Uyu muhanzi wo muri Nigeria uherutse gusohora album ya karindwi yise “I Told Them” ahataniye ibi bihembo mu byiciro birimo Hip-Hop Artiste of the Year, Best Live Performer, Lyricist of the Year na Hustler of the Year.

Ibi byiyongera ku bindi akesha indirimbo ye yise “Sittin’ On Top Of The World” yakoranye na 21 Savage yatumye Burna Boy ahatanira ibyiciro birimo Song of the Year, Best Collaboration na Best Hip-Hop Video.

Burnaboy w’imyaka 32 ni we muhanzi userukiye umugabane wa Afurika muri ibi bihembo nyuma ya Black Sherif (wo muri Ghana), Sampa The Great (wo muri Zambia) AKA na K.O (bo muri Afurika y’Epfo) bose bari mu cyiciro cya “Best international flow”.

Dj Khaled na we ahataniye ibihembo birindwi, J. Cole uherutse gukorana indirimbo na Burna Boy bise “Thanks” ahataniye bitandatu mu gihe Coi Leray, GloRilla na Jay-Z ari bitanu bakurikiwe na Lil Uzi Vert wa bine naho DaBaby, Kendrick Lamar, Latto, Lil Durk, Megan Thee Stallion Metro Boomin ni bitatu.

Burna Boy wiyita African Giant ni inshuro ya kabiri ahataniye ibi bihembo, nubwo inshuro ya mbere yabigiyemo mu 2022 bitamuhiriye.

Umwaka ushize umuhanzikazi Tems na we wo muri Nigeria yacanye umucyo muri ibi bihembo yegukana igihembo cya Best Collaboration of The Year akesha indirimbo "Wait for U" yahuriyemo n'abaraperi babiri Drake na Future.

Ibi bihembo bya BET Hip-Hop Awards 2023 bizatangwa ku wa 3 Ukwakira 2023 mu birori bizabera mu mujyi wa Atlanta bizaca kuri BET (Black Entertainment TV).

Ibi bihembo byatangiye gutangwa mu 2006 bigamije gushyigikira iterambere ry’umuziki w’ijyana ya Hip Hop dore ko kuri ubu hizihizwa imyaka 50 imaze ibayeho.

Umva “Sittin’ On Top Of The World” indirimbo ya Burna Boy na 21 Savage ihataniye ibihembo bitatu muri BET Hip Hop Awards