Miss Akiwacu Colombe na bagenzi be 70 bahataniye iri kamba batangiye irushanwa kuwa 18 Ugushyingo 2016. Aba bakobwa babanje kuba iminsi mike mu Mujyi wa Warsaw nyuma bahita bimukira muri Rapubulika ya Slovakia iri mu majyepfo ya Pologne ari naho byinshi mu bireba irushanwa byabereye.

Kuri uyu wa 29 Ugushyingo 2016 abakobwa bose uko ari 71 basubiye muri Pologne kujya kwitegura ibirori bisoza irushanwa, bavuye muri Slovakia bamaze kubazwa n’akanama nkemurampaka hasuzumwa ubumenyi bwa buri mukobwa.

Aya manota azongeranywa n’atangwa n’abakurikirana irushanwa kuri internet, ibi ni nabyo bizahesha umukobwa kwisanga muri 25 ba mbere bazavamo Miss Supranational 2016.

Akiwacu Colombe na bagenzi be bagisubira muri Pologne hahise hatangizwa itora ryo kuri internet, umukobwa uzagira ufite ifoto izakundwa na benshi[Likes] azahita yinjira mu ba mbere bazatoranywamo Nyampinga.

Mu mafoto yashyizwe ku rukuta rwa Miss Supranational ari nayo azagenderwaho mu kureba umukobwa ukunzwe cyane, Nyampinga wa Philippines Joanna Edenari imbere, ifoto ye imaze gukundwa n’abasaga ibihumbi 31, akurikiwe n’uwa Peru Silvana Vasquez Monier ufite abarenga ibihumbi 21. Akiwacu Colombe ari mu bakiri inyuma cyane kuko amaze kubona abantu batarenga magana atatu.

Ni ku nshuro ya Gatanu u Rwanda rugiye kwitabira Miss Supranational, muri 2012 hagiyeyo Uwamahoro Yvonne, Miss Mutesi Aurore[2013], Umwali Neema Larissa [2014], Gisa Sonia[2015] na Akiwacu Colombe[2016].

Miss Supranational izasozwa kuwa Gatanu tariki ya 2 Ukuboza 2016 ahitwa Krynica-Zdrój muri Pologne [Poland]. Abategura iri rushanwa batangaje ko rizajya ryerekanwa kuri televiziyo mu bihugu 120 byo ku Isi.

Foto: Igor Drozdowski