Ni igitaramo cyabaye kuri iki Cyumweru tariki 3 Kanama. Cyari cyateguwe na Mustapha Kayitare usanzwe afasha abahanzi. Iki gitaramo cyayobowe na Ntazinda Marcel, cyari cyatumiwemo abahanzi barimo Cyusa Ibrahim, Munganyinka Aloutte n’Itorero Indashyikirwa ndetse na Layan Mpano, uri mu bahanzi bari kuzamuka muri iki gihe.

Cyatangiye ku rubyiniro hariho MC Bior wavangaga imiziki. Uyu musore yakurikiwe n’Umusizi Murekatete wagiye ku rubyiniro mu buryo butunguranye. Uyu mukobwa yigaragarije abitabiriye mu bisigo birimo icyo yise ’Amakiriro’, ’Iwacu Bazagukoshe’ na ’Kanama k’imyaka’’ aheruka gushyira hanze, aho yagihimbiye Umunsi w’Umuganura.

Murekatete yakurikiwe na Layan Mpano. Uyu musore nawe yigaragaje mu bihangano bitandukanye birimo indirimbo yise ’Uraho Inyamibwa’, amaze iminsi ashyize hanze.

Yakurikiwe na Munganyinka Alouette. Uyu mugore yaririmbye indirimbo zirimbo ’None Twaza’ na ’Inyange Muhorakeye’ za Cecile Kayirebwa, ’Ni amanihura’ ya Rugamba, ’Yewe uryamye kanguka burakeye’, ’Umudamazera’ n’izindi.

Ubwo Munganyinka yari ari ku rubyiniro, yatunguwe na Lionel Sentore baririmbana indirimbo y’uyu mugabo yise ’Uwangabiye’. Yanaririmbye izindi ndirimbo zirimo iza Muyango wari no muri iki gitaramo, ndetse na we yaje kumusanga ku rubyiniro bafatanya gususurutsa abari bitabiriye.

Yakurikiwe n’Itorero Indashyikirwa. Iri torero rigizwe n’abasore batanu ryaririmbye ibihangano bitandukanye birimo ’Uraho Runyenyeri’, ’Ibigwi by’Inkotanyi’ n’izindi zitandukanye.

Aba basore bavuye ku rubyiniro, Ntazinda wari uyoboye igitaramo yahamagaye Jules Sentore mu buryo butunguranye ngo asusurutse abari bitabiriye. Uyu musore yasuhuje abantu abasaba kumva indirimbo zigize album aheruka gushyira hanze yise ’Umudende’. Yahise aririmba zimwe mu ndirimbo ze zakunzwe zirimo ’Warakoze Mana’’ yo guhimbaza Imana ndetse na ’Udatsikira.’

Avuyeho Mustapha Kayitare wateguye iki gitaramo yagiye ku rubyiniro ashimira abantu batandukanye bari bitabiriye. Muri abo, yageze kuri Patrick Nyamitari wamamaye mu ndirimbo zo guhimbaza Imana, abantu bamusaba kubasuhuza na we yigira imbere. Yabaririmbiye indirimbo yise ’Mensiya’ ahita abasezera.

Kayitare yahise ateguza ikindi gitaramo kinini gisumbye icyabaye, kizaba mu Ukuboza uyu mwaka. Yahise ahamagara Cyusa wari umuhanzi mukuru asoza igitaramo.

Cyusa yatangiriye ku ndirimbo yasohoye mu 2019 yise ’Migabo’ yahimbiye Perezida Paul Kagame, ’Abatoya ntibagapfe’ na ’Ngarambe’ za Jean Baptiste Byumvuhore, iyo yise ’Rwanda Nkunda’, ’Turaje’ ya Cecile Kayirebwa, ’Indege Irahinda’ y’Isamaza, ’Inzovu’ y’Indahemuka, ’Izuba Rirarenze’ ya Vincent Niyigaba n’izindi.

