Iyi filime yiswe ‘Tuko-Life in Goma’ yakozwe ku bufatanye bukomeye bw’ikigo Goethe-Institut Kinshasa, Yole!Africa ndetse n’umuhanga mu bya sinema Umunyarwandakazi Amelia Umuhire.

Filime ‘Tuko-Life in Goma’ yerekanwe bwa mbere mu Rwanda ku mugoroba wo kuri uyu wa 27 Nyakanga 2017 mu birori byabereye mu kigo cy’Abadage cya Goethe Institute.

Yakozwe n’urubyiruko icumi rurimo Abanyarwanda n’andi bakomoka muri Congo mu gihe cy’ibyumweru bitatu bari bamaze mu Mujyi wa Goma bafata amahugurwa mu byo gukora filime z’uruhererekane zica kuri internet[web series].

Ubumenyi abakoze iyi filime bakoresheje babukomoye kuri Umuhire Amelia usanzwe aba mu Budage ari na we wari umwarimu w’ibanze watanze amahugurwa mu gihe cy’ibyumwer bitatu bamaze i Goma.

Umuhire Ameliia wayoboye abakoze iyi filime asanzwe ari umwanditsi akaba n’umuyobozi wa filime z’urukurikirane zica kuri internet, ni we wakoze iyitwa ’Polyglot’ yaciye ibintu mu Budage mu myaka ibiri ishize.

Utamuliza Elizabeth uri mu bahawe aya mahugurwa yavuze ko yungutse byinshi mu byerekeye gutunganya no kuyobora filime. Nubwo yari asanzwe afite ubumenyi mu bya sinema, ngo mu Mujyi wa Goma yahavanye ubumenyi bwisumbuye buzamufasha gukomeza kwagura umwuga we.

Yagize ati “Ku ruhande rwanjye nungutse ibintu byinshi, mu byo twakoraga nabaga ndi iruhande rwa Amelia igihe cyose, namuvanyeho byinshi […] hari bamwe batari bazi ukuntu filime zikorwa ariko basanzwe bayobora filime banafite ibitekerezo byavamo filime nziza ariko babura ubwo bumenyi.”

Yongeraho ati “Nabashije kunguka ubumenyi cyane cyane mu cyiciro cy’ibyo nize by’umwihariko mu byerekeranye gukoresha camera. Ubu mfite indi filime y’uruhererekane yanjye bwite ngiye gukora yitwa ‘Identity’ izaba ifite ibice bitanu[episodes], nzayerekaniramo ubuzima abakobwa bo mu Rwanda babayemo.”

Utamuliza yatangiye gukora filime mu mwaka wa 2010 ubwo yigaga mu mashuri yisumbuye, icyo gihe nibwo yakoze iyitwa ‘Nta heza h’Isi’ yamenyekanye mu Rwanda. Nyuma yafashe amasomo y’umwuga muri Kwetu Film Institute ahava akoze iyitwa ‘Akarwa’, hanyuma mu minsi mike ishize atoranywa mu Banyarwanda bagiye guhugurirwa i Goma banakorerayo filime ‘Tuko-Life in Goma’.

Umuhire Amelia wahuguye aba bantu bakoze iyi filime ati “Ni njye wayoboye aya mahugurwa mfatanyije na Goethe Institute, twakoze uyu mushinga turi abantu icumi dukora filime ifite ibice bitanu […] Ni bo banshatse, bambaza niba nabishobora ndabyemera turabikora.”

Yongeyeho ati “Uyu mushinga watekerejwe n’ikigo kiba i Kinshasa, ikindi kandi imishinga nk’iyi isanzwe ikorerwa i Kigali cyangwa mu yindi mirwa mikuru. Twahisemo rero kujya gukorera mu mujyi muto, ni nko mu buryo bwo gushaka uburyo bwo kujya ahandi hantu kugira ngo abantu babone ibitekerezo mu buryo bworoshye.”

Umuhire Amelia yavuze ko ubumenyi yasangije bagenzi be mu byumweru bitatu bamaranye i Goma yashimishijwe n’icyo bwabwaye ndetse yizeye ko mu minsi izaza bazakomeza kubukoresha mu kuzamura impano zabo muri sinema.

Reba kamwe mu duce tugize filime TUKO-Life in Goma