Ku wa 08 Ugushyingo 2018 nibwo Buravan, yatangajwe nk’uwatsindiye igihembo Prix Découvertes RFI 2018, ahigitse abandi bahanzi biganjemo abo muri Afurika.

Uwegukanye iki gihembo ahabwa amafaranga ibihumbi €10 akanafashwa gukora ibitaramo mu bihugu bitandukanye byo muri Afurika agasozera i Paris mu Bufaransa.

Ibi bitaramo bizabera mu bihugu 12 binyuranye bya Afurika bigomba gutangira tariki ya 20 Gashyantare bikarangira tariki 23 Werurwe 2019.

Igitaramo cya mbere Buravan azagikorera muri Mali mu mujyi wa Bamako.

Mu ijoro ryo kuri uyu wa 16 Gashyantare 2019, uyu musore ari kumwe n’itsinda ry’abamucurangira, bahagarutse i Kigali berekeza i Bamako.

Buravan agiye kumara ukwezi kose akora ibitaramo mu bihugu bitandukanye nta kuruhuka.

Yerekeje muri Mali nyuma yo kuririmba mu iserukiramuco ryitiriwe amahoro ribera i Goma muri Repubulika Iharanira Demukarasi ya Congo.