Ni ku nshuro ya kabiri u Rwanda ruserukiwe muri iri rushanwa mpuzamahanga ry’ubwiza. Mu mwaka ushize wa 2016 rwahagarariwe na Miss Mutesi Jolly, icyo gihe nta gihembo yatahanye.

Irushanwa rya Nyampinga w’Isi rigiye kumara ibyumweru bitatu ribera mu bice bitandukanye by’u Bushinwa, rizasozwa kuwa 18 Ugushyingo 2017. Miss World iri kuba ku nshuro ya 67 kuko umukobwa wa mbere witwa Kiki Håkansson yatowe mu1951.

Abakobwa bashakishwamo uzambikwa ikamba rya Nyampinga w’Isi bari bamaze iminsi mu Burasirazuba bw’u Bushinwa, bakoreye icyiciro cya mbere cy’irushanwa mu mijyi itandukanye ndetse mu mpera z’icyumweru gishize bari mu Ntara ya Anhui.

Elsa na bagenzi be bagiye i Sanya nyuma y’ibirori bitabiriye mu ijoro ryo ku Cyumweru tariki ya 5 Ugushyingo 2017. Mbere y’ibi birori bari babanje gukora indi myiyereko ya ‘Chimelong Parade’ yabereye mu mihanda ya Huangshan.

Miss World y’uyu mwaka igomba kumara ibyumweru bitatu, abakobwa batambagijwe mu mijyi inyuranye y’u Bushinwa Haikou, Huangshan , Shenzhen none ubu bari muri Sanya aho irushanwa rizasorezwa.