuyiririmba kuva ku ijambo rya mbere kugera irangiye. Yaririmbye indirimbo zirimo “Ndumiwe”, “Funga macho”, “A l’aise”, “kinya”, “Ikinyafu”, “Saa Moya”, “Akinyuma” na “Ndakwanga”.

18:32: Bruce Melodie ni we ugiye gushyira akadomo ku gitaramo. Yakiriwe neza mu ndirimbo ye “Ndumiwe” yinjiriyeho ku rubyiniro.

Bruce Melodie ni we ugiye gushyira akadomo ku bitaramo bya MTN Iwacu Muzika Festival bizenguruka intara zitandukanye z'igihugu. Yinjiriye ku ndirimbo ye “Ndumiwe”. pic.twitter.com/DsrOtpuOyN

— IGIHE (@IGIHE) October 14, 2023

–  Riderman yahawe ‘inkoni’ ishimangira ko ari Umwami wa Hip hop

Riderman yagaragaje ko ari umuraperi ukomeye mu muziki w’u Rwanda. Mu gitaramo MTN Iwacu Muzika yaririmbye indirimbo ze zamamaye kuva hambere zirimo “Horo”, “Abanyabirori” na “Simbuka” yasorejeho.

Mbere yo kuva ku rubyiniro, yahawe impano y’inkoni n’umwe mu bafana mu kumwereka ko amufata nk’umwami wa Hip hop.

Riderman yahise amuhamagara kugira ngo ajye kumushimira. Ati “Uyimpaye duhurire inyuma.

Yabwiye ab’i Rubavu ko bakwiye ibyiza. Ati “Imana ibahe amahoro n’umugisha. Isubize aho mukuye.”

–  Riderman yahamije ibigwi muri Hip hop

Gatsinzi Emery [Riderman] yavukiye i Bujumbura mu Burundi, tariki 10 Werurwe 1986. Ni we mfura mu bavandimwe batanu bavukana; abahungu batatu n’abakobwa babiri.

Riderman ni umwe mu baraperi bakomeye mu Rwanda, yagaragaje ubukare mu gusuka amagambo ku muraperi wese wagerageje kumukora mu jisho, na we yeguraga ikaramu akandika indirimbo imukorogoshora akamubwirira mu migani ko ‘yabayoboye kuva muri 2008’.

Ni we washinze studio yitwa Ibisumizi akorana n’abatunganya indirimbo batandukanye barimo T-Brown, First Boy, Fazzo n’abandi.

Yatangiye kuririmba muri Gicurasi 2006 yinjiye muri UTP Soldiers, itsinda ryari rigizwe na NEG G The General na MIM.

Baje gukorana indirimbo umunani maze nyuma yaho na we asohora indirimbo ku giti cye ya mbere mu 2007. Iyo ndirimbo yayise “Turi muri Party”; biza no gutuma ahita ava muri iryo tsinda atangira gukora injyana ya RAP ku giti cye.

UTP yakomeje gukora dore ko yahise imusimbuza Puff G, maze Riderman na we akomeza inzira ye yo kuririmba ku giti cye aho yasohoye indirimbo zakunzwe cyane nka "Inkuba", maze asohora album ye ya mbere yari igizwe n’indirimbo 16 zarimo ‘‘Rutenderi’’, ‘‘Uwo mukobwa’’ n’izindi.

Kuva icyo gihe kugeza na n’ubu aracyari mu baraperi bayoboye muri muzika Nyarwanda. Hambere yivugaga ibigwi ko ari we muraperi wujuje Petit Stade wenyine.

–  Yongeye gutaramira i Rubavu nyuma y’imyaka isaga ine

Mu bahanzi bari muri Iwacu Muzika ya 2019, Riderman ni we wenyine wongeye kuhataramira.

Abanya-Rubavu bamweretse ko bamwishimiye cyane binyuze mu ndirimbo zitandukanye nka ‘Mambata”, “Ikinyarwanda” yahuriyemo na Bruce Melodie n’izindi.

18:04: Riderman yageze ku rubyiniro, yakirwa n’amashyi y’urufaya. Uyu muraperi yaserutse aherekejwe na Karigombe, umunyempano umenyerewe kumugaragira mu bitaramo bitandukanye.

