The Good Ones ni itsinda ry’abahanzi nyarwanda rifite umwihariko wo gucuranga umuziki gakondo uturuka mu ruhurirane rw’ibicurangisho birimo inkweto ebyiri, gitari, utunyuguri, amashyi n’umudiho w’imigeri bacishamo bagakubita hasi.

Iri tsinda rigizwe n’abagabo bane barangajwe imbere na Adrien Kazigira ari na we warishinze. Mu buzima busanzwe Kazigira ni umuhinzi mworozi unakunda uyu mwuga mu buryo bukomeye kubera umusaruro umugezaho by’umwihariko kuko ari wo utunze umuryango we n’igice kinini cy’Abanyarwanda.

Gucurangisha inkweto byabahesheje kwigaragaza mu mahanga

Kuba umuhinzi mworozi ntibibuza Kazigira Adrien na bagenzi be gukora umuziki. Ku nshuro ya mbere babonye amahirwe yo guserukira u Rwanda hanze y’igihugu mu iserukiramuco rya Womad festival ryabereye mu Bwongereza muri Nyakanga 2014.

BBC itangaza ko ibihumbi n’ibihumbi byari byitabiriye iri serukiramuco byanyuzwe n’umuziki w’umwihariko aba bahabo bane babacurangiye. Bwari ubwa mbere kuri benshi kubona umuhanzi uririmba ibicurangisho bitanga umudiho mu ndirimbo ari inkweto, utunyuguri, gukoma amashyi na gitari gusa, bigaherekezwa n’amajwi y’umwimerere kandi bifite urujyano rw’umuziki uyunguruye.

Baganira na BBC binyuze mu kiganiro Africa Beats, Kazigira Adrien yavuze ko ajya guhitamo abahanzi yifuzaga kwifatanya na bo muri ‘The Good Ones’ ngo yahisemo abeza kurusha abandi(the good ones) bityo izina ryabo riba rishinze imizi dore ko bahuye buri wese afite umwihariko we mu guha amatwi y’abumva ibihangano byabo uburyo ntagereranywa buvubuka mu nkweto, gitari, amashyi n’utunyuguri.

Uburyohe bw’umuziki wa ‘The Good Ones’ busemburwa n’ibirungo by’amajwi y’umwimerere y’aba bagabo.

The Good Ones igizwe n’abahinzi babiri, Kazigira na mugenzi we, undi ni umushoferi naho uwa kane akaba umwarimu. Mu bicurangisho byumvikana cyane mu ndirimbo zabo ni inkweto ebyiri umwe muri bo akubitanya na gitari icurangwa na Kazigira.

Mu Rwanda bakunda gucurangira abageni bashing ingo mu mpera z’icyumweru , ikindi gihe bagacuranga mu mihango yo guherekeza abapfuye.

Indirimbo Eudia yahimbiwe umugore wa Kazigira wapfuye

Mu kiganiro na BBC, Kazigira avuga ko indirimbo ‘Eudia’ yayanditse kubera umugore we witwaga Eudia witabye Imana mu mwaka wa 2011.

Ati “Nayise Eudia nkurikije ko iryo zina ari iry’umugore wanjye witabye Imana muri 2011. Uwo mudamu nta kintu twari twagahemukiranaho, aho muburiye amaze kugenda biba ngomba nk’umuhanzi ko ndirimba izina rye. Ni indirimbo y’urukundo igaragaza uko yari ameze, igaragaza uko iwabo bameze n’urukundo bangiriye”

The Good Ones banyurwa n’umwuga bakora urimo kuba abahinzi borozi. Ku ruhande rwa Kazigira ngo nubwo ari umuhinzi icyo ashyize imbere ni umuziki.

Ati “Akazi kanjye nakunze gukora kandi ngikora ,ntazibagirwa kuko gatunze umuryango wanjye kandi n’abandi bagakora nkanjye bakaba ari bantu babeshejeho igihugu. Ndi umuhinzi mworozi ariko icyo nimirije imbere ni umuziki.”

Baracyafite imbogamizi…

Imbogamizi iri tsinda rifite ni ukuba ridafite ibicurangisho bihagije ndetse n’ubushobozi bukaba bukiri hasi. Kazigira avuga ko babonye inkunga baba abahanzi b’ibyamamare mu buryo buhanitse.

Ati “Ntabwo turabona uburyo bwo gutera imbere ariko murabona ko turamutse tubonye inkunga y’ibyuma rya terambere ry’abandi bahanzi twarigeraho neza.”

Hari izindi ndirimbo iri tsinda ryakoze zirimo ‘Sara’, ‘Beletilida’,’ Imvura yaranyagiye’ n’izindi.

Amwe mu mafoto ya ’The Good Ones’ ubwo baheruka mu Bwongereza

Izi nkweto zituma indirimbo za 'The Good Ones' ziryohera amatwi kurushaho

Umwe mu bagize iri tsinda

[email protected]