Ni ibihangano ryashyize ahagaragara mu rwego rwo kwifatanya n’Abanyarwanda muri ibi bihe byo Kwibuka ndetse no guhumuriza ababuze ababo.

Ibi bihangano birimo Umuvugo wiswe ‘Ejo Hazaza’ wagenewe abantu bose bariho mu 1994 ugamije guhumuriza ababuze ababo bazize Jenoside yakorewe Abatutsi babwirwa ko nubwo batakiri kumwe na bo ubu bari mu Ijuru kwa Jambo.

Uyu muvugo kandi usaba abarokotse gukoresha imbaraga bafite mu kwiteza imbere mu bikorwa bitera ishema ababo babuze no kubaka u Rwanda ruzira amacakubiri n’urwango.

Iri torero kandi rishishikariza Abanyarwanda kuba hafi abarokotse bagifite ibikomere bakabaremamo icyizere cy’ahazaza.

Nyuma yo gukora igihangano cy’isanamitima ku barokotse, Itorero Inkindi n’Amariza ryakoze indirimbo ryise ‘Bana b’u Rwanda’ risaba urubyiruko kwigira ku mateka rukubaka igihugu cyiza.

Umuyobozi w’Itorero Inkindi n’Amariza, Carine Karambizi, yavuze ko Abanyarwanda badakwiye kwibagirwa ibyabaye kuko ayo mateka abatera imbaraga zo kubaka ahazaza.

Yagize ati “Abana b’u Rwanda ntibazibagirwe na rimwe kwibuka kuko iyo wibutse ibyabaye cyangwa amateka biguha imbaraga zo kureba imbere hazaza kugira ngo utazasubira mu byabaye no kwirinda kugwa mu macakubiri.”

“Bahane imbaraga birinde ibibarangaza. Ababayobya, ababashora mu macakubiri kuko n’ubu hari abantu bagifite izo ngengabitekerezo. Birinde ibintu byose bibarangaza byatuma batabasha gutera imbere.”

Itorero Inkindi n’Amariza rivuga ko ahahise ari umurunga w’ejo hazaza, rigasaba Abanyarwanda gushyira hamwe imbaraga bagakomeza kuzamura urumuri rw’amahoro rutazima rumurikira u Rwanda rwavuye mu bihe by’icuraburindi.

Ibi bihangano byombi byatunganyirijwe muri Umushanana Records bikorwa na Meira Pro mu buryo bw’amajwi, amashusho yanonosowe n’abarimo Otto Shamamba, Umusizi Tuyisenge na Ibra.

Indirimbo ‘Bana b’u Rwanda’ isaba abato kubaka igihugu kizira amacakubiri

‘Ejo Heza’ ni umuvugo watuwe abarokotse Jenoside yakorewe Abatutsi

Itorero Inkindi n’Amariza rihumuriza abarokotse Jenoside yakorewe Abatutsi ndetse rigasaba abakiri bato gusigasira ibyagezweho birinda icyabyangiza

Itorero Inkindi n’Amariza risaba Abanyarwanda gushyira hamwe mu kuzamura urumuri rw’amahoro rumurikira u Rwanda rwavuye mu bihe by’icuraburindi

Iyi foto itanga igisobanuro cy’abantu bahurije hamwe imbaraga bazamura urumuri rw’amahoro nyuma yo kuva mu mateka mabi n’ibihe by’umwijima