Riderman yinjiriye mu ndirimbo ye “Inyuguti ya R’’ yaririmbye mu ijwi rye ry’umwimerere.

Yahise yanzika n’indirimbo ye “Cugusa”, yishimiwe cyane na benshi ndetse bafatanya kuyibyina.

Riderman, Umwami w’Ibisumizi yeretswe ko yari umwe mu bari bakumbuwe mu Karere ka Rubavu. Yageze ku rubyiniro ari kumwe na Karigombe usanzwe umufasha ku rubyiniro. Yinjiriye ku ndirimbo ye "Inyuguti ya R" ayiherekesha iyitwa "Cugusa". pic.twitter.com/cOmlx1fmIl

— IGIHE (@IGIHE) October 14, 2023

Meya wa Rubavu yashimye abitabiriye igitaramo

Umuyobozi w’Akarere ka Rubavu w’Agateganyo, Nzabonimpa Déogratias, na we yakiriwe ku rubyiniro agaragaza ibyishimo bisendereye atewe no kuba ibitaramo bya MTN Iwacu na Muzika Festival byakomereje mu karere ayoboye.

Yerekanye ko urubyiruko ari imbaraga z’igihugu kandi zubaka vuba. Yerekanye ko rugomba kwishima ariko rukibuka uruhare rwarwo mu kubaka igihugu, abifuriza gukomeza kuryoherwa n’ibirori.

–  Bamukomeye amashyi y’ama-Rayons, ava ku rubyiniro batabishaka

Mu kiragano cy’abaraperi bashya arayoboye, no muri bakuru be hari abo yamaze kunyuraho ku gikundiro n’ibihangano byacengeye benshi.

Bushali yongeye gushimangira ko ari umwe mu baraperi bakomeye cyane muri Muzika Nyarwanda.

Yaririmbye indirimbo nyinshi, ariko by’umwihariko yasoreje ku ndirimbo zirimo “Umwirabura”, “Tsikizo” na Ni tuebue? Yasorejeho.

Mbere yo kuva ku rubyiniro, abafana bose bahagaze bemye bamukomera amashyi mu mujyo umwe nka nkumwe abafana ba Rayon Sports babigenzereza ikipe iyo yatsinze igitego na nyuma y’umukino.

Babikoze baririmba izina rye mu majwi aranguruye cyane bati “Bushido, Bushido, Bushido, Bushido!”

–  Rubavu yashimangiye ko ari umujyi w’abanyabirori!

Akarere ka Rubavu mu bijyanye n’imyidagaduro kazwiho kubamo abakunda kwizihirwa no kwitabira ibitaramo bitandukanye bihabera.

Iyo hari igitaramo usanga na bamwe mu Banyakigali bahaserukiye kuko ari ahantu benshi baza bakagarura ubuyanja kubera amafu ava mu Kiyaga cya Kivu.

Ku Kibuga cya Nengo hakubise huzuye abantu babarirwa mu bihumbi, buri muhanzi uri kujya ku rubyiniro bari kumwereka urukundo bagafatanya na we kuririmba.

Byageze kuri Bushali biba akarusho kuko nk’utamuzi yari kwibaza icyabereye i Nengo.

–  Bushali i Gisenyi ni akamana!

Si Imana ya yindi abizera baramya ariko urebye uburyo ari mu mitima y’abakunzi ba muzika Nyarwanda by’umwihariko abihebeye Hip hop bitanga ishusho ry’urukundo afitiwe.

Kuva agihamagarwa ababarirwa mu bihumbi bari kuri Stade Nengo i Gisenyi bavuye hasi, bafatanya na we kuririmba ndetse no kubyina.

Uhereye ku bana bato kugera ku bakuze bose bagendeye muri uwo mujyo. Kuva ku ndirimbo “Ku Gasima”, “Kurura”, “Kinyatrap”, “Mu Kwaha”, ni uko bagendaga.

– Bushali atigishije Rubavu

17:39: Kuva igitaramo kigitangira, benshi mu majwi yabo bumvikanaga basaba kubona Bushali ku rubyiniro. Urukundo afitiwe rugaragarira mu buryo butandukanye ndetse ni we rukumbi abafana be bitwaje ibyapa byo kwerekana ko bamuri inyuma.

