Ibi bihembo bigiye gutangwa ku nshuro ya mbere bizatangira gutangwa ku wa 21 Ukwakira muri BK Arena ndetse bizaba biherekejwe n’ibindi bikorwa bizabera muri Camp Kigali kuva tariki 20 kugeza 22 Ukwakira mu gihe ibirori byo gusoza bizaba ku wa 23 Ukwakira 2023 muri BK Arena.

Diamond uheruka i Kigali mu mezi abiri ashize ni ubwa mbere agiye kuhagerana na Zuchu, umuhanzikazi abereye umuyobozi muri Wasafi (WCB) ndetse byavuzwe kenshi ko baba banakundana.

Zuchu na Diamond Platnumz kandi bahataniye igihembo kimwe na Bruce Melodie, bazaba basanze i Kigali, bahuriye mu cyiciro cy’umuhanzi witwaye neza muri Afurika y’Iburasirazuba.

Ni icyiciro kirimo Abanya-Kenya Nadia Mukani na Khaligraph Jones na Azawi uri mu bakobwa bagezweho muri Uganda.

Diamond, Zuchu na Juma Jux biyongereye ku bahanzi barenga 50 bazaririmba muri ibi birori hatangwa ibihembo ku bahanzi batahanye mu byiciro 26.

Abahanzi barenga 50 bazaririmba muri ibi birori barimo; Davido, Bruce Melodie, Bwiza, Chriss Eazy, Ariel Wayz, Benjamin Dube, Yemi Alade, Mr Eazi, Azawi, BNXN, Camidoh, K.O, Nomcebo Zikode , Levixone, Musa Keys, Nadia Mukami, n’abandi.

Abandi bahanzi bo mu Rwanda bazaririmba muri ibi birori bongewemo ni Sema Sole, Kivumbi King, Angell Mutoni, Boy Chopper na Mike Kayihura.

Abahanzi bari guhatana mu byiciro birenze kimwe barimo; Bruce Melodie, Burna Boy, Ayra Starr, Davido, WizKid, Tiwa Savage, Yemi Alade, Fireboy DML na Rema.

Ibi bihembo byahurije hamwe abahanzi bo mu bihugu bitandukanye birimo ibya Afurika, Amerika y’Amajyepfo, Ibirwa bya Caraïbes, u Burayi n’ibindi bikora ku Nyanja y’Abahinde.

Itike yo kujya mu bitaramo bizaherekeza iri serukiramuco no gutanga ibihembo ni 20.000 Frw, 25.000 Frw na 30.000 Frw.

Umuntu ufite ikarita ya BK Arena izaberamo ibi birori azagabanyirizwaho 25%. Abazagura amatike mbere kandi n’abanyeshuri na bo bazagabanyirizwa. Amatike ari kugurishwa binyuze kuri www.ticqet.rw.

Diamond Platnumz ni ubwa mbere agiye kugera i Kigali ari kumwe na Zuchu

Juma Jux na Diamond Platnumz baherutse guhurira mu ndirimbo 'Enjoy' iri mu zikunzwe muri iki gihe, bategerejwe i Kigali

Zuchu ni ubwa mbere agiye gutaramira i Kigali

Diamond na Zuchu bamaze iminsi bahurira mu bitaramo bya Wasafi Festival, bagiye guhurira i Kigali mu bya Trace Awards & Festival