Muri iki gihe iri rushanwa riri kuba, iyo ugerageje gutera akajisho ku mbuga nkoranyambaga z’ibigo byateye inkunga iri rushanwa, iz’abantu ku giti cyabo no mu bitangazamakuru bitandukanye, hagarutswe cyane ku mafoto y’abakobwa b’uburanga bari muri Tour du Rwanda 2023.

Muri iyi nkuru ntabwo tugiye kwibanda ku migendekere y’irushanwa, uko abakinnyi b’Abanyarwanda bari kwitwara, ahubwo tugiye kwibanda ku nkumi z’ikimero zarigaragayemo.

Uko abarifotora baba bahangayikishijwe no gufata ifoto nziza y’abasiganwa mu muhanda, ni ko banamama imboni za cameras zabo ku nkumi ziba ziri ku nkengero z’umuhanda zimenyekanisha ibicuruzwa na serivisi by’ibigo biritera inkunga.

Ibigo hafi ya byose bitera inkunga Tour du Rwanda bikora iyo bwabaga mu gushaka inkumi z’ikimero kugira ngo bazifashishe mu kwamamaza ibikorwa byabo no kubigeza kuri benshi.

Ibi bituma benshi mu bakobwa b’uburanga, bamwe bakurikirwa na benshi ku mbuga nkoranyambaga, babona imirimo muri iri rushanwa nk’abamamaza n’abamenyekanisha ibikorwa ku baturarwanda baryitabira.

Tour du Rwanda 2023 iri gukinwa ku nshuro ya gatanu kuva izamuriwe urwego mu 2019 ikava kuri 2.2 ikajya kuri 2.1, yakomeje kunguka amaboko binyuze mu baterankunga batandukanye bagenda bashyigikira umukino w’amagare.

Ibi bigo byose bihuriye ku kuba byifashisha abiganjemo abakobwa ahanini kubera inshingano bahabwa zo kwakira abantu no kubayobora [protocol] ndetse n’indi mirimo ibabangukira nk’abantu bita kuri byinshi kuva ku gato kugera ku kanini.