Uyu muraperi yinjiriye mu ndirimbo "Ku Gasima’’. Benshi mu bakunzi be bahise batangira gufatanya kuririmba ndetse abandi bagenda babyina kwa kundi basa n’ababa basobekeranya amaguru kumwe babyina "Drill" cyangwa "Trap".

Umwami wa Kinyatrap aracyari Bushali. Ab'i Rubavu ni abahamya! Yinjiye ku rubyiniro ibintu bihindura isura, abafana biterera hejuru biyambura ubusa abandi baje bitwaje icyapa kiriho izina rye, na we atangira kubaririmbira ahereye ku ndirimbo ye “Ku gasima”. pic.twitter.com/j5ApaAqRxp

— IGIHE (@IGIHE) October 14, 2023

–  Alyn Sano yitwaye neza bidasanzwe

Mbere yo kuva ku rubyiniro, Alyn Sano yaririmbye indirimbo zitandukanye zirimo “Radio”, “Bonane” yahuriyemo na Dj Pius na Bushali ndetse na “Kamwe’’ yahurijwemo abahanzi batandukanye.

Uyu muhanzikazi yavuye ku rubyiniro amaze gushyushya abakunzi ba muzika ndetse bari gufatanya kubyinana.

–  Alyn Sano yasogongeje abakunzi be indirimbo nshya

Alyn Sano uheruka kumurika indirimbo ya kabiri yafatiye amashusho mu ziri kuri album ye ya mbere yise ‘Rumuri’ nyuma y’iyo yise ‘Sakwe Sakwe’ yayiririmbiye mu Karere ka Rubavu bwa mbere.

Iyi ndirimbo yise “Positive” yumvikana mu Njyana ya Amapiano, amajwi yatunganyijwe na DevyDenko afatanyije na Kevin Klein mu gihe amashusho yakozwe na David Fernandez.

–  Alyn Sano yaserutse bidasanzwe

17:20: Alyn Sano yabanjirijwe ku rubyiniro n’ababyinnyi babiri bambaye nk’intore. Bari bakurikiwe n’abafite urumuri ndetse n’ababyinnyi bambaye nk’abatekinisiye bakora amazi cyangwa amashanyarazi. Uyu muhanzikazi yinjiriye mu ndirimbo ye “Hono”.

Alyn Sano yaserutse bidasanzwe ndetse ku rubyiniro yabanjirijwe n’ababyinnyi babiri bambaye nk’intore. Uyu muhanzikazi yongeye gushimangira ko ari umwe mu bo kwitega ku hazaza ha muzika. pic.twitter.com/8kZDAahkbO

— IGIHE (@IGIHE) October 14, 2023

–  RFI yasobanuriye ab’i Rubavu serivisi zayo

Rwanda Forensic Institute (RFI), Ikigo gitanga serivisi z’Ibimenyetso bya Gihanga bikoreshwa mu Butabera, cyaherekeje iri serukiramuco kuva ryatangira.

Mu Karere ka Rubavu na ho abakozi baryo basobanuriye abakunzi ba muzika serivisi gitanga n’uko bazibona.

RFI itanga serivisi zirimo gupima uturemangingo ndagasano, AND, gupima ibinyabutabire bishobora kuba byagize uruhare mu rupfu rw’umuntu n’ibindi.

Iki kigo gifite laboratwari 12 zifasha mu gupima ibimenyetso kandi cyerekanye ko gifasha ibigo kubona amakuru yatakaye. Kwa kundi mudasobwa ipfa ariko hari amakuru wari ufiteho.

Aha inzobere za RFI zifasha uyiganye ashaka izo serivisi mu gihe gito cyane. RFI yerekanye kandi ko ifite ubuhanga mu gutahura ibyakwangiriza ubuzima bw’abantu nk’ibiturika, imbunda n’ibindi ubyitwaje agambiriye ikibi agafatwa atarangiza.

Iki kigo cyatangaje ko kiri no mu bushakashatsi bwo kureba uko cyajya gitanga serivisi zo gupima ADN z’umwana uri munda ya nyina bidasabye ko hategerezwa kubanza yavuka, ubusanzwe izi serivisi ntizitangwa.

