00:00:00 IGIHE NETWORK KN KINYARWANDA EN ENGLISH FR FRANCAIS

Miss Ingabire Grace yasezerewe muri Miss World 2021

Yanditswe na Nsengiyumva Emmy
Kuya 21 January 2022 saa 11:41
Yasuwe :

Miss Ingabire Grace wari uhagarariye u Rwanda mu irushanwa rya Miss World 2021, urugendo rwe rwamaze kurangira kuko atabashije kwinjira muri 40 bahamagajwe ngo basubire mu mwiherero w’iri rushanwa.

Nyuma y’isubikwa ry’irushanwa rya Miss World 2021 ku munota wa nyuma hirindwa ikwirakwira ry’icyorezo cya Covid-19, abakobwa bose bahise basezererwa mu mwiherero mu Ukuboza 2021.

Buri wese yaratashye babwirwa ko iri rushanwa rizasubukurwa muri Werurwe 2022. Ubwo abandi basezererwaga mu mwiherero bagahita bataha, Ingabire Grace yahise atangira ibiruhuko muri Leta Zunze Ubumwe za Amerika aho yize ndetse yanabaye igihe kirekire.

Nubwo uyu mukobwa yibereye mu biruhuko mu gihe yari ategereje guhamagarwa ngo asubire muri Puerto Rico, ntabwo byamuhiriye kuko atabashije kwinjira muri 40 batumijweho, akaba ari mu bandi 57 basezerewe.

Umuyobozi wa Miss World yashimiye buri mukobwa wari uhagarariye igihugu cye muri iri rushanwa, avuga ko ababajwe no kuba bose batabashije kujya kurisoza.

Ati “Ndashimira buri mukobwa wari witabiriye iri rushanwa, ariko mbabajwe cyane n’uko mwese mutabashije gusubira muri Puerto Rico kurisoza. Nizeye ko buri gihugu tuzabana mu buryo bw’ikoranabuhanga tariki 16 Werurwe 2022 ubwo hazaba hatorwa Miss World 2021.”

Abakobwa 40 bahamagajwe basabwe kuba bamaze kugera muri Puerto Rico bitarenze tariki 12 Werurwe 2022, uzambikwa ikamba akazamenyekana tariki 16 Werurwe 2022. Harimo abakomoka mu bihugu bya Afurika nka Côte d’Ivoire, Cameroon, Guinea, Madagascar, Kenya, Somalia, Afurika y’Epfo na Botswana.

Iri rushanwa ryari ryasubitswe mu Ukuboza 2021 nyuma y’aho abakobwa 17 basanzwemo Coronavirus.

Mu 2020 ryagombaga kuba ariko kubera iki cyorezo na bwo ntiryaba, bituma Umunya-Jamaica Toni-Ann Singh akomeza kwambara ikamba yegukanye mu 2019.

Miss Ingabire Grace wari uhagarariye u Rwanda ntari muri 40 bazakomeza muri Miss World 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .