Ku wa 08 Ugushyingo 2018 nibwo Burabyo Yvan uzwi nka Buravan, yatangajwe nk’uwatsindiye igihembo RFI Prix Découvertes 2018. Yahigitse abandi bahanzi batandukanye biganjemo abo muri Afurika.

Uwegukanye iki gihembo ahabwa amafaranga ibihumbi €10 akanafashwa gukora ibitaramo mu bihugu bitandukanye byo muri Afurika agasozera i Paris mu Bufaransa.

Kuri uyu wa Kabiri, Yvan Buravan yatangaje gahunda y’ibitaramo bizenguruka ibihugu bitandukanye byo muri Afurika.

Guhera mu mpera za Gashyantare kugera mu mpera za Werurwe uyu musore w’imyaka 23 azaba yogoga ibirere bitandukanye by’ibihugu bya Afurika ajya gutaramira abahatuye.

Azataramira mu bihugu 12 bivuga ururimi rw’Igifaransa, abitangire tariki 20 Gashyantare abisoze tariki 23 Werurwe 2019.

Azahera i Bamako muri Mali, tariki 22 Gashyantare azaba ari Cotonou muri Benin, nyuma y’umunsi umwe tariki 23 Gashyantare 2019 azataramira Lome muri Togo.

Azafata ikiruhuko cy’iminsi ine ubundi akomereze mu Mujyi wa N’djamena muri Tchad tariki 27 Gashyantare 2019, tariki 2 Werurwe azataramira muri Niger mu Mujyi wa Niamey, tariki 6 Werurwe 2019 ajye muri Congo Brazaville igitaramo kibere ahitwa Institut Français du Congo, tariki 9 Werurwe azaba ari muri Guinée équatoriale mu mujyi wa Malabo, akomereze mu Mujyi wa Djibouti muri Djibouti tariki 12 Werurwe.

Tariki 15 Werurwe azataramira i Antananarivo muri Madagascar, tariki 20 Werurwe 2019 ajye Libreville muri Gabon, tariki 22 Werurwe azaririmbira abatuye Umujyi wa São Tomé asoreze mu Mujyi wa Luanda muri Angola.

Irushanwa rya Prix Découvertes, RFI, rimaze imyaka 37 gusa inshuro 32 nibwo hamaze gutangwa ibihembo. Ryatangiye mu 1981 ariko mu myaka irimo uwa 1983, 1985, 1986, 1987 ndetse 1989 nta bihembo byatanzwe.

Reba Si Belle, imwe mu ndirimbo Buravan iherutse gushyira hanze

Ibihugu 12 nibyo azakoreramo ibitaramo

Buravan agiye gutangira ibitaramo bizenguruka Afurika