Byari umunezero, ibyishimo n’akanyamuneza ku bafana bari batwawe no kubyina imbonankubone indirimbo z’abahanzi b’ibihangange basanzwe babona ku mateleviziyo gusa, abandi bo basanzwe babumva ku maradiyo gusa.

Babyinaga babiri babiri ku bari basohokanye, abana n’ababyeyi babo mu ruvunge rw’imbaga y’abagera ku gihumbi bari bitabiriye iserukiramuco ry’umuziki umuhanzi Kidum (wiyita Kibido na Kibuganizo) yatangije kuri iki Cyumweru mu gihugu avukamo cy’u Burundi.

Iri serukiramuco ryitwa Buja Summer Festr 1st Edition ryabereye ahitwa Lycee Nyakabiga hahoze hitwa Effi Nyakabiga, hirya gato y’umujyi wa Bujumbura.

Uko abahanzi basimburanwaga ku rubyiniro, niko induru uburyohe bw’umuziki w’u Burundi bwarushagaho kwiyongera batera hejuru baririmba bati “Lion Story”, rimwe mu matsinda akunzwe cyane kurusha mu muziki wo mu Burundi.

Aaron Nitunga umwe mu bahanzi b'abahanga mu gucuranga; Kidum yari yazanye ibyuma bigezweho kandi biri ku rwego mpuzamahanga mu rwego rwo gushyigikira umuziki mu gihugu akomokamo cy'u Burundi

Aba bami b’injyana ya Reggae mu gihugu cy’u Burundi bagezweho imbaga yose irahaguruka bamwe baterura intebe bari bicayeho bazishyira mu birere babyina indirimbo bigaragara ko zikunzwe cyane z’aba barasta cumi n’umwe biganjemo abavukana.

Abakunzi b'umuziki babwiye IGIHE ko banyuzwe n'iri serukiramuco Kidum yatangije mu Burundi

Uretse ivumbi ryatumukaga no kubona abantu banezerewe gusa, ntiwashoboraga kumenya ko amasaha ari kugenda, keretse ubwo inzego zishinzwe umutekano zaje gusaba Kidum ko yahagarika igitaramo ahagana saa tanu z’ijoro (11PM), iserukiramuco risozwa abafana batabishaka.

Abantu bararyohewe babura uko berekana ibyishimo byabo kugeza ubwo bateruye n'intebe bari bicayeho ngo bazibyinane

Mu ijwi ryumvikana ko yatunguwe n’ubwitabere no kuryoherwa kw’abafana b’umuziki mu Burundi, Kidum yagize ati “Sindyoherwa no guhora mu Burayi, ntaririmbira hano iwacu”.

Allioni, umwe mu bahanzi nyarwanda wari watumiwe muri iri serukiramuco; yahaserukanye umucyo ari kumwe n'ababyinnyi be aririmba zimwe mu ndirimbo ze zisanzwe zizwi mu Burundi nk'Umucakara, Uwo Narotaga n'izindi

Abafana bari benshi cyane bazamura imyenda mu birere ngo bagaragaze ko bishimye

Aganira na IGIHE, Julienne Ingabire, w’imyaka 26, umwe mu bari bitabiriye iki gitaramo yabwiye IGIHE ko iki yaryohewe no kuba yaririmbiwe n’abahanzi akunda. Yagize ati “Sinari nzi ko biza kumera uku, naryohewe cyane. Uyu muziki turawukunda”.

Umwe mu barasta bagize itsinda Lion Story bari kuririmba

Kidum nawe yaje ku rubyiniro aririmbana na Lion Story, ariko akajya aririmba avuga ko amasaha bahawe yo gutarama yarangiye basabwe gufunga igitaramo

Iri serukiramuco ryatewe inkunga na Banki y’ubucuruzi y’u Burundi yitwa Bancobu, ryagaragayemo abahanzi barenga makumyabiri bakunzwe bo mu Burundi. Barimo Peace and Love, Yoya, Rally Joe, Silas Damara, Peter Niyo, Miss Nono n’abandi.

Byabaye ngombwa ko Kidum yinginga abafana abasaba imbabazi avuga ko yasabwe ko igitaramo gihagarikwa kuko amasaha bari bahawe yari yarangiye; gusa abafana bo bagaragaje ko bifuzaga gukomeza gutaramana n'abahanzi bikundira

Kidum yabwiye IGIHE ko bifuza ko iri serukiramuco ari ngaruka mwaka kandi ko bifuza ko ryazajya rimara iminsi myinshi mu myaka iri imbere.