Ni igitaramo cyabaye kuri uyu wa Gatanu tariki ya 25 Ugushyingo 2022, muri BK Arena isanzwe yakira imikino itandukanye, inama ndetse n’ibitaramo bikomeye

Uwimana Aime bakunze kwita Bishobp bitewe no gufasha abahanzi baririmba indirimbo ziramya zikanahimbaza Imana mu Rwanda, yinjiye ku rubyiniro mu buryo budasanzwe maze yakirizwa amashyi y’urufaya n’abitabiriye iki gitaramo bari biganjemo urubyiruko rw’abasore n’inkumi b’i Kigali.

Ubwo yinjiraga ku rubyiniro yabajijwe n’umwe mu bagize itsinda ry’abaririmbyi bamufasha kuririmba impamvu yatumye yitabira mu rurimi mu kumusubiza aba akoze mu nganzo azamura indrimbo yitwa ngo “There is reasons” yungamo mu Kinyarwanda ati “yanyishyuriye imyenda yose niyo mpamvu tumushima.”

Yakomereje ku ndirimbo igira iti Haleluya Yesu Shimwa aho yahagurukije abari bitabiriye iki gitaramo. Yakomeje aririmba indirimbo igira iti “Nubwo bamboha” Niwowe womora” “Umunsi w’Urwibutso” na Ni mwiza ikoze mu njyana gakondo.

Mu minota 30 yamaze aririmba, Uwimana Aime yasorejeho ku Ndirimbo yari icuranze mu njyana y’Ikinimba, yasusurukije abitabiriye iki gitaramo cyane ko yanafashijwe n’ababyinnyi ba Kinyarwanda ndetse n’intore.

Ni igitaramo cyayobowe n’umuhanzikazi w’indirimbo zo kuramya no guhimbaza Imana, Agasaro Tracy wanyuzagamo agafasha abitabiriye kuryoherwa, yifashishije udukuru dusekeje ndetse n’indirimbo za Kinyarwanda.

Saa 8h45 nibwo ku rubyiniro hahamagawe umuhanzi w’Umunyafurika y’Epfo, Bishop Benjamin Dube, yakiranwa urugwiro n’ibyishimo bidasanzwe.

Benjamin Dube n’itsinda ry’abamufasha kuririmba nabo binjiranye imbaraga zidasanzwe ku rubyiniro ndetse yibutsa Abanyarwanda ko nubwo akuze ariko afite ijwi ry’umwimerere.

Mu ndirimbo yaririmbye zirimo “Jehovah Is your”, aho uyu muhanzi aba agaruka ku gukomera kw’Imana, “When I think About Jesus”, "Elshadai Medley", "Uvumule" n’izindi zitandukanye yamenyekanyemo.

Uyu mugabo w’imyaka 60 wari wongeye gutaramira Abanyarwanda kuko yaherukaga mu Rwanda muri Nyakanga 2019 yamaze iminota irenga 48 ku rubyiniro kandi ubona ko akinyotewe no gutaramira Abanyarwanda.

Ubusanzwe Benjamin Dube ni Umushumba w’Itorero High Praise Centre Church, umwanditsi w’indirimbo akanizitunganya, umuramyi, umwigisha akaba amaze imyaka irenga 36 akora uyu murimo wo kuririmba.

Iminota 90 ya Hillsong London ku rubyiniro yabaye nk’agatonyanga mu Nyanja

Hillsong London yari yagarutse mu Rwanda nyuma y’uko mu 2019 iganuje Abanyarwanda ku buhanga mu miririmbire ariko ikagenda batanyuzwe kuri iyi nshuro byari ibindi.

Nyuma y’uko Benjamin Dube asoje kuririmba, abakora ku buhanga bw’ibyuma b’iri tsinda bahise bakorana ibakwe batunganya ibyabo bagomba gukoreraho byatwaye iminota nka 15 ari nako Tracy afatanya n’abitabiriye gusuruka mu giye byari bitaratungana.

Bikimara gutunganya ibisabwa, saa Yine, abaririmbyi bagize iri tsinda bazamutse ku rubyiniro. Bahise bakora mu nganzo mu ndirimbo zitandukanye zirimo ’This Is Living’ iri mu ndirimbo zibyinitse ndetse Abanya-Kigali nabo bakiranye urugwiro.

Bamwe mu bagize iri tsinda baje mu Rwanda bagizwe n’abaririmbyi bane, abacurazi bane, ndetse n’abatekinisiye.

Bakomereje kuri Real Love, Jesus is, That’s The Power, Hosanna, I surrender, Oceans, None but Jesus, Everlasting, There is another in the fire, What a beautiful name is, Your Love is relentless n’izindi zinyuranye.

Iyi minota yashize abantu bakinyotewe no gukomeza kuva amajwi y’umwimerere y’abagize iri tsinda n’indirimbo zuje ubuhanga.

Amafoto y’ibihe byaranze iki gitaramo

Tracy ni we wayoboye iki gitaramo

Kuva mu ntangiriro z'iki gitaramo BK Arena yari yakubise yuzuye

Tracy yayoboye iki gitaramo akenyeye kinyarwanda

Uwimana Aime yanyuze abitabiriye iki gitaramo

Aime Uwimana yamaze urukumbuzi abakunzi be

Benjamin Dube yongeye gushimisha abakunzi b'umuziki we i Kigali

Benjamin Dube ni umwe mu bahanzi bo muri Afurika bafite izina mu muziki wo kuramya no guhimbaza Imana

Benjamin Dube aba agaragaza imbaraga zidasanzwe ku rubyiniro

Abakunzi b'umuziki we nabo bageze aho baramwikiriza mu mudiho ukomeye

Byari ibyishimo muri BK Arena

Buri wese yifuzaga gucyura amashusho y'urwibutso

Uwambaye ingofero na lunettes ni umwe mu bacuranzi ba Symphony Band wari wagiye kwihera ijisho iki gitaramo cyari mu byahuruje abakunda umuziki wo kuramya no guhimbaza Imana

Ubwo bari bahamagaye Hillsong London abantu banyuzwe

Habanje abareba niba ibyuma byabo bivuga neza

BK Arena yari yakubise yuzuye

Imbere y'imbaga yari ibategereje Hillsong London bataramiye abakunzi b'umuziki

Abacuranzi bo muri Hillsong London n'abaririmbyi babo nabo bari bakereye gushimisha abakunzi ba muzika

Cyari igitaramo gikomeye

Israel Mbonyi yitegereza uko nawe azaba akorera igitaramo muri iyi nyubako mu minsi iri imbere

Hillsong London baba bacuranga umuziki wa Live ukundwa n'abatari bake

Iminota 90 Hillsong London yamaze ku rubyiniro yabaye iyanga kuko abantu batayishize urukumbuzi

BK Arena ni uku byari byifashe

Ubwitabire bwari hejuru muri BK Arena

Ab'i Londre nabo baje gutwarwa barasirimba

Amafoto: Himbaza Pacifique