Mauricio Padilla wunganira mu mategeko Dedrick Williams, umwe muri batatu bakekwaho kwica XXX Tentacion yatangaje ko atumva impamvu mu iburanisha batigeze bahamagaza Drake kandi na we hari aho ahurira n’ubu bwicanyi.

Uyu munyamategeko avuga ko Drake agomba kugira ibisobanuro atanga kuko yigeze gushyirwa mu majwi na nyakwigendera amushinja kugerageza kumuhitana.

Mu butumwa XXXTentacion yigeze kwandika kuri Instagram mu 2018 yavuze ko niba hari abantu bagerageza kumwivugana harimo Drake.

Gusa ubu butumwa yaje kubwihakana avuga ko konti ye yari yibwe ariko igitangaje ni uko mu mezi ane yakurikiyeho XXXTentacion yahise araswa agwa mu bitaro.

XXXTentacion yitabye Imana afite imyaka 20 aguye mu bitaro nyuma yo kurasirwa mu Majyepfo ya Florida ku wa 18 Kamena 2018 hafi yiduka ricuruza moto.

Mauricio Padilla avuga ko yagerageje guhamagara Drake mu mpera z’ukwezi gushize amusaba ibisobanuro kuri ibi ariko ntiyigize yitaba, bikaba byatumye yiyambaza amategeko kugira ngo yubahirize iki cyifuzo.

Kuri ubu Michael Usan, Umucamanza Mukuru w’Urukiko rwa Broward yategetse ko Drake ahamagazwa mu rukiko akazatanga ibisobanuro.

Biteganyijwe ko Drake azitaba urukiko tariki ya 24 na 27 Gashyantare 2023 gusa uyu muraperi ntazaba ahari ahubwo hazifashishwa ikoranabuhanga rya Zoom.

Uretse Drake uvugwa muri iyi dosiye, bikekwa ko n’Itsinda Migos ryaba rifite aho rihuriye n’ubu bwicanyi.

Umubyeyi wa XXXTentacion n’umwe mu basore bari inshuti ye mu iperereza ryakozwe na Mauricio Padilla batangaje ko uyu muraperi yapfuye anafitanye amakimbirane na Migos.

Drake agomba kwitaba urukiko mu mpera za Gashyantare 2023 agatanga amakuru ku byaha byo kwica Umuraperi mugenzi XXXTentacion

XXXTentacion yishwe afite imyaka 20 mu 2018

Drake yahamagajwe n'inkiko, asabwa gutanga ibisobanuro ku ruhare rwe mu rupfu rwa XXXTentacion

Bamwe mu bakekwaho kwica Umuraperi XXXTentacion