Yabigarutseho mu butumwa yashyize ku mbuga nkoranyambaga, aho yasangije abamukurikira aya mashusho amaze umunsi umwe agiye hanze.

Yagize ati “Amashusho y’indirimbo yatumye ntongana n’umugabo wanjye yasohotse noneho. Muyarebe!”

Mu minsi ishize Marioo yahamije ko amashusho y’iyi ndirimbo yatinze kujya hanze kubera umugore we.

Bivugwa ko Paula Kajala atigeze yishimira bimwe mu bice by’ayo mashusho, cyane cyane aho Marioo agaragara yahuje urugwiro n’inkumi igaragara muri aya mashusho, bituma haba ifuhe ryatumye igihe cyo kuyashyira hanze kigizwa inyuma.

Nyuma y’iminsi yo kutumvikana, amashusho y’indirimbo “Njozi” yasohotse ku wa Mbere tariki 13 Ukwakira 2025, ndetse Element EleéeH yari muri Tanzania ku bw’iyi gahunda.

“Njozi” ni imwe mu mishinga yerekana ubufatanye bukomeje gukura hagati y’abahanzi b’u Rwanda n’abo muri Tanzania, by’umwihariko hagati ya Element Eleeeh na Marioo uri mu bahanzi bakunzwe cyane muri iki gihe.

Iyi ndirimbo mu buryo bw’amajwi yakozwe na Element EleéeH, ikaba imwe mu zigize album ya Marioo yise ‘The Godson’.

Element EleéeH na Marioo basohoye amashusho y'indirimbo ‘Njozi’ baherukaga guhuriramo

Uko Marioo yagaragaye muri iyi ndirimbo yahuje urugwiro n'iyi nkumi ntabwo byabanje kunyura Paula Kajala

Paula Kajala yivugiye ko amashusho y'iyi ndirimbo yari yatumye agirana ibibazo na Marioo

Paula Kajala yavuze ko amashusho y'indirimbo y'umugabo we na Element EleéeH yabanje gutuma batumvikana kubera inkumi zirimo