Iri serukiramuco ryabaga ku nshuro ya cyenda ryatangiye ku wa 14 kugeza ku wa 16 Nyakanga 2023, aho ryari rihuriyemo ibihugu 14.

Ibi bihugu birimo u Rwanda, u Burundi, Uganda, Kenya, u Burundi, Repubulika Iharanira Demokarasi ya Congo, Afurika y’Epfo, Nigeria, Espagne, u Bufaransa, u Buholandi, Sri Lanka, Brésil na Canada.

Hope Azeda watangije iri serukiramuco yashimiye abitabiriye uyu mwaka, abasezeranya ko umwaka utaha uzagarukana ibikubye kabiri ibyo babonye.

Yaboneyeho umwanya wo gutangaza itariki nshya iri serukiramuco rizaberaho mu 2024.

Ati “Ndabashimira cyane kuba mwitabiriye uko mungana uku, byanshimishije cyane. Ubutaha noneho muzabona ibirenze ibyo twabonye uyu mwaka, tuzahurire aha nanone tariki 19 kugeza kuri 21 Nyakanga 2024.”

Umunsi wa nyuma w’iri serukiramuco waranzwe n’imikino itandukanye yakinwe n’amatsinda atandatu.

Playwrights Play House yari yaturutse muri Uganda ni yo yabimburiye andi maserukiramuco binyuze mu mukino bise “Kawaida Nzuri”.

Bakurikiwe n’itsinda ryatojwe na Anderson Carvalho wo muri Brésil wahurije hamwe abasore n’inkumi bo mu Buholandi na Afurika y’Epfo. Iri tsinda ryishimiwe na benshi binyuze mu mukino bise "The Intimacy of the skin".

Ni umukino bakinnye bagaragaza ko nubwo abantu bagira ibara ry’uru ritandukanye ariko burya bagira ibyiyumvo bimwe , bashobora kugira uburibwe bumwe ndetse imibiri yabo ibabara kimwe.

Natacha Muziramakenga usanzwe ari umuhanzi w’imivugo akaba n’umukinnyi wa filime yaserukanye umukino yise “Méandres” ufite umuvugo watoranyijwe mu mivugo 10 ihataniye Igihembo Prix RFI Théâtre 2023.

Umukinnyi wa filime akaba n’umuhanzi w’imivugo, Dorothée Munyaneza, yaserukanye umukino yise “This is One of Them.”

Stages Theatre Group, Itsinda ryo muri Sri Lanka ryahuje imbaraga n’Abanyarwanda bakina umukino bise “Baby Steps a life time of tiny decision.”

Uyu munsi wasoje n’ababyinnyi bo muri Repubulika Iharanira Demokarasi ya Congo biyise “Street Dancers”.

Amafoto: Iturize Gisèle Marie Clémence