Ubukangurambaga bwa #MenyaRFI burarimbanyije, aho abitabiriye igitaramo basobanuriwe serivisi iki kigo gitanga n’akamaro ko gukoresha ubumenyi bwa gihanga mu kumenya amakuru atandukanye. Izi zirimo gupima alukoro iri mu mubiri, kumenya isano iri hagati y’abantu hapimwe uturemangingo ndangasano ndetse no gupima imibiri y’abitabye Imana, hagaragazwa icyateye urupfu.

–  Inana iri ku rundi rwego! Chriss Eazy yafashe Rubavu bugwate

Chriss Eazy yasoreje ku ndirimbo “Inana”. Iyi uwavuga ko abakunzi ba muzika ari bo bayiririmbiye ntiyaba akabije.

Yarinze ava ku rubyiniro agifitiwe igikundiro ku buryo wabonaga nta wifuza ko ava ku rubyiniro.

Iyi ndirimbo iri mu zakunzwe cyane ndetse iri mu zatumbagije izina rya mu Banyarwanda.

–  Chriss Eazy yakuriwe ingofero

Indirimbo ze zirazwi cyane, buri yose imaze gucengera mu buzima bw’abakunzi b’umuziki Nyarwanda.

Mu gihe yamaze ku rubyiniro, Chriss Eazy yeretswe urukundo kuko yahagurukije ibihumbi by’abateraniye kuri Stade Nengo.

Indirimbo zose bari gufatanya kuziririmba ndetse by’akarusho banavuye hasi bari gufatanya kuzibyina.

Yaririmbye indirimbo zitandukanye zirimo ‘Edeni”, “Amashu”, “Lala” yahuriyemo na Kirikou Akili wo mu Burundi na “Basi sori”.

Indirimbo “Edeni” ihinduye ibintu i Rubavu! Ni yo umuhanzi Chriss Eazy yinjiriyeho ku rubyiniro, aho yakiriwe bidasanzwe, abakunzi be bamwereka urukundo. pic.twitter.com/NrG7rW2XFR

— IGIHE (@IGIHE) October 14, 2023

16:55: Chriss Eazy yageze ku rubyiniro. Yeretswe urukundo ruhambaye ndetse mu bamubanjirije nta wamuhiga urebye uko bakiriwe n’abakunzi babo.

Uyu muhanzi yinjiriye mu ndirimbo “Edeni”.

16:45: Ishimwe Kelly wamenyekaniye muri ArtRwanda-Ubuhanzi, aho yanyuze mu Cyiciro cya Kabiri yongeye guhabwa umwanya wo kuririmba. Yari yanataramiye mu Karere ka Huye, mu gitaramo cyabereye kuri Stade ya Kaminuza y’u Rwanda.

Yaririmbye indirimbo ya nyakwigendera Yvan Buravan yise “Oya.’’

Uyu muhanzi ufite ijwi riryoheye ugutwi yanyuzagamo akibutsa urubyiruko kuzitabira irushanwa rya ArtRwanda na we yigaragarijemo.

Ati “Nabazaniye inkuru. ArtRwanda- Ubuhanzi uyu mwaka yagarutse. Mu Ugushyingo na we uzabe witeguye, umwaka utaha na we ushobora kuzaba uhagaze nk’aha.”

Umwe mu banyempano banyuze mu Irushanwa Art-Rwanda-Ubuhanzi witwa Ishimwe Kelly, yahawe umwanya mu bitaramo bya MTN Iwacu na Muzika Festival, aho yatangiye aha icyubahiro Buravan watabarutse abinyujije mu kuririmba ndirimbo ye “Oya”. pic.twitter.com/6O3RNp4LWa

— IGIHE (@IGIHE) October 14, 2023

Symphony Band yabanje gutaramira ab’i Rubavu

16:31: Mugengakamere Joachim [The Major] ucuranga Guitar Solo yahawe akanya ko kuririmba, yerekwa urukundo n’ab’i Rubavu, ahabarizwaga Ishuri rya Muzika rya Nyundo we na bagenzi be bizeho mbere yo kwimukira i Muhanga.

Yaririmbye indirimbo ze zitandukanye zirimo “Sober”, “Ide” yakoranye na Alyn Sano na "Respect".

Symphony Band ni itsinda rimaze kwamamara mu gucurangira abahanzi ririmo Irakora Fabrice uvuza ingoma, Niyontezeho Etienne ucuranga Piano, Mugisha Frank uguranga Guitar Bass na Mugengakamere Joachim [The Major] ucuranga Guitar Solo.

