Iyi album ikubiyeho indirimbo 17 imaze iminsi itanu isohotse, imaze gucurangwa inshuro zirenga ibihumbi 396 kuri uru rubuga rw’Abanyamerika.

Audiomack itangaza ko muri album nshya zumviswe inshuro nyinshi kuri uru rubuga mu cyumweru cyo ku wa 13 kugeza 20 Kamena 2023 ziyobowe na ‘Work Of Art’ ya Asake wo muri Nigeria.

Izindi album zirimo “a Gift & a Curse” y’umuraperi w’umunyamerika Gunna, “See Ya” ya Wiz Khalifa.

Sean Tizzle wo muri Nigeria niwe ukurikira Juno Kizigenza kuri uru rutonde afiteho album yise “Deus” imaze iminsi ibiri isohotse.

Ni urutonde ruriho album zasohotse guhera ku wa 14 Kamena 2023.

Top 5 Most-Streamed NEW Albums on Audiomack, This Week:

1. @asakemusik — #WorkOfArt 🇳🇬
2. @1GunnaGunna — #aGiftAndaCurse 🇺🇸
3. @wizkhalifa — #SeeYa 🇺🇸
4. @junokizigenza — #Yaraje 🇷🇼
5. @iamseantizzle — #Dues 🇳🇬 pic.twitter.com/lme1ZyLqyC

— Audiomack (@audiomack) June 20, 2023

Ni Album Juno Kizigenza yahurijeho abahanzi b’ibikomerezwa

Mbere y’uko ashyira hanze iyi album uyu musore umaze imyaka itatu mu muziki yabanje guha abakunzi be E.P (Extended Play) yise 6Kg yasohotse mu mpera ya 2021.

Ni album yise ’Yaraje’ , yifashishijemo abahanzi b’ibikomerezwa mu Rwanda barimo Butera Knowless, Bull Dogg, Riderman, King James, Ally Soudy, Bruce Melodie na Kenny Sol.

Ni ishema kuri Juno gukorana n’aba bahanzi dore ko benshi batangiye umuziki akiri umwana muto, ubu yaje abasanga mu kibuga ndetse akaba ari umwe mu bari kwitwara neza.

Ruhumuriza James [King James] wiyambajwe na Juno Kizigenza bakorana indirimbo ‘You’ ni umwe mu barambye mu muziki kandi ufite ibigwi akaba uwa kabiri mu begukanye irushanwa rya PGGSS 2012 amaze gukora album zirindwi.

Butera Knowless yakoranye na Juno Kigenza indirimbo bise ‘Umugisha ’ irinda irangira atarahura na rimwe n’uyu muhanzikazi watangiye umuziki uyu musore afite imyaka icyenda, gusa nyuma baje guhura baraganira.

Ni ishema kuri Juno Kizigenza gukorana n’uyu muhanzikazi ufatirwaho icyitegererezo na benshi mu bakobwa bakiri bato dore ko atigeze acika intege mu rugendo rwe rwa muzika yatangiye mu 2009 akiri umwangavu kugeza n’ubu yubatse urugo akaba agiye gukora album ya gatandatu.

Bull Dogg ni umwe mu baraperi babiri Juno Kizigenza yiyambaje kuri iyi album bakorana indirimbo bise ‘Overdose’.

Ni ubwa mbere uyu musore yari akoranye n’uyu muraperi wuje ibigwi muri muzika nyarwanda yamamayemo cyane mu 2008, icyo gihe Juno yari afite imyaka umunani.

Riderman na we ni ubwa mbere akoranye indirimbo na Juno Kizigenza nubwo bari basanzwe bavugana, bahuriye mu ndirimbo bise ‘My Wife’.

Riderman ni umwe mu baraperi bafite amateka akomeye mu ruganda rw’imyidagaduro mu Rwanda yinjiyemo mu 2005 akaba umwe muri babiri begukanye irushanwa rya PGGSS ubwo Juno yari afite imyaka 13.

Bruce Melodie na Kenny Sol baherutse gukorana na Juno Kizigenza indirimbo bise ‘Igitangaza’; ntibyatunguye benshi dore ko bahoze mu muryango umwe wa ‘Igitangaza Music’ nubwo batamaranye kabiri.

Gusa gufatanya na Bruce Melodie byatumye izina Juno Kizigenza ryihuta cyane mu matwi n’amaso ya benshi.

Ni indirimbo yaje nyuma y’igihe kinini benshi bari bamaze bibaza impamvu uyu muhanzi adakorana na Bruce Melodie nyamara hari indirimbo yakoranye na Kenny Sol ikanakundwa cyane.

Iyo utereye akajijo ku mibare yerekana uko indirimbo ziri gucurangwa ku mbuga zitandukanye zicurangirwaho umuziki usanga iyi ndirimbo bise ‘Igitangaza’ ari mu ziyoboye izindi ziri kuri iyi album.

Juno Kizigenza kandi yiyambaje Ally Soudy umwe mu banyamakuru bubatse izina rikomeye mu myidagaduro mu Rwanda no muziki, bahuriye mu ndirimbo bise ‘Umusore’ yumvikanaho umudiho w’umuziki gakondo.

Ally Soudy yamamaye mu muziki nyuma yo gukorana indirimbo na The Ben bise ‘umwiza wanjye’ na ‘Ibanga’ yahuriyemo United Friends.

Indirimbo zose uko ari 17, zikozwe mu buryo bw’amajwi ayunguruye, ibicurangisho biremereye kandi zatunganyijwe n’Aba-Producers bakomeye barimo Niz Beat, Ishimwe Clement, Santana Sauce, Bob Pro, Kina Beat, Prince Kiiiz, Knox on the Beat, X on the Beat, Madebeats, Kooze na Element Eleéeh.

Zimwe mu ndirimbo ziri kuri album "Yaraje"