Barayagwiza Athanase wo mu Karere ka Gasabo, ni umuhanzi ufite ubumuga bwo kutabona akaba yarashinze itorero rihuriwemo na bamwe muri bagenzi be mu rwego rwo kubahesha agaciro no kurushaho guhuza imbaraga zabo.

Uyu muhanzi ahatanira ibihembo mu marushanwa atandukanye ndetse akaba afite ishimwe rikomeye ku mutima kubera ibikorwa rimaze kumugezaho we na bagenzi be dore ko ritumirwa mu birori bitandukanye.

Barayangwiza w’imyaka 45 y’amavuko, atuye mu Kagari ka Shango mu Murenge wa Nduba mu Karere ka Gasabo, afite umugore n’abana batatu. Mu mwaka wa 1984 ni bwo yagize uburwayi bwamuviriyemo ubumuga bwo kutabona.

Ubwo twamusangaga mu birori byo kwizihiza umunsi mpuzamahanga w’abafite ubumuga mu Karere ka Gasabo tariki ya 4 Ukuboza 2014, Barayagwiza yavuze ko ataciwe intege n’ubwo bumuga.

Yagize ati “Nari nsanzwe ndi umuhimbyi w’indirimbo ziririmbwa mu Kiliziya, mu mwaka wa 2006 ni bwo natangiye guhimba indirimbo zivuga ku bikorwa by’iterambere no kuri gahunda za Guverinoma muri rusange. Nagiye mu marushanwa atandukanye kandi amenshi neshejemo umuhigo.”

Akomeza avuga ko ubuhanzi ari impano y’Imana akaba ari muri urwo rwego yashinze Itorero ryitwa “ Abaca Ubwigunge” rigizwe n’abantu 30. Makumyabiri muri bo bafite ubumuga butandukanye. Kuba ryiganjemo abafite ubumuga, ngo asanga ari ikintu cyiza kuko ribafasha guhuza ingufu no kwihesha agaciro.

Ubuhanzi bwamuhesheje umugore…

Barayagwiza yatangarije IGIHE ko nubwo afite ubumuga ari umugabo uhamye kandi ubashije. Gukora umuziki biri mu byamuhesheje umugore.

Yagize ati “Kuba umuhanzi hari icyo byanyongereyeho mu buzima, kandi sinabura no kuvuga ko byatumye mbasha kubona umugore mwiza, tubyaranye abana batatu “.

Akomeza avuga ko ubuhanzi bwe ari bwo bumutungiye umuryango, kuri ubu akaba yarabashije kwiyubakira inzu, ivuye mu marushanwa yagiye yitabira akayatsinda n’amafaranga ahabwa iyo yatumiwe mu birori bitandukanye.

Aragira inama bagenzi be bafite ubumuga…

Nubwo hari abahura n’ubumuga bikabaca intege ndetse abenshi bakajya ku mihanda gusabiriza, Barayagwiza asanga ubumuga butakabaye intandaro yo kwishora mu ngeso mbi no kuba imburamukoro.

Ati “Kuba umuntu afite ubumuga ntibivuze ko ubuzima bwe buba burangiriye aho, haba hakiri ibyiringiro byo kuzabaho n’ejo hazaza. Abafite ubumuga bareke kwisuzugura no kwirirwa bazerere basabiriza, ahubwo bahurize hamwe imbaraga, bungurane ibitekerezo kuko abagiye inama Imana irabasanga.”

Nubwo Barayagwiza atunzwe n’ubuhanzi, avuga ko atarabona ubushobozi bwo kujyana ibihangano bye muri studio akaba afite impungenge ko hari abashobora kuzabyiyitirira.

[email protected]