I Am Kigali Festival izaba kuri uyu wa Gatandatu tariki ya 17 Ukuboza 2016 ku Kimihurura kuri Kuri Rwanda Revenue Authority ahasanzwe habera ibitaramo.

Iyi gahunda yatangijwe ku bufatanye bwa International Organization for Migration na Impact Hub Kigali ndetse n’indi mishinga y’abantu ku giti cyabo mu rwego rwo gushyigikira ubukangurambaga bwiswe “I Am Kigali” bugamije kwerekana uruhare rw’ubuhanzi, ubugeni n’umuco mu kugeragaza Kigali irimo uruvangitirane rw’imico.

“I am Kigali” ifite intego yo guhuriza hamwe abantu baturutse mu bice bitandukanye by’u Rwanda[abahakomoka n’abaje kuhatura ku mpamvu zitandukanye] mu rwego rwo gusangiza amahanga iterambere ry’ubugeni n’ubuhanzi mu Mujyi wa Kigali.

Uyu mushinga ugamije gufasha umuziki nyarwanda kugera ku rwego mpuzamahanga ndetse no gutuma abawukora bawubonamo amafaranga.

Iserukiramuco I Am Kigali Festival rizagaragaza uburyo abantu baje gutura mu Rwanda kubera ubuhunzi n’izindi mpamvu zitandukanye bahawe uburenganzira busesuye bwo kongera gutangira ubuzima no gukora imirimo ibiteza imbere.

I Am Kigali Festival izahuriza hamwe abahanzi mu njyana zitandukanye barimo Urban Boyz, Makanyaga Abdul, umucuranzi wa Jazz Tito Al Uribe wo muri Chile, Eric One Key, Moutcho, Makumbi Sound n’abandi batandukanye.

Muri iri serukiramuco rizamara umunsi umwe hazerekanwamo umukino w’abahanzi bo muri Amizero uzaba urangajwe imbere na Abdul Mujyambere, hazaba hari n’abakaraza b’Abarundi bari mu buhungiro mu Rwanda.

Imiryango izaba ifunguye guhera saa cyenda z’amanywa aho kwinjira bizaba ari ubuntu, hazaba n’icyiciro cyo kumurika ibikorwa bimwe na bimwe birimo iby’ubugeni, amafunguro n’ibinyobwa bimenyerewe muri gakondo ya buri gihugu mu bizitabira iserukiramuco I Am Kigali.