Abantu bakirwaga muri iki gitaramo basoma ku cyo kunywa cyo hambere ndetse bakerekwa bimwe mu bikoresho by'ahahise

Abantu batandukanye bari bishimiye kwifotoza bafite ibikoresho gakondo

Abantu benshi bitabiriye bari bafite akanyamuneza

Abanyamahanga bamwe bari bitabiriye wabonaga bizihiwe

Abanyamahanga bari bitabiriye iki gitaramo

Abenshi bari bishimiye kongera kubona bimwe mu bikoresho byo mu Rwanda rwo hambere

Aho bakiriraga abantu hari hari ibikoresho byo hambere byifashishwaga mu kurya no gutunganya ibyo kurya cyangwa kunywa

Byari ibyishimo ku bitabiriye iki gitaramo

Buri Wese muri iki gitaramo yabyinaga mu mbaraga ze

Coach Gaël ari gucinya akadiho

Coach Gaël na Kenny Mugarura bari bishimiye iki gitaramo

Coach Gaël na murumuna we Kenny Mugarura baryohewe n'igitaramo batangira kongorerana

Coach Gaël yakurikiye iki gitaramo kuva gitangiye kugeza kirangiye

Cyusa ni umwe mu bahanzi bamaze kubaka izina mu muziki gakondo

Cyusa niwe wari umuhanzi mukuru muri iki gitaramo

Cyusa yaririmbye indirimbo ndetse n'izindi zamamaye mu Rwanda hambere

Cyusa yasanzwe ku rubyiniro n'abakunzi ba gakondo bamufashije gususurutsa abari bitabiriye

DJ Bior niwe wasusurukije abari bitabiriye mu muziki gakondo

Hari ibiribwa bitandukanye bya kinyarwanda

Iki gitaramo cyabaye mu rwego rwo kwizihiza umunsi w'umuganura

Iki gitaramo cyari cyitabiriwe

Iki gitaramo kizongera kuba umwaka uri kurangira

Iki gitaramo ni ubwa mbere cyari kibaye

Kenny Mugarura na Rumaga bari gusoma ku gahiye

Kenny Mugarura ushinzwe inyubako ya Kigali Universe iki gitaramo cyabereyemo ni umwe mu bari bitabiriye

Kigali Universe yabereyemo iki gitaramo imaze kuba igicumbi cy'ibitaramo bitandukanye

Lionel Sentore yaririmbanye na Munganyinka Alouette wari umwe mu bahanzi bigaragaje muri iki gitaramo

Lionel Sentore yaririmbye indirimbo yise 'Uwangabiye' yahimbiye Paul Kagame benshi barizihirwa

Marcel Ntazinda niwe wayoboye iki gitaramo

Mariya Yohani yari yitabiriye iki gitaramo

Mpano Layan ni umwe mu bahanzi bakizamuka bashimishije benshi

Mpano Layan ni umwe mu baririmbye muri iki gitaramo

Munganyinka Alouette ni umwe mu bahanzi bigaragaje

Muri iki gitaramo bamwe bahisemo gufata amashusho n'amafoto ngo bajye biyibutsa ibyabereyemo

Muri Kigali Universe yabereyemo igitaramo hari hakubise huzuye

Mustapha Kayitare wateguye iki gitaramo yateguje ikindi kizaba mu Ukwakira uyu mwaka

Muyango ni umwe mu bari bitabiriye

Nta kwicwa n'irungu, buri wese muri iki gitaramo yatashye nta ngingimira

Patrick Nyamitari nawe yaririmbye muri iki gitaramo mu buryo butunguranye

Rumaga na Mutesi Scovia bari bizihiwe muri iki gitaramo

Rumaga yahawe umwanya by'akanya gato aganiriza abari bitabiriye iki gitaramo

Senderi International Hit ni umwe mu bari bitabiriye iki gitaramo

Ubwo Indashyikirwa zari ziri ku rubyiniro

Ubwo Lionel Sentore yari akurikiye iki gitaramo

Umuhanzi Jules Sentore yatunguranye muri iki gitaramo

Umusizi Murekatete wigaragaje muri iki gitaramo yifotoje afite igiseke

Umusizi Murekatete yahawe umwanya muri iki gitaramo

Amafoto: Nzayisingiza Fidele