Ibi birori bihuza abakunzi b’umupira w’amaguru byabereye i Paris mu nyubako ya Châtelet Theater, rutahizamu wa Real Madrid yaserukanye uyu mwambaro usa n’uwa 2pac mu rwego rwo guha icyubahiro uyu muraperi wishwe kuwa 13 Nzeri 1996.

Imyambaro ya Benzema yarimo ishati y’umweru n’ikoti rya kositimu ry’umukara, hejuru hari (noué / Necktie) y’akagozi k’umukara mu ijosi ,hamwe n’amadarubindi y’ibirahuri bya zahabu, imyenda isa n’ imwe 2Pac yari yambaye mu birori bya American Music Awards byatangwaga ku nshuro ya 23.

Muri ibi birori 2Pac yahawe igihembo cy’umuraperi mwiza w’umwaka .

Ijambo yatanze icyo gihe uyu muraperi yavuze ko inzozi ze zibaye impamo ndetse abwira abandi kudacika intege kuko nabo igihe kizagera bakagera ku nzozi zabo.

Yagize ati "Mpagaze hano ku bandeba mwese mu menyeko inzozi ziba impamo. Inzozi zawe ufite zizaba impamo nudacika intege.’’

Benzema w’imyaka 34 nawe yabaye nk’ukoresha aya magambo avuga ko inzozi ze zabaye impamo.

Yagize ati “Izi ni inzozi zanjye zo mu bwana , urugendo rwanjye ntabwo rwari rworoshye , byari ibihe bigoranye cyane kuri njye n’umuryango kugira ngo mbe ndi aha uyu munsi. Bwa mbere kuri njye, nishimiye ibikorwa byanjye kandi ndacyakomeza.”

Uyu mukinnyi ukomoka mu Bufaransa mu 2017 ubwo yari mu kiganiro na Highsnobiety yavuze ko yakuze yumva umuziki wa Hiphop wiganjemo indirimbo za 2Pac cyane.

Karim Benzema yabaye umukinnyi wa mbere w’Umufaransa mu kinyejana cya 21 wegukanye Ballon d’or , uheruka ni Zinedine Zidane wayitsindiye mu 1998.

Mu kwisimira iki gihembo mu butumwa bumara amasaha 24 uyu mukinnyi yakoreshe indirimbo ya 2Pac ‘All Eyes On Me’, nyuma akurikizaho amashusho yakozwe n’abafana b’uyu muraperi bashimira Benzema ku gihembo yawe nk’umukinnyi uhiga abandi ku Isi.

Umva hano ’All Eyes on Me’ indirimbo ya 2pac yasohotse mu 1996 kuri album yitiriye iyi ndirimbo

Wari umunsi udasanzwe kuri Karim Benzema wahisemo guha icyubahiro, umuraperi 2Pac

Umuraperi 2Pac mu 1996 ubwo yari yitabiriye ibihembo bya American Music Awards

Karim Benzema mu ijoro yaherewemo igihembo cya Ballon D'or yambaye umwambaro usa n’uwa 2Pac yaserukanye ubwo yari yitabiye American Music Awards 1996 ahabwa igihembo cy'umuraperi mwiza w'umwaka