00:00:00 IGIHE NETWORK KN KINYARWANDA EN ENGLISH FR FRANCAIS

Miss Uwase Muyango ahangayikishijwe n’uwamwiyitiriye akandika kuri Twitter ko akunda “umwuko mu isafuriya”

Yanditswe na Nsengiyumva Emmy
Kuya 9 Gashyantare 2021 saa 08:46
Yasuwe :
0 0

Miss Uwase Muyango Claudine wamenyekanye cyane mu irushanwa rya Miss Rwanda mu 2019, ahangayikishijwe n’umuntu wamwiyitiriye ku rubuga rwa Twitter ukomeje gushyiraho amagambo yibazwaho n’abatari bake.

Ubwamamare bwa Miss Muyango wari wamenyekanye muri Miss Rwanda mu 2019, bwongeye gukaza umurego nyuma yo gufata icyemezo cyo gukundana na Kimenyi Yves, umukinnyi w’ikipe ya Kiyovu Sports n’Ikipe y’Igihugu Amavubi.

Kumenyekana k’uyu mukobwa biri mu byatumye hari bamwe batangira kumwiyitirira ku mbuga nkoranyambaga, ibintu ahamya ko bimuhangayikishije bikomeye kuko atazi icyo bagamije.

Ibi Muyango abitangaje nyuma y’uko mu minsi ishize hari amagambo atandukanye yavuzweho bikomeye bikitwa ko yatangajwe n’uyu mukobwa.

Uwafunguye konti ya twitter akayitirira Muyango, akunze kwifashisha amafoto uyu mukobwa ashyira ku zindi mbuga nkoranyambaga mu rwego rwo kujijisha abamukurikira.

Kenshi anatangaza amagambo atungura abamukurikira, hari nk’aho aherutse kugira ati “Birashoboka ko Eva ariwe mukuru wanjye, najye nkunda itunda.”

Ubwo Ikipe y’Igihugu Amavubi yakinaga mu mikino ya CHAN, uyu ukoresha twitter ya Muyango yagize ati “Umugabo wanjye aradwingana ngo Dwiiii Doouwii Bouuu.”

Nyuma y’uko abakinnyi b’ikipe y’Igihugu Amavubi bagarutse mu Rwanda, uyu wiyitiriye Muyango abinyujije kuri twitter, yongeye gushyiraho ubutumwa bwavugishije abatari bake, ati “Nari nkumbuye gusonga ubugari, umwuko ni mwiza mu isafuriya.”

Muyango yabwiye IGIHE ko ahangayikishijwe cyane n’uyu muntu wamwiyitiriye, kuko nubwo uyu munsi ibintu ashyiraho bigaragara nk’aho ari ugutebya ariko ngo bisebya izina rye.

Yagize ati “Wenda uyu munsi ari gushyiraho ibyo benshi bafata nko gutebya, njya mbibona babinyoherereza buri wese abifata uko ashaka, ariko se nakwizera gute ibyo azakora mu minsi iri imbere.”

Uyu mukobwa avuga ko atazi umuntu ukoresha konti ya twitter ifunguye ku mazina ye, ndetse asaba abantu kutamwitirira ibishyirwa kuri uru rubuga kuko nta na konti arugiraho.

Ati “Ntabwo njye mba kuri twitter, ntekereza ko abantu badakwiye kunyitirira ibibera kuri iri konti kuko si iyanjye sinzi n’uyikoresha. Nibaza ko umuntu unzi neza abona ko biriya atari njye ubishyira hariya.”

Muyango yaboneyeho akanya ko kwisegura kuri buri wese waba utarashimishijwe n’amagambo ashyirwa kuri konti ya twitter yamwitiriwe, kuko atari we uyikoresha kandi atanafite ububasha bwo kuyikuraho.

Abajijwe icyo akora ngo agerageze guhangana n’iki kibazo, Muyango yagize ati “Nagerageje kwandikira twitter nyimenyesha ko ari umuntu wanyiyitiriye ariko ntakirahinduka, nibaza ko na buri wese yamfasha mu gutuma babibona.”

Uwase Muyango yamenyekanye cyane mu irushanwa rya Miss Rwanda mu 2019
Miss Uwase Muyango ahangayikishijwe n'abamwiyitiriye ku mbuga nkoranyambaga
Ubwamamare bwa Uwase Muyango bwiyongereye nyuma yo gukundana na Kimenye Yves
Uwase Muyango ni umwe mu bakobwa bakurikirwa cyane ku mbuga nkoranyambaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .