Mu butumwa Miss Mutesi yageneye urubyiruko kuri uyu munsi ubwo hatangizwaga Icyumweru cyo Kwibuka ku nshuro ya 29 Jenoside yakorewe Abatutsi, yavuze ko we n’abakibyiruka muri rusange bakwiriye kwigira ku bwitange n’umurava byaranze abababanjirije mu kubaka igihugu.

Yakomeje avuga ko mu 29 ishize u Rwanda rwungutse byinshi kandi bikomeye binyuze mu ndangaciro z’ubuyobozi bwiza.

Yagize ati “Uyu munsi imyaka 29 irashize u Rwanda rubayemo Jenoside yakorewe Abatutsi, imwe muri Jenoside y’indengakamere yabayeho mu mateka.”

“Tuyobowe n’indangagaciro zacu n’ ubuyobozi bwacu, u Rwanda rwungutse ibintu byinshi kandi bitangaje kuva 1994.

“Mu gihe Twibuka, nitwe bireba nk’urubyiruko kugira ngo tugere ku cyiciro gikurikira, tugahesha agaciro ubwitange ndetse n’umurava byaranze abatubanjirije dukoresha ibyo twahawe mu gukora ibirenzeho kuko twe ubu tuzi neza ko dufite icyo bisaba cyose cyatuma tubikora, haba mu bijyanye n’umutungo ndetse n’impano.”

Miss Mutesi Jolly, ni umwe mu bakobwa 12 babashije kwegukana ikamba rya Miss Rwanda kuva ryatangira gutegurwa nyuma ya Jenoside yakorewe Abatutsi mu 2009.

Miss Mutesi Jolly yasabye urubyiruko kwigira ku bahagaritse Jenoside yakorewe Abatutsi rwubaka ahazaza heza h’igihugu