Symphony yatangiye mu Ugushyingo kwa 2015 icuranga bwa mbere mu gitaramo mu 2016 ubwo habaga imurikagurisha rya TVET, irishimirwa cyane. Icyo gihe iri tsinda ryacuranze indirimbo zirimo ‘Urubambye Ingwe’ ya Kamaliza, ‘Agasaza’ ya Masamba n’izindi.

Mugengakamere Joachim [The Major] ucuranga Guitar Solo yahawe akanya ko kuririmba, yerekwa urukundo n’ab’i Rubavu, ahabarizwaga Ishuri rya Muzika rya Nyundo we na bagenzi be bizeho mbere yo kwimukira i Muhanga.

Yaririmbye indirimbo ze zitandukanye zirimo “Sober” na “Ide”… pic.twitter.com/UURb9EJ2pS

— IGIHE (@IGIHE) October 14, 2023

–  RIB yaburiye abaturage kwirinda abatekamutwe

Urwego rw’Ubugenzacyaha, RIB, rwatanze ubutumwa ku bitabiriye iki gitaramo ku kwirinda kugwa mu mutego w’abajura.

RIB yashimiye MTN na RFI ku bufatanye bwa buri munsi mu kugenza ibyaha no kubikumira bitaraba.

Umukozi wa RIB yerekanye amayeri atuma abajura bambura abaturage amafaranga kuri telefoni.

Yagize ati "Hari uburyo umuntu aguhamagara akakoherereza n’ubutumwa bugufi bugaragaza ko hari amafaranga wakiriye kandi atari byo hanyuma akakubwira ko ayobye ko uyamwoherereza. Mu by’ukuri jya ubanza gushishoza kuko abenshi baba ari abajura."

"Hari abaguhamagara bakubwira ko watsindiye amafaranga kandi nta tombora wakinnye. Rimwe bakubwira ko ubanza kugira amafaranga wohereza kugira ngo ya yandi watsindiye uyabone."

Abaturage basabwe ko mu gihe bahuye n’abo batekamutwe bajya bahamagara 116 cyangwa 166 bakabimenyekanisha. Ushobora no guhamagara MTN ukoresheje nimero zirimo 3000 cyangwa 100.

16:20: Symphony Band yahamagawe ku rubyiniro, isimbura Yousta Band yacurangiye abahanzi barimo Afrique, Niyo Bosco na Bwiza.

–  Bwiza yashimiye abafashije abahanzi kongera kwegerana n’abaturage

Mbere yo kuva ku rubyiniro, Bwiza yashimiye abaterankunga bose ba MTN Iwacu Muzika Festival barimo Sosiyete y’Itumanaho MTN Rwanda, Rwanda Forensic Institute (RFI), Ikigo gitanga serivisi z’Ibimenyetso bya Gihanga bikoreshwa mu Butabera na Inyange Industries.

Yasabye ko n’ubutaha hazatekerezwa uko bahuzwa n’abakunzi b’ibihangano byabo mu bitaramo bitandukanye.

Ati "Mumfashe tubashimire. Ntimwishimiye kutubona.’’

Bwiza yavuye ku rubyiniro nyuma yo kuririmba indirimbo ye “Do me".

–  Bwiza yeretswe urukundo ruhambaye n’abakunzi be i Rubavu

Bwiza yageze aho ava ku rubyiniro asanganira abafana ba muzika ye, na bo bamwakira neza bafatanya kuririmba indirimbo ze zitandukanye mu majwi y’umwimerere ku buryo wakeka ko bafatanyije kuzisubiranamo.

Uyu mukobwa yaririmbye indirimbo zitandukanye zirimo “Yiwe”, “Soja” yakoranye na Juno Kizigenza, “Exchange”, “Wibeshya’’ na “Ready’’.

Bwiza yagaragarijwe urukundo mu buryo bukomeye n’abakunzi b’umuziki cyane ko indirimbo ze zose yaririmbye wabonaga agendana n’abitabiriye igitaramo, ijambo ku rindi nta gutegwa.

