Iki ni igikorwa cyatangijwe n’umunyabugeni Kakizi Jemima kimaze iminsi itatu hamurikwa ibihangano by’ubugeni n’ibiganiro bihugura urubyiruko ruri hirya no hino mu mujyi wa Kigali, ku ngingo zitandukanye zihura n’ibibazo by’ubuzima bwo mu mutwe.

Nyuma yo kunyura muri African Leadership University, ku wa 22 Gashyantare 2023 uru rugendo ‘Gendana na njye’ rwakomereje kuri Maison de Jeunes Kimisagara aho yari aherutse kumurikira ibihangano by’ubugeni nabyo byibanda kuri iyi ngingo.

Muri iki kigo cy’urubyiruko hahuriye abagera kuri 200 baganirijwe ku ngaruka z’inda ziterwa abangavu ku buzima bwabo bwo mu mutwe.

Ni ingingo abitabiriye iki kiganiro baganirizweho n’abarimo Me Mugabo Sharif Yusuf usanzwe ari umunyamategeko, Anna Mapendo uganiriza abafite ibibazo by'ubuzima bwo mu mutwe (psychologists) , Ishimwe Alliance Stella na Kakizi Jemima wateguye iki gikorwa.

Mu kiganiro yahaye IGIHE, Kakizi Jemima yavuze ko iyo umwana atewe inda akiri muto ahura n’ihungabana rikomeye kubera inshingano aba agiye kugira kandi na we akiri umwana.

Ati “Njye nagiye nkora ku mishinga yibanda ku bana batewe inda bakiri bato ariko tukibanda ku buzima bw’imyororokere gusa tukirengagiza ko babana burya bagira ibibazo by’ihungabana.”

“Ikiganiro cy’uyu munsi cyibanze ku buzima bwo mu mutwe bw’abakobwa babyara bakiri bato, kuko mu bushakashati bwakozwe byagaragaje ko iyo abana batewe inda bakiri abangavu bagira ihungabana n’agahinda gakabije (Depression) kuko baba batangiye kugira inshingano bakiri bato kandi nabo bagikene kurerwa n’ababyeyi.”

Ku bufatanye na Minisiteri y’Urubyiruko n’Umuco n'ibindi bigo bitandukanye iki gikorwa kizakomeza muri Werurwe gikomereza mu zindi ntara muri nyuma yo guhura n’urubyiruko ruri hirya no hino mu mujyi wa Kigali.

Uyu munyabugeni avuga ko iki gikorwa gikomeje gutanga umusaruro kuki hari abataha basobanuriwe neza uko bakirinda ibi bibazo by’ubuzima bwo mu mutwe n’uko babyitwaramo baramutse bahuye nabyo cyangwa hari mugenzi wabo wahuye n’iki kibazo.

Ibigo by’urubyiruko n’amashuri iki gikorwa kizakomerezamo bizagenda bitangazwa binyuze ku mbuga nkoranyambaga z’uyu munyabugeni n’ahandi.

Amafoto : Tripus Photo