Mu ijoro ryakeye nibwo hamenyekanye amazina ndakuka y’abahatanira Big Brother Africa bafite ibyago byo kuvamo bamwe bazasezererwa mu mpera z’iki cyumweru, mu bahamagawe harimo abahagarariye u Rwanda ,Frankie Joe na Nkusi Arthur.

Habanje guhamagarwa amazina y’abashyizwe muri iki cyiciro na bagenzi babo mu matora yakozwe mu ijoro ryo ku Cyumweru. Amatora agikorwa Nkusi Arthur yahise aboneka ku rutonde rw’abashobora kuzasezererwa.

Mu ijoro ryo kuri uyu wa Mbere hemejwe amazina ndakuka y’abazatoranywamo abasezererwa aribo: Nkusi Arthur(Rwanda), Kacey(Ghana ), Luis(Namibia ), Mr.265(Malawi ),Macky2(Zambia ) na Sheillah(Botswana).

Iyo hamaze kumenyekana abahatana bashyizwe muri iki cyiciro na bagenzi babo, Head Of House(HOH) ahita ahabwa umwanya wo kongeramo undi ashaka. JJ wo muri Zimbabwe ari na we HOH iki cyumweru yahise ashyira Frankie Joe mu bafite ibyago byo gusezererwa nyamara yari yagize amahirwe yo kubona ubudahangarwa kubera itsinda rye ryari ryabaye irya mbere muri Extravaganza show y’icyumweru gishize.

Nyuma yo kongeramo Frankie Joe, Biggie yemeje ko abahatana bafite ibyago byo gusezererwa ari: , Arthur, Frankie, Kacey,Luis, Mr.265, Macky na Sheillah.

Gutora byahise bitangira , ubuyobozi bwa BBA burashishikariza ibihugu byose bifite abantu bashyizwe muri iki cyiciro kubatora bakoresheje uburyo butandukanye SMS, internet ndetse na Wechat.

Abanyarwanda bose barashishikarizwa guha amahirwe Frankie Joe na Arthur kugira ngo bagume mu irushanwa. Bari mu cyiciro gikomeye ndetse bashobora kuzasezerwa ku Cyumweru nibadatorwa cyane. Kugira ngo ubahe amahirwe ukoresha uburyo butandukanye bwo gutora aribwo SMS, internet ndetse na Wechat.

Gutora ukoresheje Wechat ni ubuntu ndetse ukemerwa gutora inshuro 100 mu Cyumweru naho kuri SMS ujya ahandikirwa ubutumwa muri telefone yawe ukandika ijambo “vote” ugakurikizaho izina ry’uwo ushaka gutora ubundi ukohereza kuri 1616 kuri sosiyete iyo ari yo yose yaba Tigo, MTN na Airtel.

Gutora ukoresheje ubutumwa bugufi ni amafaranga 50 kuri sosiyete zose ndetse by’umwihariko gutora binyuze kuri Internet ubasha gutanga amahirwe inshuro ijana zose ku munsi.

Ku bifuza gutora bakoresheje internet, bikorerwa ku rubuga rwa DSTV. Kugirango ugere kuri urwo rubuga kanda HANO, hanyuma urebe urutonde rw’abakeneye amahirwe yawe, hanyuma uhitemo Frankie Joe, uri hasi ku ruhande rw’ibumoso.