Abana babarizwa muri ‘Triplets Ghetto Kids’ batangiye kwamamara biturutse ku mbyino bakoresheje mu ndirimbo ‘Sitya Loss’ ya Eddy Kenzo ndetse no mu yandi mashusho y’indirimbo zitandukanye bageze i Kigali ku wa 30 Werurwe 2023.

Biteganyijwe ko iri tsinda rigizwe n’abana bo mu gace ka Katwe i Kampala rizahabwa igihembo cya ‘African Entertainment Award’ mu birori bya African Heritage bizabera muri Kigali Marriott Hotel ku wa 1 Mata 2023.

Iri tsinda ryashinzwe mu 2014 na Daouda Kavuma, riherutse gutumirwa mu birori bya FIFA Fan Festival 2022 byaherekeje imikino y’Igikombe cy’Isi cyabereye muri Qatar.

Ibirori iri tsinda ryitabiriye i Kigali bizaba biyobowe na Makeda Mahadeo bikazatangirwamo ibihembo ku Banyafurika bo mu nzego zitandukanye bakoze ibikorwa by’indashyikirwa biteza imbere uyu mugabane.

Mu bazashimirwa uyu mwaka barimo Dr Goodluck Jonathan wahoze ayobora Nigeria, Nyakwigendera Dr John Pombe Magufuli wayoboye Tanzania, Lt Gen Seretse Khama Ian Khama wahoze ayobora Botswana, Visi Perezida wa Liberia, Dr. Jewel Howard-Taylor n’abandi.

Ni ibihembo bizahabwa Abanyafurika barimo n’ababa mu mahanga mu nzego zose zirimo ubucuruzi, politiki, ibikorwa by’ubugiraneza, imyidagaduro, ubuvanganzo, umuco, ikoranabuhanga, siyansi no guhanga udushya.

Reba amashusho ya ‘‘Triplets Ghetto Kids’’ ubwo bari bageze i Kigali

View this post on Instagram

A post shared by AfriHeritage (@theafriheritage)

Triplets Ghetto Kids ubwo bari bageze ku Kibuga Mpuzamahanga cy'Indege cya Kigali i Kanombe

'Triplets Ghetto Kids’ bishimiye kugera i Kigali

Biteganyijwe ko iri tsinda rizahabwa igihembo cya ‘African Entertainment Award’ mu birori bya African Heritage bizabera muri Kigali Marriott Hotel ku wa 1 Mata 2023