Irushanwa rya Miss Supranational 2020 ryagombaga kwitabirwa n’u Rwanda ryasubitswe

Yanditswe na Uwiduhaye Theos
Kuya 31 Nyakanga 2020 saa 09:22
Yasuwe :
0 0

Ubuyobozi bw’irushanwa rya Miss Supranational ryari kuzitabirwa n’ibihugu birimo n’u Rwanda bwatangaje ko iri rushanwa hamwe n’irya Mister Supranational yose yasubitswe kubera ibihe bidasanzwe Isi irimo by’icyorezo cya Covid19.

Umuyobozi wa Miss & Mister Supranational Organization Gerhard Parzutka von Lipinski, yavuze ko aya marushanwa yombi yari ateganyijwe mu Ukuboza yimuriwe mu 2021.

Ati “Gukora amarushanwa mu gihe Isi yugarijwe n’icyorezo ntabwo byigeze biba amahitamo kuri twe. Icyo dushyize imbere ni ubuzima bwiza no kubaho neza kw’abahatana muri buri rushanwa ryacu gusa ntabwo cyari icyemezo cyoroshye gufata.”

Yakomeje avuga ko bagiye kuvugana n’abategura iri rushanwa mu bihugu bitandukanye bagashyiraho amatariki yo gutegura abakobwa bazitabira iri rushanwa mu 2021.

Ati “Ndababwiza ukuri ko tuzagarukana imbaraga mu gihe tuzaba twizeye ko byoroshye kuva mu gihugu ujya mu kindi kandi igihugu kigomba kwakira irushanwa kikaba gitekanye.”

Yakomeje avuga ko Umunya-Thailand ufite ikamba rya Miss Supranational , Anntonia Porsild, n’Umunyamerika Nate Crnkovich ufite irya Mister Supranational bazakomeza kubahagararira kugeza igihe hazatorwa ababasimbura.

Andre Sleigh ushinzwe guhanga udushya muri Miss & Mister Supranational Organization yavuze ko hari abari baramaze gutorwa ndetse bakaba bagiye gukomeza gutoranya abazahagararira ibihugu mu irushanwa ritaha kandi bakazagira igihe kinini cyo kugaragaza urugendo rwa buri mukobwa uzitabira uyu mwaka.

Alphonse Nsengiyumva uyobora KS Ltd itegura irushanwa rya Miss Supranational Rwanda , yabwiye IGIHE ko bari kwitegura guhita batangira kwandika abakobwa bashaka guhagararira u Rwanda.

Ati “Kuba ryarigijwe inyuma ni ibintu bari baratumenyesheje. Gusa, natwe ubu turi kwitegura gutangira kwandika abakobwa bazavamo uzahagararira u Rwanda. Tuzabona igihe kinini cyo kwitegura.”

Umunyana Shanitah niwe ufite ikamba rya Miss Supranational Rwanda 2019 ndetse ni nawe ugiye gukomeza inshingano mu gihe hataratorwa ugomba kumusimbura.

Biteganyijwe ko Miss Supranational isanzwe ibera muri Pologne izaba hagati ya Gashyantare na Gicurasi umwaka utaha bitewe n’uko icyorezo cya Coronavirus kizaba cyifashe.

Umunyana Shanitah yambitswe ikamba rya Miss Supranational 2019 ndetse anahagararira u Rwanda muri Pologne aho ryabereye ku rwego rw'Isi
Umunya-Thailand ufite ikamba rya Miss Supranational , Anntonia Porsild

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .