Filime yitwa ‘Black Belgian’ yakozwe na Habyarimana Jean Luc uri mu bazwi cyane muri sinema mu Rwanda iri mu zatsindiye ibihembo bikomeye muri Festival du Cinéma Africain de Khouribga.

Iri serukiramuco ryari rimaze icyumweru ribera mu Ntara ya Khourigba muri Maroc, ryatangiye ku itariki ya 9 Nzeri, ryasojwe mu ijoro ryo kuri uyu wa 16 Nzeri 2017. Ibirori byitabiriwe n’abakinnyi bakomeye muri Afurika ndetse na bamwe mu bagize inzego z’ubutegetsi muri Maroc barimo Guverineri wa Khouribga, Mohamed Sabri.

Umusore witwa Prince Otika wakinnye muri ‘Black Belgian’ yayihesheje ikuzo ndetse ahabwa igihembo cyitwa ‘Best Support Actor’. Iyi filime yayobowe na Jean Luc Habyarimana umuhanga mu gutunganya no kuyobora filime.

Habyarimana Jean Luc umaze imyaka icumi muri sinema yabwiye IGIHE ko yanyuzwe bidasanzwe n’iki gihembo kuko ngo cyongereye agaciro gakomeye iyi filime ndetse ngo byamuteye izindi mbaraga no gukora byisumbuyeho agamije kuzamura urwego rwa sinema y’u Rwanda.

Yagize ati “Nza hano ntabwo nari nzi ko ari gutya bizagenda, ni ibintu bintunguye cyane kuba mbonye igikombe muri iri serukiramuco, ryari ririmo abantu bakomeye kandi bafite ubuhanga, kuba filime yo mu Rwanda yabashije gutsinda ni ibintu byiza cyane haba kuri njye wayikoze no kuri sinema yose y’igihugu muri rusange.”

‘Un Jour pour les femmes’ yakozwe na Kamla Abu Zekria wo mu Misiri yagizwe filime yahize izindi mu bihugu 14 byahatanye bya Afurika byahatanye uyu mwaka. Abu Zekria wari wasazwe n’ibyishimo yahawe igihembo cyitiriwe umwanditsi ‘Ousmane Sembene’ wo muri Senegal, yanahawe ibahasha irimo amadolari 5000.

Alain Gomis umufaransa ukomoka muri Senegal wakoze filime yitwa ‘Félicité’ yahawe igihembo cya filime nziza yashimwe n’abagize akanama nkemurampaka [Prix spécial du jury].

Mu bari bagize akanama nkemurampaka harimo umwanditsi Abdellatif Lâabi, umukinnyi wa filime Rokhayaa Niang, umuhanzi w’umushushanyi Zoulikha Bouabdellah wo muri Algérie, umukinnyi wa filime Sonia Oukacha, umuhanzi Ray Lema, Pedro Pimenta na mugenzi we Nico Simon ndetse na Perezida wa Europa Cinemas-Luxembourg.

Jean Luc yishimiye iki gihembo filime ye yahawe

Umuhanga mu bya sinema Licinio Azevedo yahawe ibihembo bibiri birimo icy’uwahize abandi mu kuyobora filime ku bw’iyo yakoze yitwa ‘Le train de sucre et de sel’ ndetse n’icya Meilleur scenario.

Iyi filime yahawe igihembo cyitiriwe Sembene muri Festival du cinéma africain de Khouribga yatsinze ku bw’ubutumwa bwihariye yifitemo mu kuvuganira igitsinagore mu Misiri no kwamagana ihohoterwa rishingiye ku gitsina rikorerwa abagore.

Abakobwa bari bayoboye ibirori

Umuyobozi w'akanama nkemurampaka

Jean Luc Habyarimana wakoze filime 'Black Belgian'

Prince Otika wakinnye muri ‘Black Belgian’ yamuhesheje igihembo muri Maroc

Prince Otika na Kwezi ni bo bafashe iki gihembo

Nour-Eddine SAIL uyobora umuryango utegura iri serukiramuco

Mazimpaka Kennedy se wa Nkusi Arthur yari muri ibi birori

Alain Gomis umufaransa ukomoka muri Senegal wakoze filime yitwa ‘Félicité’ yahawe igihembo cya filime nziza yashimwe n’abagize akanama nkemurampaka

Alain Gomis yahawe ibihembo bibiri

Guverineri wa Khouribga Mohamed Sabri ni we watanze igihembo nyamukuru

Licinio Azevedo yahawe igihembo gikuru cyitiriwe Sembene