ArtRwanda- Ubuhanzi yitabiriwe n’urubyiruko rufite impano mu Kuririmba no kubyina, Ubugeni, Imideli, Ikinamico n’Urwenya, Filimi no Gufata Amafoto ndetse n’Ubusizi n’Ubuvanganzo.

Iri rushanwa ryatangiye muri Kanama 2018. Ku nshuro yaryo ya nshuro ya mbere ryageze mu ntara zose z’u Rwanda n’Umujyi wa Kigali ryitabirwa n’urubyiruko 2400 hatoranywamo 587.

Abahanzi 70 ni bo batoranyijwe bahabwa amahugurwa, bigishwa uburyo bakora imishinga yabateza imbere, babinyujije mu mpano zabo.

Mu gitondo cyo ku wa Gatandatu, ibirenge by’inshuti, abavandimwe n’ababyeyi b’abahatanaga byerekezaga muri KCC ahasorejwe irushanwa. Ni ibirori byarimo abahanzi n’inararibonye mu byiciro bitandukanye, abayobozi mu nzego zitandukanye za Leta n’iz’abigenga.

Umushyitsi Mukuru wari wabyitabiriye ni Madamu Jeannette Kagame, ari nawe muyobozi w’Ikirenga w’Umuryango wa Imbuto Foundation.

Icyumba cya KCC cyarimo abambaye imipira y’umweru n’iy’umukara yanditseho ‘Agura Impano Yawe’ nk’intero y’iri rushanwa. Hanze y’icyumba cyabereyemo irushanwa hamurikirwaga bimwe mu bihangano byakozwe n’abitabiriye ArtRwanda- Ubuhanzi, birimo amafoto, ibishushanyo n’ibibumbano.

Ku maso y’abari mu irushanwa bari bakeye,ubona ko mu gihe bari bamaranye bari barubatse ubuvandimwe.

Irushanwa ryabaye mu bice bibiri. Bamwe barushanyijwe mu masaha ya mbere ya saa sita, abandi bakomeza nyuma yaho.

Abacuranga nibo babanje kwerekana impano zabo. Hirwa Blaise abimburira abandi ku rubyiniro agaragaza ubuhanga bwe mu gucuranga Piano.

Yakurikiranye na Gashumba Néhémie na we wacuranze Piano ashyiramo indirimbo z’Abanyarwanda zitandukanye. Maniraguha Yves Bertin niwe wasoje iki cyiciro aho yagaragaje impano idasanzwe yo gucuranga akoresheje telefoni igezweho. Bose bakoreshaga igihe kitarenze iminota itatu.

Icyiciro cy’abakina ikinamico na film nicyo cyari gitahiwe. Abahatanaga batanze umusogongero ku mukino bahimbiye mu mwiherero bise “Ubu Si Ubuzima’ ugaragaza ingaruka zo kutaboneza urubyaro.

Igihozo Nsegiyumva niwe wabimburiye bagenzi be batanu muri iki cyiciro, yiyerekana mu mukino ugaragaza ko urugamba rwo kubohora igihugu rwarangiye, ubu urwo abantu bagomba kurwana ari urw’ubukene.

Umunyarwenya Ndaruhutse Merci ni umwe mu basekeje abantu bari aho barakumbagara. Yateye urwenya kuri minisiteri zo mu Rwanda avuga ko hari iyo asanga iburamo.

Ati “Dufite za Minisante, Minicom, Mineduc n’izindi ariko hari minisiteri idahari kandi ikenewe. Minibus ntayo dufite nasabaga ababishinzwe ko bayimpa nkayiyobora.”

Uwiringiyimana Patience umaze kumenyekana kubera igipupe cye kivuga nk’abantu bizwi nka “Ventriloquism” na we yasekeje abantu batunguwe no kubona agapupe yari acigatiye kavuga amagambo arimo ubwenge.

Ingabire Prisca na Uwumukiza Anuarite wanahize abandi muri iki cyiciro berekanya imikino igaruka ku ngaruka z’inda zitateganyijwe.

