Iserukiramuco rihuje ibihugu bya Afurika y’Iburasirazuba ryiswe ’Jumuiya ya Afrika Mashariki Utamaduni Festival (JAMAFEST), ryatangiye ku mugaragaro kuri uyu wa 22 Nzeri 2019.

Ibinyujije ku rukuta rwa Twitter, RALC yagize iti “Kuri uyu mugoroba, mu gitaramo cyo gutangiza iserukiramuco #JAMAFEST ry’uyu mwaka i Dar Es Salaam, abanyeshuri bo mu ishuli rya Muzika ku Nyundo baciye agahigo mu gususurutsa abitabiriye imurikabikorwa ndangamuco no kwishimirwa na benshi. #JAMAFEST2019.”

Kuri uyu mugoroba, mu gitaramo cyo gutangiza iserukiramuco #JAMAFEST ry’uyu mwaka i Dar Es Salaam, abanyeshuri bo mu ishuli rya Muzika ku Nyundo baciye agahigo mu gususurutsa abitabiriye imurikabikorwa ndangamuco no kwishimirwa na benshi. #JAMAFEST2019pic.twitter.com/utf3bj6izf

— Inteko Nyarwanda (@Rwandacademy) September 22, 2019

Usibye aba banyeshuri, u Rwanda rwaserukiwe n’abahanzi barenga 110 bitabiriye iri serukiramuco. Nyampinga w’Umuco mu mwaka wa 2019 Kabahenda Ricca Michaella nawe yaritabiriye ahagarariye umuco.

Iri serukiramuco uyu mwaka rifite insanganyamatsiko igira iti “Urusobe ndangamuco: Umusemburo w’ubusabane mu karere, iterambere ry’ubukungu n’ubukerarugendo”.

Umuhango wo gufungura ku mugaragaro iserukiramuco JAMAFEST wabereye kuri Uhuru Stadium i Dar Es Salaam.

JAMAFEST yatangiriye mu Rwanda mu 2013. Igamije kuzamura umuco w’Akarere ka Afurika y’Iburasirazuba. U Rwanda nirwo rwatekereje runatangiza bwa mbere iri serukiramuco, aho bwa mbere ryitabiriwe n’abashyitsi barenga 17,000. Iri serukiramuco riba buri myaka ibiri.

Iri serukiramuco ribaye ku nshuro ya kane mu gihugu cya Tanzania i Dar es Salaam rihuriranye nuko u Rwanda ari rwo ruyoboye Umuryango w’Ibihugu bya Afurika y’Iburasirazub, EAC.

Ku nshuro ya kabiri JAMAFEST ryabereye i Nairobi muri Kenya mu 2015, naho ku nshuro ya gatatu ribera mu gihugu cya Uganda mu 2017 aho ryitabiriwe n’abashyitsi baturutse mu bihugu bitandukanye bigize Umuryango wa Afurika y’Iburasirazuba.

Intego ya JAMAFEST ni ugushyiraho uruhando rwo kumurika umuco nk’inkingi remezo y’ubwiyunge n’iterambere rirambye ry’Ibihugu bigize Umuryango wa Afurika y’Iburasirazuba.

Iserukiramuco ry’akarere ry’uyu mwaka ryitezweho guhuriza hamwe abahanzi n’abayobozi mu nganda ndangamuco z’ibihugu byo mu Muryango w’Afurika y’Iburasirazuba.

Rizafasha kandi guteza imbere ubukerarugendo bushingira ku muco n’amateka, kubungabunga no guteza imbere urusobe rw’ibirango ndangamuco na ndangamateka mu bihugu bigize Umuryango wa Afurika y’Iburasirazuba.

Umutambagiro, iserukiramuco, imurikagurisha ry’ibihangano ndangamuco, ibiganiro, ikinamico, kumurika firimi, imikino, kumurika ibiribwa gakondo, gutanga ibihembo mu mikino inyuranye no kumurika ubwiza n’imideri, ni bimwe mu bikorwa bizaranga iki cyumweru cya JAMAFEST 2019.