Biteganyijwe ko iyi nama ibera muri Kigali Serena Hotel, igatangira kuri uyu wa Mbere tariki 4 Werurwe 2019 ikazasozwa ku wa Gatatu.

Umuhanzi Moses Ssali uzwi nka Bebe Cool ari mu batumiwe muri iyi nama akazanatanga ikiganiro nk’uko byatangajwe n’ikinyamakuru Uganda Showbiz.

Azavuga mu mwanya w’abahanzi n’ibindi byamamare bifite intego yo kurandura uburwayi bw’igituntu.

Uyu mugabo mu mwaka ushize yahawe inshingano zo kwamamaza ingaruka z’indwara y’igituntu n’uko abantu bayirinda muri Uganda.

Mu mwaka ushize yitabiriye inama nk’iyi ku rwego rw’Umuryango w’Abibumbye i New York muri Leta Zunze Ubumwe za Amerika.

Indwara y’igituntu ni imwe mu zandura mu buryo bwihuse kandi zica.

OMS yatangaje ko mu 2017 abantu basaga miliyoni 10 bari barwaye igituntu harimo abagabo miliyoni 5,8; abagore miliyoni 3,2 n’abana miliyoni imwe. Gusa 64% nibo cyagaragayeho bivuze ko 36% kitababagaragayeho. Icyo gihe miliyoni 1,3 cyarabishe.

Buri minsi nibura igituntu cyica abantu 4384 nyamara mu bakirwaye, 78% ntibivuza kandi ari indwara ivurwa igakira. Isi itanga amadolari asaga miliyoni ibihumbi 16,7 ku mwaka mu kwita ku bakirwaye.

Bebe Cool yaheruka mu Rwanda mu mwaka ushize ubwo yari yatumiwe mu gitaramo cya Kigali Jazz Junction aho yafatanyije n’umunyafurika y’Epfo, Ringo.

Bebe Cool aratanga ikiganiro mu nama ikomeye ibera i Kigali