Igitaramo cyabereye mu marembo ya Stade Amahoro i Remera ku mugoroba wo kuri uyu wa Gatanu tariki ya 18 Kanama 2017. Ni ibirori byakurikiye umuhango ukomeye w’irahira rya Perezida Paul Kagame, nawo witabiriwe mu buryo bukomeye.

Iki gitaramo cyari cyahawe inyito ‘Kigali Intsinzi Concert’, cyateguwe n’Umujyi wa Kigali, cyarimo umudiho ukomeye ku ruhande rw’abakunda umuziki bari baje kwizihiza ibirori by’amateka kubera Perezida Kagame batoye wari warahiye ku masaha yabanjirije igitaramo.

Umuhanzi waciye imbere y’abafana wese yakoresheje CD bitandukanye n’ibindi bitaramo byari bimaze igihe kinini bitegurwa mu Rwanda aho bimenyerewe ko bacuranga mu buryo bwa live.

Mbere y’uko abahanzi baririmba, habanje kugwa imvura itari ifite imbaraga gusa hari imbeho ku bw’umuyaga uvanzemo ibitonyanga waba, yaje gucogora ahagana saa kumi n’ebyiri zirengaho iminota mike ari nabwo umuhanzi wa mbere yageze imbere y’abafana.

Igitaramo cyabaye mu mbeho ariko ntibyabujije abafana guhangana nayo babifashijwemo n’umuziki. Mbere y’uko abahanzi bahagera, Dj Bissosso na mushiki we babanje kuvanga imiziki mu buryo bwo gushyushya abafana ariko hari bamwe wasangaga batebeje amaboko mu mifu, abandi bakomanya amenyo kubera ubukonje bari bamaze igihe badahura nabwo i Kigali.

Ntibyatinze, ahagana saa kumi n’ebyiri n’igice abahanzi barimo Sgt Robert byahise aririmba ibintu birahinduka ku buryo abafana batangiye kujya mu bicu bishimira ko abahanzi bari bategereje bahageze. Uko MC Lion Imanzi yavugaga izina rya buri muhanzi uhageze, bakomaga mu mashyi abandi bakavuza induru zigaragaza ko bari baje biteguye kwishimana na buri wese.

Ibintu byahinduye isura ubwo Senderi International Hit n’ababyinnye be bahasesekaye. Nk’ibisanzwe Senderi yabwiye abari bitabiriye iki gitaramo ko yaherekeje ‘Perezida Kagame kuva agitangira kwiyamamaza kugeza atsinze ndetse no muri manda ikurikiye intero ni imwe’. Bose nk’abitsamuye bamugaragarije ko nabo bamutoye, kuva ubwo igitaramo gihindura isura.

Nyuma ya Senderi Hit haje abandi bahanzi Christopher, Dream Boys, Bruce Melody, Charlie na Nina, King James, Urban Boyz, Jay Polly, Riderman na Kitoko Bibarwa basanzwe bakorera umuziki mu Rwanda.

The Ben usanzwe akorera umuziki muri Leta Zunze Ubumwe za Amerika yashoje igitaramo. Yageze imbere y’abafana ababwira ko ‘ibyishimo yatewe n’intsinzi ya Perezida Kagame byatumye agaruka mu Rwanda’.

Yaririmbye indirimbo ze zikunzwe muri iki gihe by’umwihariko ageze ku yitwa ‘Nta cyadutanya’ yibukije abaje muri iki gitaramo ko “kugeza ubu nta cyatanya Abanyarwanda, tuzi aho twavuye, tuzi n’aho tugana”.

The Ben umaze iminsi mike agarutse mu Rwanda yaririmbye umwe mu bafana agwa igihumure

Nk’umwe mu baririmbye bahagaze neza mu Rwanda muri iyi minsi, The Ben yavuze ko manda ya gatatu Perezida Kagame agiye kuyobora ngo “n’umuziki ugomba kuzagera kure hashoboka, kuba byonyine abafana bangana gutya baje kureba igitaramo bisobanuye ko abahanzi dushyigikiwe.”

Ibirori byo kubyina intsinzi ya Perezida Paul Kagame byateguwe n’Umujyi wa Kigali byabaye bibangikanye n’ibindi nabyo byari birimo ibyishimo bisendereye byabereye muri Kigali Conference and Exhibition Village [hahoze hitwa Camp Kigali], hari na benshi mu bayobozi bakuru b’igihugu.

Ssgt Robert yaririmbye iziganjemo izivuga ubutwari bw'igisirikare cy'u Rwanda.Photo/Inyarwanda

Jay Polly yavuze ko abakora Hip Hop mu Rwanda bari inyuma ya Kagame

Dream Boyz yaririmbye benshi barishima

MC Lion Imanzi wari uyoboye iki gitaramo

Kitoko usanzwe aba mu Bwongereza yongeye kwiyereka abafana be

Kitoko hano yaririmbaga iyitwa 'Thank You Kagame'

Jay Polly, Khalifan na Urban Boyz bahuriye ku rubyiniro baririmba iyitwa Too Much

Riderman yagaragaje ko afite abafana benshi muri iki gitaramo

Bruce Melody ukunzwe mu yitwa 'Ikinya' yanaririmbye 'Ntidukina' yahimbye mu kwizihiza intsinzi

Abafana bari bakubise buzuye mu marembo ya Stade Amahoro.Photo/Inyarwanda

Bari bizihiwe cyane

The Ben ngo yizeye ko manda ya gatatu ya Perezida Kagame izanazamura umuziki