Uyu muraperi w’imyaka 48 yatangaje ko uyu mwaka azakora urugendo ku Mugabane wa Afurika mu bihugu 12, agakorana indirimbo n’abahanzi baho batandukanye.

Ni umushinga mushya uyu muraperi yatangaje binyuze ku rubuga rwa TikTok mu butumwa bw’amashusho yafashe ari kumwe na Brett Berish, Umuyobozi wa Sovereign Brands, ikigo gikora ibinyobwa birimo Belaire.

Mu bahanzi Rick Ross na Brett Berish batangaje ko bazakora barimo Diamond Platnumz bakoranye ku ndirimbo “Waka Waka” yasohotse mu 2017.

Abandi barimo Stonebwoy wo muri Ghana, Asake na Yemi Alade bo muri Nigeria, Black Sherif na Nasty C bo muri Afurika y’Epfo.

Ntibatangaje abahanzi bose bazaba bari kuri uyu mushinga amazina yabo azagenda atangazwa mu bihe biri imbere.

Yagize “Turashaka gukora umushinga n’abahanzi ba Afurika tuzakorana n’abahanzi 12 indirimbo n’amashusho yayo ni umushinga ukomeye wibanda ku Mugabane wa Afurika , ndashaka kuza tukazamura ibendera , uru ni urugendo rwa Afurika.”

Muri iyi minsi ibigo bya muzika n’abahanzi bakomeye ku Isi bahanze amaso umuziki wa Afurika cyane cyane uwa Afrobeats na Amapiano ukomeje kwaguka ku buryo bukomeye.

Uretse Rick Ross, Usher utegerejwe mu gitaramo cya Super Bowl Half Time Show nawe yatangiye gushyira hanze indirimbo zigize album ye ya cyenda yise “Coming Home” iriho indirimbo yakoranye na Pheelz ndetse n’indi yakoranye na Burna Boy.

DJ Khaled nawe aherutse gutangaza ko ari gutegura album izaba iriho abahanzi nka Burna Boy na Tems.

Chris Brown aherutse gushyira hanze album yise 11:11 iriho indirimbo nka “Sensational” yakoranye na Davido ndetse na Lojay, hariho kandi indirimbo ‘Shooter’ yakomoye ku mukobwa wo muri Afurika y’Epfo witwa Naledi Aphiwe.

Kwaguka ku muzika wa Afurika byatumye ibihembo bikomeye ku Isi nka Grammys, MTV, na American Music Awards byongeramo icyiciro cy’abahanzi bo muri Afurika.

Umva "Waka Waka" indirimbo yahuje Diamond Platnumz na Rick Ross