Isaha y’igitaramo yageze mu cyumba cy’imyidagaduro cya Kaminuza y’u Rwanda ishami ry’i Huye, nta muntu n’umwe urinjiramo cyane ko abanyeshuri batari baguze amatike.

Abateguye iki gitaramo bigiriye inama yo kugikura ku mafaranga bagishyira ku buntu, nabwo abanyeshuri batarenze 18 baba aribo bagera aho cyagombaga kubera.

Umwe mu biga muri Kaminuza y’u Rwanda ishami ry’i Huye twaganiriye, yavuze ko ikibazo abateguye iki gitaramo bagize ari ukudakorana n’ubuyobozi bw’abanyeshuri.

Ati “Abateguye igitaramo ntabwo bigeze bakorana n’ubuyobozi bw’abanyeshuri, biragoye ko byagenda uko ubyifuza utakoranye n’abantu babana n’abanyeshuri umunsi ku wundi.”

Uyu munyeshuri yavuze ko urugero rwa hafi ari ukuntu igitaramo cya Isango Star cyagenze neza bitewe n’uko bo bakoranye n’ubuyobozi bw’abanyeshuri bukabafasha mu kumenyekanisha iki gikorwa.

Iki gitaramo cyari cyiswe ‘University Connect Festival’ kucyinjiramo byari byatangiye ari 3000 Frw nyuma baza kumanura igiciro kigirwa 1500 Frw icyakora nyuma y’uko kibuze abantu, byabaye ubuntu nabwo bakomeza kubura birangira igitaramo gihagaze.

Davis D na B Threy bavuye i Huye bataririmbye nyuma yo kubura abantu