Icyiciro cy’Ubuvanganzo nicyo cyarushanijwemo ku nshuro ya gatatu, aho cyarimo abagera kuri bane barimo batatu bavuga imivugo n’umwe wanditse inkuru ishushanyije.

Bose ubutumwa bwabo bwibanze ku kibazo cy’inda zitateganyijwe mu bangavu. Ubuhanga bwabo mu gukoresha injyana, isubirajwi mu mivugo yabo byashimishaga abantu ku buryo byari bigoye kwemeza uwarushije undi.

Iki cyiciro cyakorewe mu ngata n’icy’abafata amafoto bahatanye ari batanu. Mu minota ibiri bahawe berekanaga amafoto bafashe mu bitandukanye, bakavuga n’icyo asabonuye.

Aba bakurikiranye na bagenzi babo bari mu gice cya film, aho berekanye ingufi bakoze.
Umwihariko wagaragaye ku cyiciro cy’indirimbo ahari hahatanye abahanzi barindwi. Cyagaragayemo ubufatanye n’urukundo kuko uwaririmbaga adashoboye gucuranga mugenzi we yamufashaga.

Ngabo Evode ni we wabimburiye abandi. Uyu we yari yifitiye gitari anicurangira, ijwi ry’uyu musore ryakoze ku mitima ya benshi bamuha amashyi y’urufaya. Iki cyiciro cyarimo abahanga ku buryo budasubirwaho!

Umukobwa witwa Uwayezu Epiphanie yatunguye abatari bake kubera ijwi rye ridasanzwe, aririmba mu buryo bw’amanota (musique classique).

Shyaka Jean Pierre wegukanye igihembo na Ishimwe Michel waririmbye anacuranga icyembe bashimishije abari aho ku buryo bugaragara.

Bageze ku cyiciro cy’abanyabugeni, abagize akanama nkempurampaka, basohotse bajya kureba ibihangano aho byari byateguwe.

Iterambere ry’ubuhanzi ryahawe umwihariko mu kiganiro

Nyuma y’igice cya mbere cy’irushanwa hakurikiyeho ikiganiro cyavugaga ku mbogamizi, amahirwe, n’ishoramari mu nganda ndangamuco.

Cyari kiyobowe na Regis Isheja, gitangwa na Minisitiri w’Ubucuruzi n’Inganda Soraya Hakuziyaremye; Umuyobozi mukuru w’Ikigo cy’Igihugu cy’Iterambere (RDB), Clare Akamanzi, umukinnyi wa filime Niyitegeka Gratien [Seburikoko] n’umuhanzi Tom Close.

Minisitiri Hakuziyaremye yavuze ko ubuhanzi butaratangira kugira uruhare mu bukungu bw’igihugu nk’uko n’ahandi bikorwa.

Yavuze ko bizagerwaho abahanzi bahuguwe, ubuhanzi bukigishwa mu mashuri, abahanzi bakamenya uburyo bamenyekanisha ibihangano byabo ku isoko mpuzamahanga na leta ikabifashisha mu bukangurambaga butandukanye.

Akamanzi yavuze ko u Rwanda rwiyemeje guteza imbere ubuhanzi rushyiraho amategeko arengera abahanzi n’ibihango byabo, ibikorwa remezo bitandukanye bibafasha n’ibindi.

Yavuze ku yindi mishinga irimo ikigo kizajya kigishirizwamo ibijyanye no gutunganya amajwi n’amashusho, icyo guteza imbere film, kubaka ahazajya hamurikirwa ibihangano bitandukanye n’ibindi.

Niyitegeka Gratien yagaragaje urugendo rutoroshye yanyuzemo, asaba abahanzi bakizamuka gukorana umuhate kandi bagashyira imbere umuco nyarwanda.

Ubu butumwa bwashimangiwe na Tom Close yifashishije urugero rw’uburyo yahuje ubuhanzi bwe n’amasomo y’ubuganga muri Kaminuza. Avuga uko yatangiye nta mikoro afite ariko bikaba ngombwa ko yigomwa kugira ngo impano ye igaragare.

