Iki gitaramo cy’ivugabutumwa cyateguwe na Korali Ichthus Gloria, itsinda ry’abaririmbyi rikora ivugabutumwa muri Serivisi Mpuzamahanga mu Itorero rya ADEPR Nyarugenge.

Umushumba mu Itorero rya ADEPR, Pasiteri Cléophas Barore, ni we uzabwiriza muri iki gitaramo kizaba ari ubuntu kucyinjiramo. Ni gitaramo kizaba gitandukanye n’ibindi byinshi byabereye muri Camp Kigali kuko byose byishyuzwa.

Abateguye iki gitaramo bavuze ko icyatumye bakigira ubuntu ari mu rwego rwo kugeza ubutumwa bwiza ku bantu b’ingeri zose.

Mu myaka irenga 25 imaze mu ivugabutumwa, Korali Ichthus Gloria imaze gushyira hanze album z’indirimbo z’amajwi eshatu ari zo Saintete à l' Eternelle, Il se soucie de toi na Take Me Deeper.

Mu rugendo rwo kwagura ibikorwa by’ivugabutumwa n’umuziki, iyi korali yatangiye umushinga wagutse wo gushyira hanze n’ indirimbo z’amashusho. Kugeza ubu bamaze gushyira hanze indirimbo z’amashusho ebyiri ari zo “EL Roi na ‘I am’.

Gukoresha indimi mpuzamahanga zirimo Icyongereza, Igifaransa n’Igishwahili ni uburyo bwihariye iri tsinda rikoresha mu kugeza ubutumwa bwiza kuri benshi. Kugeza ubu Korali igizwe n’abanyamuryango 71 b’ingeri zitandukanye zirimo urubyiruko n’abakuze.

Muri iri tsinda kandi usangamo abahanga bazwi mu gihugu mu gutunganya umuziki nka producer Boris ndetse n’abatunganya amashusho nka Shalom Gabris n’abacuranzi bafite ubumenyi bakuye mu ishuri ry’umuziki rya Nyundo.

Ubuyobozi bw’iyi korali buvuga ko igihe cyari kigeze ngo iri tsinda rirenge imbibi zo gukorera mu rusengero gusa.

Ati“Uwiteka yakoze byinshi mu itsinda ryacu. Yaratwaguye mu buryo bwose none igihe ni iki kugira ngo impano Imana yaduhaye zikoreshwe kugeza ubutumwa bwiza mu mahanga. Iki ni cyo gihe cyo kurenga imbibi tukagera no ku mpande zose zitandukanye z’Isi.

Igitaramo ‘Free Indeed Worship Experience’ ni umwanya mwiza wo gutaramira ingeri zitandukanye z’abakunzi b’indirimbo zo kuramya Imana no kubamenyesha ko abo Yesu yabatuye babaturwa byuzuye.”

Muri iki gitaramo hazafatirwamo amashusho y’indirimbo nshya esheshatu zanditswe mu ndimi enye zirimo Icyongereza, Igifaransa, Igiswahili n’Ikinyarwanda.