Umuhanzi Bwiza Emerance umaze kumenyerwa ku rubyiniro n’ababyinnyi be baba bitwaje umuriro, yakiriwe neza n’Abanya-Rubavu bishimiye kumubona abataramira. pic.twitter.com/tMUXcvbJyK

— IGIHE (@IGIHE) October 14, 2023

–  Bwiza, umuhanzikazi wo guhangwa amaso

Bwiza Emerance yatangiye kumenyekana mu 2021 nyuma yo kwegukana igihembo cya ‘The Next Diva’, cyatumye yinjira muri KIKAC Music imufasha mu muziki we.

Uyu mukobwa yashyize hanze indirimbo nshya yise ‘Yiwe’. Ni iya kabiri ikurikira iyo yaherukaga gusohora yise ‘Available’ yashyize hanze akimara kwinjira muri Kikac Music.

Bwiza Emerance ukoresha izina rya ‘Bwiza’ mu muziki, yabaye uwa mbere watsinze irushanwa rya ‘The Next Diva’ rizajya ritegurwa buri myaka ibiri na KIKAC Music mu rwego rwo gushakisha impano z’abakobwa mu muziki.

Mu byiciro bitandukanye aho aririmbira, ibihangano bye ubona atari bishya mu matwi y’ababyumva ndetse n’amaso y’abamureba.

–  Yabyinishije ab’i Rubavu

Mbere yo kuririmba indirimbo zitandukanye, Bwiza yanyuzagamo akaganiriza abakunzi be.

Ati “Ndabakunda. Ndashaka ko tubanza kubyinana.’’

Yanyuzagamo akababwira amagambo basubiramo mu kumwereka ko biteguye kuririmbana na we.

Nyuma yo kuririmba indirimbo ye “Wibeshya” yakoranye na Mico The Best, hari aho yageze ababwira ati “Musubiremo aya magambo ‘Bwiza we wanna party!’’’ Amajwi menshi yamusubizaga muri aya magambo ye mu kugaragaza ko yishimiwe cyane kandi biteguye kubyinana na we.

Yahise yanzika n’indirimbo ye yise “Sori”.

–  Imiriro yakijwe mu kwakira Bwiza

15:53: Bwiza yakiriwe mu buryo budasanzwe. Mbere y’uko akandagira ku rubyiniro yabanjirijwe n’abantu benshi barimo abari bafite imiriro n’abandi bacanye imyotsi y’amabara atandukanye arimo ubururu.

Uyu mukobwa yakiranywe ubwuzu cyane n’abakunzi b’umuziki we mu Karere ka Rubavu.

Umuhanzi Bwiza Emerance umaze kumenyerwa ku rubyiniro n’ababyinnyi be baba bitwaje umuriro, yakiriwe neza n’Abanya-Rubavu bishimiye kumubona abataramira. pic.twitter.com/tMUXcvbJyK

— IGIHE (@IGIHE) October 14, 2023

–  Seka na Piyapuresha za Niyo Bosco zirakunzwe

Niyo Bosco amaze kuzamura izina rye ndetse igikundiro cye ntigishidikanywaho kubera ubuhanga bwe mu kuririmba, kwandika ndetse no gucuranga gitari.

Uyu muhanzi ufite ubumuga bwo kutabona yashimishije ab’I Rubavu binyuze mu ndirimbo zitandukanye zirimo “Urugi”, “Ubigenza ute?”, “Piyapuresha” na “Seka” yasorejeho.

Agisoza yagiye bamuririmba bati "Bosco, Bosco, Bosco."

Na we yahise asaba umwanya muto abwira ab’i Rubavu ati "Ndabakunda cyane. Mwanyeretse ko mukunda umuziki.’’

–  Niyo Bosco yunamiye Yvan Buravan

Niyo Bosco yasabye abitabiriye iki gitaramo gufatanya bagaha icyubahiro nyakwigendera Yvan Buravan.

Ati “Ndashaka ko twunamira umuhanzi uherutse kutuvamo. Ndashaka ko tumwibuka ariko tumwizihiza.’’

Yahise aririmba indirimbo ye yasize akoze yise “Ye Ayee”, afatanya n’abakunzi ba muzika kuyiririmba.

Yvan Buravan uri mu bahanzi bakoze amateka akomeye mu muziki w’u Rwanda, yitabye Imana afite imyaka 27 ku wa 17 Kanama 2022.

