Cyateguwe n’itsinda ry’abaramyi babarizwa muri Holi Worship Music ku bufatanye na Life International Church iri tsinda ribarizwamo.

Iki gitaramo kizaba tariki 14 Ukuboza 2025 muri Arizona, Phoenix, 1915 W Thunderbird RD guhera Saa Kumi z’umugoroba.

James na Daniella bamaze hafi umwaka bimukiye muri Amerika bakomereje ibikorwa byo kuramya no guhimbaza Imana mu bitaramo bitandukanye bagenda bavugamo ubutumwa.

Umuyobozi wa Holi Worship Music Nzamu Fidele yagaragaje James na Daniella nk’abaramyi beza kandi bakundwa na buri wese wumva ibihangano byabo. Iyi ni n’imwe mu mpamvu bifuje kubatumira.

Nzamu yasobanuye ko intego nyamukuru y’igitaramo cya Endless Worship ari ukuvuga, ubutumwa bwiza binyuze mu ndirimbo kuko ari wo muhamagaro wabo nk’abaramyi.

Ati “Twizeye ko abazitabira igitaramo cyacu bazishima mu buryo budasanzwe. Icy’ingenzi ni ukuzavuga ubutumwa mu buryo bwose Imana izadushobozamo.”

Yongeyeho ko uyu uzaba n’umwanya mwiza wo gufata amashusho y’indirimbo nshya iri tsinda ryitegura gushyira hanze.

Iri tsinda rya Holi Worship Music ribarizwa mu itorero rya Hope of Life International church, ryatangiye mu 2011 ritangiranye n’itorero.

Holi Worship Music yatangiye ari korali ariko uko umuziki wagiye utera imbere ndetse hakabaho no kwaguka yaje guhiduka itsinda ryo kuramya no guhimbaza Imana ry’itorero mu 2017. Ribarizwamo abaramyi b’abahanga b’ingeri zitandukanye harimo na Kadogo wamamaye muri Healing Worship Team.

Endless Worship ni igitaramo cyagutse cya kabiri cya Holi Worship Music ariko gifite umwihariko wo kuba kirimo abandi batumirwa bazafatikanya kuramya no guhimbaza Imana.

Kwitabira iki gitaramo ni ukwishyura 30$ ku muntu umwe mu gihe couple izishyura 50$.