Amajwi y’iyi ndirimbo yakozwe na Yeweeh, mu gihe amashusho yayo yafashwe na Ab Godwin.

Abahanzi barindwi bari muri iyi ndirimbo, bagiye bahurira ku byiza u Rwanda rwagezeho birimo ibikorwaremezo, uburezi kuri bose, guteza imbere Abanyarwanda mu ngeri zitandukanye, byose bigizwemo uruhare n’imiyoborere myiza ya Perezida Paul Kagame.

Mu kiganiro kigufi yagiranye na IGIHE, Khalifan Govinda yavuze ko izina ry’indirimbo "Igikumwe" ryavuye ku buryo Abanyarwanda batora bakoresheje igikumwe ndetse igitekerezo yagihawe n’umubyeyi we.

Ati ”Igitekerezo cyavuye ku mubyeyi wanjye witwa Nyiramanzi Vestine, akunda cyane Perezida Kagame Paul. Ni umubyeyi ukunda igihugu, adutoza gukunda igihugu, rimwe twari twicaye arambwira ngo ko hagiye kuba amatora kuki wowe nta ndirimbo urakora ivuga ibigwi bya Perezida?”

Khalifan Govinda yasobanuye ko kuba indirimbo irimo umuhanzi mushya witwa The Nature ari amahirwe yahawe kuko akeneye kugira aho agera.

Ati "The Nature ni umuhanga kandi akeneye ko Abanyarwanda bamumenya. Fireman arapa neza kandi dusanzwe dufitanye indirimbo yitwa ’Uvutse ni nde’. Uncle Austin na Marina baryoshya indirimbo kandi mwibukeko twakoranye indirimbo yitwa ’Too Much’ naho Tom Close nari mfite inzozi zo kuzakorana na we indirimbo.”

Uyu muhanzi yashimiye Umuvugizi Wungirije wa Guverinoma, Alain Mukurarinda wamufashije bakabona aho gufatira amashusho harimo Stade Amahoro no muri Kigali Golf.

Ati "Umuntu udakunda RPF Inkotanyi yaba adakunda igihugu. Ufashe Stade Amahoro yo mu 1994 na Amahoro Stadium y’ubu wabona ko habayeho kongera kuvuka kw’igihugu. Twubake u Rwanda rw’Abanyarwanda, ubumwe bube umusingi, urebye imihanda, ukareba BK Arena n’ibindi wahita ubona ko dukwiriye gutora Paul Kagame.”

Abahanzi barindwi bakunzwe bakoze indirimbo ivuga ibigwi bya RPF Inkotanyi

Amahoro Stadium yafatiwemo amashusho y'indirimbo 'Igikumwe'

Masamba Intore aganira na Tom Close, Fireman na The Nature

Masamba Intore na Uncle Austin bahuriye mu ndirimbo ya Khalifan Govinda

Uko byari bimeze mu ifatwa ry'amashusho y'indirimbo Igikumwe

Marina, Uncle Austin, Tom Close, The Nature na Fireman mu ifatwa ry'amashusho y'indirimbo yitwa Igikumwe

Byari ibyishimo mu ifatwa ry'amashusho y'indirimbo Igikumwe

Hari amashusho kandi yafatiwe kuri Kigali Golf Course

Iyi ndirimbo irimo abahanzi bakunzwe