Yvan Buravan yavutse mu 1995 i Gikondo. Se yitwa Burabyo Michael na nyina akitwa Uwikunda Elizabeth. Ni bucura mu muryango. Amashuri abanza yayigiye i Gikondo ku kigo cya Le Petit Prince, ayisumbuye ayakomereza muri Amis des Enfants na la Colombière.

Yahise akomereza muri Kaminuza y’u Rwanda muri Koleji yigisha ubucuruzi, itumanaho n’ikoranabuhanga.

Yatangiye kuririmba mu 2009, akiri muto kuko yari afite imyaka 14. Umuziki nk’umwuga yawutangiye ku mugaragaro mu 2016, Abanyarwanda nabo baramukundira, bakirana yombi ibihangano bye. Yaririmbaga injyana zirimo R&B, Soul na Afrobeat.

Indirimbo ya mbere yakoze yamenyekanye cyane ni iyitwa Urwo Ngukunda yahuriyemo na Uncle Austin nyuma akurikizaho Malaika yahogoje imitima y’abakunda umuziki nyarwanda.

Ni we muhanzi wenyine wo mu Rwanda wabashije kwegukana igihembo cya Prix découvertes RFI mu 2018, bimuhesha amahirwe yo gukora ibitaramo hirya no hino ku Isi.

Mu ndirimbo yakoze zatumye arushaho kumenyekana, harimo nk’iyo yise “ Si Belle”, Garagaza, Oya, Just a dance n’izindi.

Album yaherukaga gukora ni iyo yise “Twaje” mu gihe indirimbo ya nyuma asize ni iyo yise “BigTime”.

15:15: Niyo Bosco usigaye wiyita "Music Machine" yageze ku rubyiniro. Abafana bamweretse urukundo mu kumwakira na we ntiyatinzamo ahita abwira Yousta Band gukoma umurishyo atangira kuririmba ahereye ku ndirimbo "Buriyana’’.

Niyo Bosco uri mu bahanzi bafite izina mu bazamukanye imbaraga muri Muzika Nyarwanda, yaherekejwe n’ababyinnyi batatu b’igitsinagore.

Niyo Bosco yinjiye ku rubyiniro mu ndirimbo ye “Buliyana”. Agihamagarwa abakunzi be bamwitabye mu majwi arenga bati "Bosco! Bosco! Bosco!” pic.twitter.com/sKFQRv8UVJ

— IGIHE (@IGIHE) October 14, 2023

Rompe na Agatunda zazamuye izina rya Afrique

Ubwo yaririmbaga indirimbo Rompe, Afrique yari afite abafana bake biganjemo abari bafite udutambaro bazunguza hejuru mu kumwereka ko bamwishimiye.

Yageze ku yitwa Agatunda bihindura isura, yabanje kwikuramo ikote yari yambaye asigarana agapira gusa.

Yahise afatiraho mu kuririmba ubona ko abakunzi be batangiye kuva hasi, bamwe bamufasha kuririmba no kubyina ku babishoboye.

Afrique yabwiye ab’i Rubavu ko abakunda

Afrique w’imyaka 21, amazina ye ni Kayigire Josue, yavukiye i Gikondo mu Mujyi wa Kigali.

Yaririmbye anyuzamo akaganiriza abakunzi ba muzika ye. Ati "Mumeze mute? Ndabakunda cyane.’’

Nubwo atamaze igihe kirekire mu muziki, indirimbo ze zimaze kwinjira mu buzima bwa benshi.

Yaririmbye indirimbo ze zirimo izamuzamuriye izina nka “Akanyenga”, yinjiriyemo na “My Boo”.

14:47: Afrique yahamagawe ku rubyiniro. Mbere y’uko aseruka imbere y’abakunzi ba muzika bateraniye kuri Stade ya Nengo yabanjirijwe n’abakinnyi babiri b’igitsinagore bambaye ibyera hose.

Afrique ni we ubimburiye abahanzi baturutse i Kigali, agiye kwinjiza mu mwuka abakunzi b’umuziki bo mu Karere ka Rubavu. pic.twitter.com/fBzhcaEr3a

— IGIHE (@IGIHE) October 14, 2023

14:35: Yousta Band yageze ku rubyiniro itangira gushyira ibyuma ku murongo mbere y’uko hakirwa umuhanzi ugiye kubimburira abandi ku rubyiniro. Iri tsinda rigizwe n’abize umuziki mu Ishuri rya Muzika rya Nyundo.