Imishinga y’indashyikirwa yahawe rugari

Abanyempano bahatanye bamuritse imishinga yateguwe n’amatsinda atandatu nkuko ibyiciro byahatanwaga biri.

Itsinda rya mbere ry’Abaririmbyi n’Ababyinnyi ryamuritse umushinga ryise Edutain wo gutegura ibitaramo ariko bakanatanga ubutumwa. Muri uyu mushinga kandi harimo gushinga inzu itunganya indirimbo.

Umushinga wa kabiri ni uw’Abanyabugeni witwa Bose Art Center ugamije kwigisha urubyiruko ibijyanye n’ubugeni. Uwa gatatu ni uw’Abanyamideli wiswe Rwanda Fashion Center uzigisha urubyiruko kudoda no gushinga uruganda ruto rukora imyenda y’abagore n’abakobwa.

Itsinda ry’Ikinamico ryerekanye umushinga wo kwigisha amateka y’igihugu binyuze mu ikinamico n’urwenya. Itsinda rya film n’abafotora batanze umushinga wo gutunganya amashusho no gukora film.

Itsinda ry’Ubuvanganzo ryatanze umushinga wo kwandika integanyanyigisho mu mashuri y’incuke no kwandika ibitabo.

Impanuro za Madamu Jeannette Kagame

Madamu Jeannette Kagame yakebuye abahanzi, abibutsa ko kuba icyamamare no gukundwa muri rubanda bidasaba kugira imyitwarire idahwitse nk’uko byagiye bigaragara kuri bamwe.

Yagize ati “Abahanzi mufite inshingano ikomeye yo gukuraho imvugo y’uko buri muhanzi ashimisha abamukurikira, cyane cyane abahura n’imbaga nyamwinshi kandi henshi, hari imyitwarire runaka agomba kugira”.

“Abahanzi rero turi kumwe uyu munsi, babimazemo igihe, kuba tukibabona nk’ibirangirire ni uko hari imyitwarire bagize ituma bahagera.”

Madamu Jeannette Kagame yifashishije urugero rw’umuhanzi Tom Close, wize akaminuza mu buganga abifatanya no gukora umuziki, asaba abahanzi kudashingira ku mpano zabo gusa, ahubwo bakabifatanya n’indi mirimo mu biteza imbere birushijeho.

Yagize ati “Kwiga no kwiyungura ubumenyi ntibigira iherezo, niba uri umukinnyi mwiza, ntibikubuza kwiga ibindi ukeneye ngo ube umuhanzi wuzuye… ngira ngo mufite umwe muri mwe ari we Dr Tom Close, wubatse neza, wize ubuganga ariko ntibyanamubuza gukurikirana izindi mpano”.

Indashyikirwa zatashye zimwenyura

Umuntu umwe muri buri cyiciro, yahembwe amafaranga y’u Rwanda miliyoni imwe ndetse imishinga itatu ya mbere, buri wose uhabwa miliyoni 10 Frw.

Mu cyiciro cy’Ubugeni uwegukanye igihembo ni Muhawenimana Maximilien, mu cy’indirimbo n’Imbyino ni Shyaka Jean Pierre, mu cy’imideli ni Mukamurigo Jacqueline, mu cy’Ikinamico ni Umukiza Annuarite, mu cyo gufata Amafoto n’Amashusho ni Munezero Jean Chretien, naho mu cyo kuvuga Imivugo ni Maniraguha Carine uzwi nka Divine muri Filime ya Seburikoko.

Mu mishinga, uwa mbere watsinze ni uw’itsinda ry’Abanyamideli, batekereje umushinga bise Rwanda Fashion Art center, uzigisha urubyiruko ubudozi, rugashinga uruganda ruto rukora imyenda mu rwego rwo guteza imbere ibikorerwa mu Rwanda.

Uwa kabiri ni uw’itsinda ry’abakora ibijyanye no gufata amashusho n’amafoto witwa Reba Visual Limited, uzakora ibijyanye no gukora ubucuruzi mu bijyanye n’akazi kabo.

