00:00:00 IGIHE NETWORK KN KINYARWANDA EN ENGLISH FR FRANCAIS

Ingabire Marie Immaculée wakunze kunenga Miss Rwanda yishimiye impinduka zakozwe mu irushanwa

Yanditswe na Nsengiyumva Emmy
Kuya 15 Gashyantare 2021 saa 09:18
Yasuwe :
0 0

Ingabire Marie Immaculée uzwi nk’impirimbanyi mu kurwanya ruswa n’akarengane akaba n’Umuyobozi wa Transparency International Rwanda, wakunze kunenga irushanwa rya Miss Rwanda yemeye ko hari impinduka zikomeye zakozwemo kandi zizagaragarira buri wese uzarikurikira uyu mwaka.

Ingabire yabigarutseho mu gihe amarushanwa ya Miss Rwanda 2021 yatangiye, ahari gushakishwa abakobwa bazahagararira intara zitandukanye n’Umujyi wa Kigali.

Mu kiganiro cyihariye yagiranye na IGIHE, uyu mubyeyi yavuze ko yishimiye uburyo muri uyu mwaka ibipimo by’uburebure byakuweho, Ikinyarwanda kigahabwa agaciro ndetse na buri mukobwa uzagera mu mwiherero hari icyo azungukira muri Miss Rwanda.

Yagize ati “Hari ibintu byinshi bari bakosoye, n’ubu barabikosoye ndanabizi ariko sinemerewe kubivuga sindi umuvugizi wa Miss Rwanda. Ariko niriba muzareba hazaba habayeho impinduka nziza.”

Uyu mubyeyi yavuze ko irushanwa rya Miss Rwanda ritangira atarirebaga cyane kuko yumvaga ko ari ibintu bishimisha abana b’abakobwa bakabyitabira.

Ingabire yakomeje avuga ko uko yumvaga ryashyushye mu bitangazamakuru na we yanyuzagamo akarihanga ijisho.

Avuga bimwe mu byo atemeranyaga n’ubuyobozi bwa Miss Rwanda, yagize ati “Ubwiza bwo simbwemera kuko buterwa n’ukureba. Iby’uburebure byo byabagamo n’ivangura kuko umuntu siwe wiremye.”

Ikindi Ingabire yavuze kitari gifite ireme ni ukwivuguruza gukomeye kwagaragaraga mu irushanwa. Aha yatanze urugero nk’aho abaritegura bavugaga ko bareba ku muco Nyarwanda ariko bagategeka abakobwa gukoresha indi z’amahanga.

Ati “Ni rya kopera, baragiye bazana ibintu by’iyo mu mahanga babitereka mu Rwanda. Biratangira noneho bitera abana imitima mibi. Iyo ubonye rero ikintu gitangiye gutera abantu kunungunika uhindura imikorere cyangwa ukakireka.”

Ingabire avuga ko we icyo yaharaniraga ubwo yasabaga impinduka muri Miss Rwanda ari uguteza imbere umwana w’umukobwa waryitabiriye aho ava akagera.

Avuga ko yishimiye ko buri mukobwa wese uzitabira Miss Rwanda 2021, akabasha kugera mu mwiherero azagira icyo yungukiramo kandi cyamuteza imbere.

Ati “Nagira ngo nibura n’uzavamo wese azavuge ati hari ikintu nakuye muri iri rushanwa, aho kugira ngo mu bana bose 20 babashije kujya mu mwiherero hahembwemo umwe rukumbi. Buri wese witabiriye agomba kugira icyo ahakura.”

Ibi Ingabire abigarutseho mu gihe irushanwa rya 2021 ririmbanyije, abakobwa bakomeje guhatanira imyanya y’abazahagararira intara zose z’u Rwanda n’Umujyi wa Kigali.

Irushanwa rirarimbanyije

Ibikorwa by’amajonjora y’ibanze byatangiye tariki 9 Gashyantare bizarangira ku wa 18 Gashyantare 2021.

Kuva ku wa 19 Gashyantare, abategura bazatangira kwerekana abahagarariye intara zitandukanye bazaba batsinze amajonjora y’ibanze.

Gutora kuri murandasi na SMS bizatangira ku ya 22 Gashyantare kugira ngo hamenyekane abazaba batsindiye imyanya ya mbere 20.

Abahatana bazinjira mu muhezo ku ya 3 Werurwe mu gihe ‘pre-selection’ yo gutoranya izaba ku ya 6 Werurwe.

Abahatana 20 ba mbere bazagera mu cyiciro cya nyuma, bazajya mu mwiherero uzatangira ku ya 6 Werurwe kugeza ku ya 20 Werurwe, ubwo hazaba ari ku munsi wa nyuma w’irushanwa.

Gusoza irushanwa bizabera muri Kigali Arena mu birori bizatambuka kuri Televiziyo y’u Rwanda.

Ikiganiro na Ingabire Marie Immaculée

Mu 2020, Ingabire yagize umwanya wo kuganira n'abakobwa bari bitabiriye irushanwa rya Miss Rwanda
Yavuze ko yishimiye uburyo muri uyu mwaka ibipimo by’uburebure byakuweho, Ikinyarwanda kigahabwa agaciro ndetse na buri mukobwa uzabasha kugera mu mwiherero byibuza akaba hari icyo azungukira muri Miss Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .