Itorero ry’igihugu ‘Urukerereza’ rigiye kuzenguruka igihugu rishaka ababyinnyi bashya

Yanditswe na Nsengiyumva Emmy
Kuya 13 Ukwakira 2019 saa 02:06
Yasuwe :
0 0

Ababyinnyi beza kurusha abandi baturutse mu matorero yose yo mu Rwanda batoranywa buri myaka ibiri bakinjizwa mu itorero ry’igihugu “Urukerereza”.

Urukerereza ni itorero ry’igihugu riba rihuriwemo n’abahiga abandi mu kugira impano yo kubyina Kinyarwanda. Aba bakunze guhagararira igihugu ahantu hatandukanye ndetse bakanatarama mu birori bitandukanye.

Kuri ubu Minisiteri y’Umuco na Siporo igiye gutangira urugendo ruzazenguruka igihugu hashakishwa ababyinnyi bashya binjira mu itorero Urukerereza.

Aya marushanwa azajya aba iminsi ibiri muri buri ntara y’u Rwanda, azatangirira mu karere ka Musanze mu ntara y’Amyaruguru tariki 16-17 Ukwakira 2019, nyuma bazerekeza mu ntara y’Uburengerazuba mu karere ka Karongi tariki 18-19 Ukwakira 2019.

Bazakomereza mu ntara y’Amajyepfo mu karere ka Nyanza tariki 20-21 Ukwakira 2019, hakurikireho i Rwamagana mu ntara y’Iburasirazuba tariki 22-23 Ukwakira 2019.

Bazasoreza kuzenguruka Intara mu mujyi wa Kigali tariki 24-25 Ukwakira 2019 muri Petit Stade i Remera.

Gusoza aya marushanwa biteganyijwe tariki 2-4 Ugushyingo 2019 muri Petit Stade i Remera ubwo hazaba hatoranywa abinjira mu itorero ry’igihugu.

Intore Masamba, Impuguke, Umutoza w’itorero ndangamuco ry’igihugu"Urukerereza" akaba n’inararibonye mu muco n’ubuhanzi yabwiye IGIHE ko ari igikorwa bakora rimwe mu myaka ibiri.

Yavuze ko ababyinnyi baba basanzwe mu itorero Urukerereza nabo baba bemerewe kongera guhatana utsinze agahabwa amahirwe yo kujya mu itorero ry’Igihugu.

Yagize ati” Abafite impano bakwiye guhatana ari benshi, ni ishema ku mubyinnyi kuba yakwinjira mu itorero ry’igihugu. Uba umeze nk’umukinnyi wahamagawe mu ikipe y’igihugu. Ni amahirwe akomeye kuri buri wese ufite impano rero si igitekerezo cyiza kuyipfusha ubusa.”

Ibyiciro bizahatanirwamo ni; kubyina,Umuhamirizo w’intore n’abiyereka, Kuririmba, abakaraza, abazi gucuranga;inanga, icyembe,umuduri n’umwirongi.

Abazatsinda amarushanwa nibo bazahita binjizwa mu itorero Urukerereza ritozwa na Muyango, Mariya Yohana ndetse na Intore Masamba.

Hagiye gushakwa ababyinnyi bashya mu itorero Urukerereza
Intore Masamba, umuhanzi akaba umukozi wa MINISPOC, Inararibonye mu buhanzi akanaba umutoza w'Itorero ry'Igihugu
Itangazo rya MINISPOC rihamagara abashaka kwinjira mu 'Urukerereza' kwitabira amarushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza