Miss Africa America ni irushanwa ryatangijwe mu 2016, gusa mu 2017 ntabwo ryigeze riba.

Ryitabirwa n’abakobwa bakomoka muri Afurika ariko baba muri Leta Zunze Ubumwe za Amerika.

Christiane Jojo uhagarariye u Rwanda kandi akomoka muri Congo. Mu butumwa bwe, avuga ko yahisemo u Rwanda kubera ko ari igihugu yavukiyemo akagikuriramo akakigiramo amashuri ye abanza.

Nyuma we n’umuryango we ngo baje kujya mu nkambi kugira ngo bazabone ibyangombwa bizabahesha kujya muri Leta Zunze Ubumwe za Amerika babamo imyaka itandatu, mu 2010 aba aribwo berekeza muri iki gihugu cy’indoto zabo.

Yagize ati "Ndi guhatanira ikamba mpagarariye u Rwanda, mu by'ukuri atari byo nshyize imbere ahubwo n'uko nshaka kwereka abakobwa bagenzi banjye bari hanze aha uko bashobora gukurikira inzozi zabo n'icyerekezo bafite nk'ababera urugero rwo kudacika intege mu buzima".

Agira inama abakobwa yo kutumva ibyo abantu bavuga ahubwo bagakurikira ibyo umutima nama wabo ubabwira.

Ubu Christiane ni umunyeshuri muri Kaminuza ya Davenport University iherereye i Michigan.

Abakobwa bahanganye na Christiane Jojo barimo Tekla Rudwin Nakazibwe [Uganda], Jeneba Wanjah [Sierra Leone], Ifeoluwa Nifemi [Nigeria], Naomi Nucia [Liberia], Faruchelle Kogan [Afurika y’Epfo] Charlotte Makala[Tanzania], Jahnae Hicks [Zambia], Angel Harriet [RDC] Natacha Jouonang [Cameroon] na Aminata Gueye [Senegal].

Iri rushanwa rya Miss Africa America rifite intego yo gushishikariza abakobwa gukanguka bagashira amanga.

Umunya-Nigeria, Christiana Njoku, ni we waryegukanye inshuro imwe ryabaye.