IGIHE yaguteguriye zimwe mu ndirimbo nshya zamuritswe n’abahanzi nyarwanda muri iki Cyumweru turi gusoza.

Kuri iyi nshuro abahanzi bakoze mu nganzo bagatanga ibihangano bishya barimo King James, Juno Kizigenza, Platini P , Mimi Martine, Clarisse Karasira, Denys Nyituriki, Danken, Yvan Muziki, AmaG The Black DJ Mansa n’abandi.

Mfata - King James

King James yamurikiye abanyarwanda indirimbo nshya yise ‘Mfata’. Ni iya gatatu mu zikubiye kuri album ye ya munani yitegura gushyira hanze mu minsi mike iri imbere.

Iyi ndirimbo yuje amagambo y’urukundo, amajwi yayo yatunganyijwe na Knox Beat muri studio ya GooDaddy Music mu gihe amashusho yatunganyijwe na Meddy Saleh.

Ihora Ihagaze – Yvan Muziki

Yvan Muziki yamurikiye abakunzi b’umuziki we indirimbo yise ‘Ihora ihagaze’ igaragaramo abakinnyi ba sinema nyarwanda batandukanye barimo Clapton Kibonke, Nyambo Jessica, Killerman na DJ Pius.

Amashusho y’iyi ndirimbo yatunganyijwe na Ayo Merci mu gihe amajwi yakozwe na Ayo Rush.

Yaraje - Juno Kizigenza

Juno Kizigenza yakanguye amarangamutima y’abakunzi b’umuziki abamurikira indirimbo 17 zigize album ye ya mbere yise ’Yaraje’.

Ni album yakoranye n’abandi bahanzi nka Bull Dogg, King James, Butera Knowless, Ally Soudy, Bruce Melodie na Kenny Sol.

Indirimbo yitiriye iyi album yatunganyijwe na Kina Beats.

Ushobora kumva izindi ndirimbo ziri kuri album unyuze hano

https://www.youtube.com/@JunoKizigenza/videos

Ready Now- Li John, Marina na Afrique

Producer Li John uri mu rugendo rwo gutunganya album ye ya mbere, yamurikiye abanyarwanda indirimbo yise “Ready Now” yahuriyemo na Marina na Afrique.

Iyi ndirimbo yatuwe abafite abakunzi, amajwi yayo yatunganyijwe na Li John afatanyije na Crazy Mix, mu gihe amashusho yakozwe na James Rooney.

Icupa - Platini P

Mbere y’uko Platini yerekeza muri Canada aho afite ibitaramo mu mijyi itandukanye, yamurikiye abakunzi b’umuziki we indirimbo nshya yise ‘Icupa’.

Igaruka ku musore wiyeguriye ka manyinya.

Amajwi yayo yatunganyijwe na Davydenko afatanyije na Kevin Klein , mu gihe amashusho yakozwe na Oskados Oskar’

Igaragaramo abasore bagize itsinda Finest Dance Crew.

Yanditswe n’abantu batandukanye barimo Platini P, Jado Maxi, Roddy Ray, Madilu Nemeye, Julien Nemeye na Gaju Evelyne ufite ikamba rya Miss Congeniality mu 2021.

All Yours - Lamton, Celine Feels na DJ Mansa

Lamton na Celine Feels bahuje imbaraga n’umwe mu basore bagezweho mu kuvanga umuziki DJ Mansa bakora indirimbo bise ‘All Yours’.

Amajwi yakorewe muri Highway Music, atunganywa na Kush Beatz, amashusho akorwa n’abarimo Rich Montana, Scauveeah , Marvin Lee , Christian na Denys Brown.

You - Da Rest

Nyuma y’icyumweru kimwe amuritse amajwi y’indirimbo nshya yise ‘You’, Da Rest uherutse gutangira urugendo rushya muri muzika, yamurikiye abakunzi b’umuziki nyarwanda amashusho y’indirimbo yise ‘You’.

Ni amashusho yatunganyijwe na Rockx afatanyije na Eloi Frank, mu gihe amajwi yakozwe na EvyDecks asozwa na Bob Pro.

Isi Irarengana - AmaG The Black & Yago

AmaG The Black uri mu myiteguro y’igitaramo kimurika album yise ‘Ibishingwe’, yamurikiye abakunzi be indirimbo yise ‘Isi Irarengana’ yahuriyemo na Yago.

Yatunganyijwe na Producer Muuv mu buryo bw’amajwi.

Igurire Akantu - Wariva

Ni indirimbo ya Ntihabose Hamim Rivaldo ukoresha amazina ya Wariva muri muzika. Ishishikariza abantu kwifata neza mu gihe bakoze bakabona umusaruro.

Uyu musore wavukiye i Nyamirambo mu Mujyi wa Kigali afite imyaka 23, avuka mu muryango w’abana bane. Mu mashuri yisumbuye yize Hotel Management, Hospitality and Tourism’.

Urugo- Mcy Amandah na Makanyaga Abdoul

Mcy Amandah na Makanyaga Abdoul bahuriye mu ndirimbo igaruka ku buzima bukomeye bwo kubaka urugo, igashishikariza abubatse kwihanganirana.

Mcy Amandah avuga ko muri iki gihe bigoye kubona urubyiruko rukora umuziki urimo ubutumwa bwubaka umuryango nyarwanda kuruta kwamamaza ibindi bidafite icyo byamarira igihugu kandi ari rwo rufite imbaraga zo kurwubaka.

