Filime yahesheje Joël Karekezi kuboneka ku rutonde rw’abahanga mu bya sinema bazashimirwa muri iri serukiramuco, yayise “The Mercy of the Jungle” yakinwemo abanyamwuga barimo na Nirere Shanel usanzwe abifatanya n’umuziki.
Iri serukiramuco rizamara iminsi ijya gusatira ibyumweru bibiri ribera i Toronto, rizatangira ku itariki ya 6 Nzeri rizasozwe ku itariki ya 16 Nzeri 2018.
Muri Toronto International Film Festival, hatoranyijwe filime 46 zakozwe n’abahanga babarirwa muri 50 baturutse mu bihugu 37. Kerri Craddock uyobora iri serukiramuco yavuze ko “izatoranyijwe zifite umwihariko n’ubutumwa mu nkuru zazo”.
Muri izi filime zose zizerekanwa, 29 muri zo zizashyigikirwa ndetse zizagezwe mu nguni zose z’Isi ku buryo inkuru zizikubiyemo zimenyekana byisumbuyeho. Izi filime, ziganjemo izakozwe n’abantu bo muri Aziya ndetse n’u Burayi bwo mu Burasirazuba; izigera kuri 26% zayobowe n’abagore.
Mu zizerekanwa harimo iyayobowe n’Umwongereza Adewale Akinnuoye-Agbaje yitwa “Farming” ivuga ku mwimukira wo muri Nigeria ugera mu Burayi agakorerwa irondaruhu ku buryo ubuzima bumubihira cyane mu mwaka wa 1980harimo kandi iya Joël Karekezi yitwa “The Mercy of the Jungle”, irimo abakinnyi b’abahanga cyane nka Stéphane Bak uri mu bahagaze neza urebye abakinnye muri izi filime zizerekanwa i Toronto.
Umunyakenyakazi witwa Wanuri Kahiu yakoze iyitwa “Rafiki” ivuganira byihariye abaryamana bahuje ibitsina mu gihe muri Kenya ibi bifatwa nk’umuziro.
Filime “The Mercy of the Jungle”, irimo Nirere Shanel ikubiyemo inkuru ishushanya urugendo rw’umusirikare w’u Rwanda [ukina witwa Xavier] watsinze urugamba nyuma akisanga mu ishyamba ryo muri Congo mu gice cyari cyuzuyemo abanzi.
Iyi filime imara iminota 90, yanditswe na Casey Schroen, Joel Karekezi ndetse na Aurélien Bodinaux. Ifatwa ry’amashusho n’imirimo yo kuyitunganya ryayobowe na Joel Karekezi.
‘The Mercy of the Jungle’ irimo abakinnyi Marc Zinga, Stéphane Bak, Ibrahim Ahmed Pino , Nirere Shanel , Kantarama Gahigiri n’abandi batandukanye.
TANGA IGITEKEREZO