Ibi birori byabaye nyuma y’indi myiyereko ya ‘Chimelong Parade’ iherutse kubera muri aka gace. Uko ari 130, buri mukobwa yiyerekanye mu mwambaro ugaragaza akarango k’umuco we mu bijyanye no kurimba hanyuma bazenguruka mu mihanda ya Huangshan.

Abakobwa bamaze iminsi bakora imyitozo bitegura ijoro ryo kuzambika ikamba Nyampinga w’Isi w’umwaka wa 2017, bakoze ibikorwa byo gufasha abatishoboye, berekanye imbyino gakondo zo mu bihugu byose 130 byitabiriye irushanwa, basuye ibice bibitse amateka akomeye mu Bushinwa nk’inzu ndangamurage ya Wensli Silk Museum, iyitwa Huizhou Carving Museum n’utundi duce tuzwi muri Huangshan ari naho bari muri iki gihe.

Mu gutangiza ibirori bifungura icyumweru cy’imideli cya IBC Fashion Week, Miss Iradukunda Elsa n’abakobwa bagenzi be bahataniye ikamba rya Nyampinga w’Isi babyitabiriye ndetse buri wese yari yambaye mu buryo butuma agaragara neza nk’uwambariye ibirori.

Mu birori bya IBC fashion party aba bakobwa bagiranye ibiganiro na Televiziyo zikomeye mu Bushinwa, babajijwe ibibazo bijyanye n’ubumenyi rusange, ubuzima, ubukungu n’izindi ngingo by’umwihariko zibanda ku iterambere ry’umugore mu nguni zose z’Isi.

Imyiyereko ya ‘Chimelong Parade’ iheruka kuba abakobwa biyerekanye mu myambaro gakondo y’ibihugu byabo, Iradukunda waserukiye u Rwanda we yari yambaye umukenyero. Abakobwa biyerekanye bagabanyije mu matsinda hashingiwe ku migabane Amerika y’Epfo n’iya Ruguru, u Burayi, Oceania na Aziya ndetse na Afurika.

Ubu aba bakobwa bajyanywe muri Huangshan (Yellow Mountain) mu Ntara ya Anhui mu Burasirazuba bw’u Bushinwa, aha ni naho habereye ibirori byo gufungura ku mugaragaro Miss World 2017 byabaye mu mpera z’icyumweru gishize.

Ubu bari mu mirimo ya nyuma yo gusoza icyiciro cya mbere cy’irushanwa ubundi bagahita berekeza mu Mujyi wa Sanya ari naho irushanwa rizasorezwa. Muri Sanya bazagerayo ku itariki ya 14 Ugushyingo 2017.