Amajwi yayo yatunganyijwe na Trackslayer mu gihe amashusho yakozwe na Fils afatanyije na Shingiro Bora.

Kwanda - Clarisse Karasira

Clarisse Karasira n’umugabo we Ifashabayo Dejoie bamurikiye abanyarwanda indirimbo bise ‘Kwanda’ yashibutse ku munezero uyu muryango ufite uterwa n’imfura bibarutse bise Kwanda Krasney Jireh.

Iki gihangano batuye ababyeyi ndetse n’abazaba ababyeyi, amajwi yacyo yatunganyijwe na Jimmy Pro.

Mpindura Mushya - Denys Nyituriki

Denys Nyituriki akomeje gusangiza abakunzi b’umuziki zimwe mu ndirimbo zigize album ye ya mbere yise ‘Inshuti’ yamuritse mu ijoro rya tariki 26 Gicurasi 2023.

Uyu musore ni we witunganyirije iyi ndirimbo yise ‘Mpindura mushya’ mu buryo bw’amajwi, yanditswe n’umubyeyi we Theogene Nyituriki.

Amashusho yafatiwe mu gitaramo cyo kumurika album, atunganywa n’abarimo Alviz Organ, Proust, Libens.

Yumvikanamo amajwi ya Benedictus, Julien, Clement, Emile, Christine, Arlene, Delphine (Madederi) na Vestine (Mateteri).

Meze Neza - Danken

Danken Izabayo yongeye gukora mu nganzo amurikira abanyarwanda indirimbo yise ‘Meze neza’ ihumuriza abantu bahura n’ibibazo, babwirwa ko igihe kizagera bigashira bakongera guseka.

Iyi ndirimbo yatunganyirijwe muri Lions Beats, amashusho akorwa na Tag Mayors.

Iracyavuga Neza - Mimi Martine na Aline Gahongayire

Ituze Martine ukoresha amazina ya Mimi Martine muri muzika, yahuje imbaraga na Aline Gahongayire, bakorana indirimbo igaruka ku nkuru y’umuntu wahuye n’ubuzima bubi gusa ineza y’Imana ikaza kumugeraho akaguubwa neza.

Imiririmbire y’iyi ndirimbo yayobowe na Niyo Bosco. Yanditswe na Aline Gahongayire na Issa Karinijabo.

Amajwi yayo yatunganyijwe na Santana Sauce mu gihe amashusho yakozwe na Gad.

Bon - Elisha The Gift

Elisha The Gift yamurikiye abakunzi b’umuziki nyarwanda indirimbo yise ‘Bon’ yatunganyijwe na Masifa, afatanyije na Jada Beat mu gihe amashusho yakozwe na Director Li.

Flower – Run Up

Run Up ukiri mushya muri muzika, yamurikiye abanyarwanda indirimbo ye ya kabiri yise ‘Flower’ yatunganyijwe na Real Renstar na Bob Pro mu gihe amashusho yakozwe na Dawest na Oskados Oskar.

Vide - Chiva

Chiva, umuhanzi ukiri mushya muri muzika nyarwanda, yamuritse indirimbo yise ’Vide’, yatunganyijwe na Cash de Demon mu gihe amashusho yayo yakozwe na Papa Cyaka afatanyije na Dir Kowen.

Ubuhungiro - Daniel Svensson
Umuririmbyi Daniel Svensson yamurikiye abakunzi ba muzika yo kuramya no guhimbaza Imana indirimbo yise ‘Ubuhingiro’ igaragaza uburyo abakirisito bakwiriye gushakira amahoro muri Yesu.

Ubahwa - Yannick Dushime , Aimé Uwimana na Deborah Uwitonze

Yannick Dushime yegereye Aimé Uwimana na Deborah Uwitonze bakorana indirimbo bise ‘Ubahwa’ yaturutse ku Ijambo riri muri Bibiliya mu rwandiko Pawulo yandikiye Abaroma 3:4.

Handitse ngo “ Hanyuma se byifashe bite? Niba bamwe muri bo batarizeye, ese aho kutizera kwabo kuzatuma ubudahemuka bw’Imana butagira icyo bugeraho?, Ibyo ntibikabeho! Ahubwo Imana igaragare ko ari inyakuri, kabone n’iyo umuntu wese yagaragara ko ari umunyabinyoma, nk’uko byanditswe ngo “kugira ngo ugaragare ko ukiranuka mu magambo yawe, kandi utsinde mu gihe ucirwa urubanza.”

Amashusho y’iyi ndirimbo yatunganyijwe na Kingsley Gerard , amajwi akorwa n’abarimo Bruce na Boris.

Lala - Kirikou Akili na Chriss Eazy

Ni indirimbo yahuriyemo abahanzi Kirikou Akili wo mu Burundi na Chriss Eazy uri mu bahagaze neza mu Rwanda.

Amajwi yakozwe na Prince Kiiz mu gihe amashusho yakozwe na John Elarts, Samy switch na Chriss Eazy.

Igaruka ku musore wishimiye umukunzi we akamusaba ko bagumana.

Yeriko - Abaragwa Choir ADEPR National

Ni indirimbo nshya ya Abaragwa Choir ADEPR National. Igaruka ku butumwa bwo kugaragaza uburyo umurwa wa Yeriko wasenywe mu buryo butangaje.

Yeriko ivugwa muri Bibiliya ni umurwa wasenywe inkike biturutse ku mirindi yakozwe n’abarangajwe imbere na Yosuwa.