Iyi filime ikinamo umunyarwandakazi Elliane Umuhire yatangiye kwerekanwa guhera ku wa 27 Mata 2023 kugeza ku wa 1 Gicurasi 2023 mu nzu ya sinema ya Flagey i Bruxelles.

‘Bazigaga’ ni imwe muri filime 300 zavuye hirya no hino ku Isi ziri kwerekanwa muri iri serukiramuco ryatangiye ku wa 26 Mata 2023.

Iri serukiramuco rimaze imyaka 25 usibye kwerekana amafilime, ririmo ibikorwa bitandukanye, nk'amahugurwa, ibiganiro nyunguranabitekerezo, n'ibikorwa byo guhuza abikorera n’abashoramari.

Ibindi ni ibikorwa biha amahirwe abakinnyi ba filime bahuzwa n’abashinzwe sinema hirya no hino ku Isi mu kwiga ubumenyi bushya.

Muri iri serukiramuco hatangirwamo ibihembo birimo Grand Prix, The Best Belgian Short Film Award na Audience Award. Abatsinze batorwa n'itsinda ry'abagize akanama nkemurampaka n'abitabiriye ibirori.

Iyi filime yasohotse mu 2022 igaragaramo abakinnyi nka Umuhire Eliane, Ineza Roger, Ery Nzaramba na Aboudou Issam yanditswe inayoborwa na Jo Ingabire Moys.

Igaruka ku nkuru mpamo y’ibyabaye ubwo hakorwaga Jenoside yakorewe abatutsi mu 1994.

Ishingiye ku nkuru y’umupasiteri n’umukobwa we bahigwaga bukware n’interahamwe, biza kurangira bafashe icyemezo cyo kujya gusaba ubuhungiro ku mupfumu watinywaga kuri ako gasozi. Umupfumu yitwaga Bazigaga, ari na we witiriwe filime.

Muri uyu mwaka yahataniye ibihembo bya ‘The British Academy Film Awards’.

Elliane Umuhire ukina muri iyi filime mu ntangiriro z’uyu mwaka biturutse kuri iyi filime yegukanye Igihembo cy’Umukinnyi wa Filime wahize abandi muri filime ngufi mu bihembo bitegurwa na Unifrance na France TV

Inshamake za filime ‘Bazigaga’