Nk'uko byageze ahandi hose Yousta Band ni yo ibanza gucurangira abahanzi bamwe babanza ku rubyiniro rwa MTN Iwacu Muzika Festival. pic.twitter.com/FLn2tjT2IP

— IGIHE (@IGIHE) October 14, 2023

14:30: MC Buryohe na Bianca Baby bageze ku rubyiniro aho bamaze gushyushya abakunzi ba muzika i Rubavu mbere y’uko bakira umuhanzi wa mbere mu Karere ka Rubavu.

MC Buryohe na Bianca Baby nibo bari kuyobora igitaramo cya Mtn Iwacu na Muzika i Rubavu. pic.twitter.com/y35Pa9FLdf

— IGIHE (@IGIHE) October 14, 2023

–  Ikaze ku Kibuga cya Nengo

Abahanzi bazi neza Stade Nengo bibuka ko hakurikiye abakinnyi b’amazina akomeye muri ruhago y’u Rwanda.

Ku bakunzi b’umuziki na ho ni umwihariko kuko benshi iki kibuga barahagera bakizihirwa by’umwihariko iyo hari ibitaramo byagutse.

Ni ikibuga kiri mu Mujyi wa Rubavu rwagati ariko by’umwihariko cyegereye Ikiyaga cya Kivu nko muri metero 20. Ibi bituma ibitaramo bihabera bikurura benshi ahanini kubera umucanga aho benshi bakunda kuryohereza mu bihe by’impera z’icyumweru.

Mu Karere ka Rubavu ku nkengero z'Ikiyaga cya Kivu ni ho hagiye kubera igitaramo gisoza ibizenguruka intara muri MTN Iwacu Muzika Festival.

Abahanzi bategerejwe muri iki gitaramo barimo Afrique, Bwiza, Niyo Bosco, Alyn Sano, Chriss Eazy, Bushali, Riderman na Bruce Melodie. pic.twitter.com/EsqUTg2B2A

— IGIHE (@IGIHE) October 14, 2023

–  Rubavu iri mu mijyi yunganira uwa Kigali

Akarere ka Rubavu gatera imbere mu mfuruka zose bitewe n’ibyiza nyaburanga birimo Ikiyaga cya Kivu gikurura ba mukerarugendo bahasura umunsi ku wundi n’ibindi bikorwa by’ishoramari bihashinga imizi.

Rubavu yakira umubare munini ushingiye ku rujya n’uruza rw’abanyura ku mipaka iyihuza n’Umujyi Goma muri Repubulika Iharanira Demokarasi ya Congo ndetse n’abaturuka mu tundi duce tw’igihugu baje kugafatiramo akayaga gaturuka mu Kiyaga cya Kivu, kwidagadurira ku mucanga no kunanurira imitsi ku Mashyuza. Imijyi ya Goma na Rubavu ihuriye ku kuba yubatse hafi y’Ikirunga cya Nyiragongo.

Rubavu ikora ku nkengero z’Ikivu ifite amahirwe ku bukerarugendo ndetse n’ishoramari ryambukiranya imipaka rihuriza hamwe abarenga ibihumbi 45 banyura kuri Petite Barrière buri munsi n’ibihumbi umunani bambukira kuri Grande Barrière.

Rubavu iri mu mijyi yunganira Kigali ifite imishinga iri kuzamurwamo nk’inyubako zigezweho, iyubakwa ry’imihanda mishya, ishoramari ry’amahoteli, kubaka ibyambu no kubyaza Gaz Methane umuriro w’amashanyarazi ndetse no kubaka inganda zikomeye zizunganira urwa Bralirwa rwahashinze imizi.

Akarere ka Rubavu kari muri dutanu tubarizwa mu Ntara y’Iburengerazuba, kagizwe n’imirenge 12, utugari 80, imidugudu 525, ku ntera ya kilometerokare 388.3.

Imibare yo mu 2022 yerekana ko abaturage bako bagerwaho n’amashanyarazi bangana na 95.8% mu gihe abafite amazi meza ari 93.5%

Amafoto: Nezerwa Salomon

---