Abandi bahawe igihembo ni abo mu gice cy’Ubuvanganzo batanze umushinga wo kwandika ibitabo n’imfashanyigisho bizajya byifashishwa mu mashuri y’incuke.

Herekanwe amashusho y’ibihe by’ingenzi byaranze iri rushanwa

Gashumba Néhémie w'imyaka 25 yerekanye ubuhanga mu gucuranga Piano

Nsengiyumva Regis Igihozo yerekanye ubuhanga mu gukina ikinamico

Abakina ikinamico berekanye umukino uhambaye bise 'Ubu si ubuzima' wari ukubiyemo ubutumwa bwakoze benshi ku mutima

Kwizera Emmanuel wari mu cyiciro cy'abafotora asobanura amafoto 10 yamuritse

Nsengiyumva Regis Igihozo akina ikinamico. Ubuhanga bwe bwanyuze benshi

Umunyarwenya Ndaruhutse Merci [Fally] yagaragaje impano yifitemo yo gutebya no gusetsa abantu

Uwiringiyimana Patience afite ubuhanga mu gukora ubugeni bwo kuvugisha agapupe yise 'Golizo the Crazy'

Umuhoza Clément ni umuhanga mu nkuru zishushanyije

Umuhanzi Tom Close (ibumoso) aganira na mugenzi we Bruce Melody wari mu bagize akanama nkemurampaka mu marushanwa y'ibanze yanyuze mu gihugu hose

Maniraguha Carine uzwi nka Divine muri Filime ya Seburikoko yahembwe nk'uwitwaye neza mu Kuvuga Imivugo

Murigande Jaques uzwi nka Mighty Popo yari mu bagize akanama nkemurampaka ku munsi wa nyuma

Butera Alphonse Masamba [Massamba Intore] yarebye urubyiruko rw'abanyempano rwahawe amahirwe yo kwigaragaza

Umuyobozi wa Contact FM/TV, Rudatsimburwa Albert

Bisangwabagabo Sankara Salomon yize Ubugeni ku Nyundo ariko anifitemo impano yo kuririmba

Uwase Bukuru Christiane ni umuririmbyi uzamukanye ingoga

Micomyiza Felix yagaragaje impano yo kuririmba

Madamu Jeannette Kagame akurikiye uburyo urubyiruko rwerekanaga impano

Batandatu bahize abandi mu byiciro byose byahatanirwaga, bahembwe miliyoni y'amafaranga y'u Rwanda

Umushinga w'abanyempano bahanga imideli wahembwe miliyoni 10 Frw

Mariya Yohana ahemba Shyaka Jean Pierre wabaye uwa mbere mu baririmbyi

Buri tsinda ryahabwaga umwanya rigasobanurira Akanama Nkemurampaka umushinga uhize indi ugafasha kubona igishoro

Minisitiri w'Urubyiruko, Rosemary Mbabazi, yitegereza kimwe mu bihangano byamuritswe

Madamu Jeannette Kagame areba ibikorwa by'abahanzi batandukanye bitabiriye ArtRwanda-Ubuhanzi

Tom Close yasangije abakiri bato urugendo rwe mu muzika

Niyitegeka Gratien [Seburikoko] yatanze ikiganiro cyagarutse ku rugendo rwe mu gukina sinema

Arthur Nkusi ni umwe mu bari bayoboye ibi birori

Makeda Mahadeo yafatanyaga na Arthur Nkusi

Minisitiri w'Urubyiruko, Rosemary Mbabazi, yitegereza kimwe mu bihangano byamuritswe

Hari abasemuriraga abafite ubumuga...

Umuyobozi wa RDB, Clare Akamanzi, avuga ibikorwa na Guverinoma y'u Rwanda mu guteza imbere abahanzi

Minisitiri Soraya Hakuziyaremye

Uyu munsi wa nyuma wari witabiriwe n'abantu b'ingeri zose

Amafoto: Himbaza Pacifique