Bisesero ni agace kari gatuwemo n’Abatutsi benshi bivugwa ko bageraga ku 60 000, mu gihe cya Jenoside habereye amateka yo kwirwanaho bikomeye ku buryo bagejeje muri Gicurasi 1994 abicanyi batarabasha kubameneramo.

Abatutsi barwanaga bari bayobowe n’uwitwaga Birara Aminadab.

Iyi filime yiswe “Bisesero: A Daughter’s Story” izagaruka ku nkuru mpamo y’umukobwa wa Birara Aminadabu wifatanije na se mu rugamba rwo kurwanya Interahamwe zageragezaga kubatsemba.

Ni umushinga uzahuriramo abakinnyi ba filime nka Tracy Kababiito wo muri Uganda, Wale Ojo, Umwongereza ufite inkomoko muri Nigeria, Isabelle Kabano umunyarwandakazi ukina filime n’abandi.

Wale Ojo wakinnye muri filime nka The CEO, na The Foundation, azakina mu mwanya wa Aminadab Birara.

Tracy Kababiito wakinnye muri filime zirimo Sanyu (2020) na African Folktales Reimagined (2023) azakina ari Epiphanie, umukobwa wa Aminadab Birara.

Iyi filime izaba iyobowe na Richard Hall wakoze filime “The 600: A Soldiers’ Story”, Joël Karekezi wakoze “The Mercy Of The Jungle”, Ema Edosio-Deelen Umunya-Nigeria wakoze filime zirimo “Kasala” na Yvette Nyombayire Rugasaguhunga, Umunyarwandakazi warokotse Jenoside yakorewe Abatutsi afite imyaka 14.

Richard Hall avuga ko iki filime isobanuye byinshi kuri we ndetse izerekana byinshi byirengagijwe na Hollywood.

Ati “Iyi ni filime, ni ikintu cyihariye kuri njye kuko umugore wanjye yarokokeye i Kibungo, mu Burasirazuba bw’u Rwanda, aho abaturage b’Abatutsi na bo bicwaga. Hollywood yirengagije iyi nkuru hamwe n’intwari zahimbwe no kubogamira ku bikorwa byo mu Burengerazuba bw’Isi. Ni ngombwa ko umuryango wa Afurika ubasha kuvuga iyi nkuru mu buryo nyabwo.”

Kugeza ubu Richard Hall yatangiye ibiganiro n’ikigo cyitwa Slated kiyobowe na Ann Nguyen gitera inkunga imishinga imwe n’imwe igaruka kuri sinema muri Leta Zunze Ubumwe za Amerika.

Uko Abatutsi birwanyeho mu Bisesero

Ku wa 7 Mata 1994 inkuru imaze kumenyekana ko Habyarimana yapfuye, mu duce tumwe twa Kibuye na Gikongoro Abatutsi baho batangiye kwicwa bahungira mu Bisesero.

Ntibyatinze, abari batuye mu Bisesero na bo byabaye ngombwa ko bava mu ngo zabo bahungira mu misozi ya Muyira na Gitwe.

Abandi batutsi bahahungiraga ni ababaga bacitse ku icumu mu bindi bice baturutse za Mubuga kuri Kiliziya, Rwamatamu, Gitwa, mu Mujyi wa Kibuye, Rutsiro, Kayove n’ahandi.

Mu Bisesero bahabaye igihe kinini bahangana n’ibitero by’abicanyi bakabitsimbura ndetse bakicamo benshi bakanabambura imbunda nubwo batari bazi kuzikoresha ngo zibe zabafasha kwirwanaho.

Amateka yabo mu butwari bwo kwirwanaho yarakomeje igihe kinini, barwana n’abicanyi bafite intwaro zitandukanye zirimo imbunda bo bakoresha inkoni, amabuye, amacumu n’imiheto.

Richard Hall uzayobora iyi filime avuga ko iyi filime isobanuye byinshi kuri we ndetse izerekana byinshi byirengagijwe na Hollywood

Nyombayire Rugasaguhunga Yvette ni umwe mu bazagira uruhare kuri iyi filime

Joël Karekezi wakoze “The Mercy Of The Jungle” ni umwe mu bazaba bayoboye umushinga w'iyi filime

Umukinnyi wa filime Tracy Kababiito azakina ari Epiphanie ari umukobwa wa Aminadab Birara

Umunyarwandakazi Isabelle Kabano uzakina muri iyi filime yakinnye muri ‘Petity Pays’ yitwa Yvonne

Wale Ojo wakinnye muri filime nka The CEO, na The Foundation, azakina mu mwanya wa Aminadabu Birara wabashije kuyobora bagenzi be bahigwaga muri Jenoside yakorerwaga Abatutsi mu Bisesero bagahashya Interahamwe zabateraga