Uyu musore w’imyaka 36 wamamaye mu njyana ya R&B, yitabye urukiko rwa Southwark Crown Court i Londres ku wa 11 Nyakanga 2025.

Imbere y’urukiko, yahakanye ibyaha bibiri birimo icyo gukubita no gukomeretsa umuntu n’icyo gutunga intwaro itemewe mu ruhame.

Iyi ntwaro bivugwa ko ari icupa rya tequila ashinjwa kuba ari ryo yakoresheje akubita uwo mugabo wamureze.

Ibi byaje bikurikira iburanisha ryabaye muri Kamena 2025, aho Chris Brown yahakanye icyaha gikomeye kurusha ibindi, ari cyo kugerageza gukomeretsa bikabije umuntu.

Aregwa kuba yarakubise icupa mu mutwe Abraham Diaw usanzwe atunganya indirimbo, muri Gashyantare 2023 mu kabyiniro ka Tape gaherereye i Londres mu Bwongereza.

Biteganyijwe ko Chris Brown azasubira imbere y’urukiko tariki ya 26 Ukwakira 2025. Areganwa na Omololu Akinlolu, basanzwe baziranye, nawe wahakanye ibyo aregwa byose.

Chris Brown yari yafatiwe mu Mujyi wa Manchester muri Gicurasi 2025 ubwo yari yasubiye mu Bwongereza ku nshuro ya mbere kuva ibyo aregwa bibaye.

Yarekuwe by’agateganyo nyuma yo gutanga pasiporo ye no kwishyura ingurane ingana na miliyoni 6,7$.

Nyuma y’ifatwa rye, umwunganizi wa Diaw, Ryan J. Daneshrad, yemeje ko umukiliya we akomeje “gukoresha inzira zose z’amategeko kugira ngo ibyo Chris Brown yakoze abiryozwe.”

Impapuro z’urukiko TMZ yabonye muri Kamena zerekana ko Diaw yasabye umucamanza w'i Los Angeles muri Amerika, guhagarika ikirego yaregagamo uyu muhanzi yari yaratanze mu 2023. Gusa, ibyo ntibihagarika urubanza rw’i Londres.