00:00:00 IGIHE NETWORK KN KINYARWANDA EN ENGLISH FR FRANCAIS

Ibitekerezo by’abasesenguzi kuri Miss Rwanda idasanzwe izaba hifashishijwe ikoranabuhanga

Yanditswe na Nsengiyumva Emmy
Kuya 8 Gashyantare 2021 saa 01:47
Yasuwe :
0 0

Impaka ni zose mu bakurikiranira hafi irushanwa rya Miss Rwanda nyuma y’uko hasohotse impinduka muri iri rushanwa rigiye kuzaba hifashishijwe ikoranabuhanga mu rwego rwo kwirinda ikwirakwira ry’icyorezo cya Covid-19.

Bamwe mu bakurikiranira hafi iri rushanwa, bahamya ko kurikora hifashishijwe ikoranabuhanga bizagabanya uburyohe ryagiraga ndetse rikagabanya ubushyuhe ryateraga.

Ku rundi ruhande ariko hari abandi bagaragaza ko aho kurisubika ryakorwa hifashishijwe ikoranabuhanga kuko hari n’ingero z’ahandi byabaye kandi bikagenda neza.

Nyuma yo kubona impaka zikomeye zagiwe ku mbuga nkoranyambaga zinyuranye, twifuje kuvugisha bamwe mu baba mu myidagaduro umunsi ku wundi ariko banakurikiranira hafi ibya Miss Rwanda.

Mike Karangwa

Umunyamakuru Mike Karangwa, ni umwe mu bagiye bagaragara mu kanama nkemurampaka ka Miss Rwanda

Mike Karangwa ni umunyamakuru ukomeye w’imyidagaduro mu Rwanda, akaba n’umwe mu bagiye bagaragara mu kanama nkemurampaka ka Miss Rwanda mu bihe bitandukanye.

Mu kiganiro na IGIHE, uyu mugabo yavuze ko yishimiye bikomeye kuba iri rushanwa rigiye kuba hifashishijwe ikoranabuhanga aho kugira ngo risibire.

Yagize ati “Ni byiza gushyira irushanwa online aho kugira ngo risibire. Iyo risibira hari kubaho igihombo kinini rwose. Ntabwo ntekereza ko ibintu byose bizahita biba byiza 100% bitewe n’uko ari ikintu gishya, ariko urebye aho u Rwanda rugeze mu ikoranabuhanga, ndatekereza ko bizorohera abantu cyane cyane abakobwa guhita babimenyera.”

Mike Karangwa yavuze ko icy’ingenzi ari ugushyiraho imirongo ngenderwaho isobanura neza uko bizakorwa.

Uyu mugabo icyakora yemeranya n’abavuga ko kuba irushanwa rizaba nta bantu bahari bizaba imbogamizi ku buryohe bwa Miss Rwanda.

Ati “Imbogamizi nazo ntizizabura, by’umwihariko ku ruhande rw’abategura. Burya iyo abantu bahari biryoshya irushanwa kurushaho, bikazana n’inyungu mu by’amafaranga bigashyigikira irushanwa mu bijyanye n’imari.”

Mike Karangwa yavuze ko ku bijyanye n’imyiteguro y’abakobwa ho adatekereza ko hari ikinini kizahinduka kuko n’ubundi uko biteguraga ariko bazakomeza kwitegura.

Uyu mugabo yemeje ko iri rushanwa kurikora hifashishijwe ikoranabuhanga bizafasha abakobwa, kuko hari benshi batinyaga ubwinshi bw’ibyuma bifata amashusho, n’abantu benshi, kuri ubu bazaba basubijwe.

Miss Jolly Mutesi

Miss Jolly Mutesi wegukanye ikamba rya Miss Rwanda niwe ukuriye akanama nkemurampaka

Miss Jolly Mutesi wegukanye iri kamba mu 2016, ubu niwe ukuriye akanama nkemurampaka ka Miss Rwanda 2021.

Uyu mukobwa yavuze ko nta gihombo kizabaho kuko ibyo abakobwa bungukiraga mu irushanwa n’ubu bigihari.

Aha yagaragaje ko kuba abategura Miss Rwanda baranze kurisubika bagahitamo kurikora uko byagenda kose, bigaragaza uko bahora batekereza ku nyungu z’abakobwa.

Yagize ati “Kuba irushanwa rigiye kuba ni igisubizo abategura bazanye kuko bagaragaje kwita ku nyungu z’abakobwa kurusha izabo bwite. Ndabizi neza ko hari icyo abategura bazahomba, urebye amafaranga binjizaga ku muryango ubu ntayo bazabona, ariko aho kugira inyungu zicike abakobwa kubera kureba inyungu runaka bahisemo gushaka uko bategura irushanwa.”

Avuga ko nta gihombo na kimwe abakobwa bazitabira Miss Rwanda bazahura nacyo kuko riteguwe hifashishijwe ikoranabuhanga.

Miss Jolly Mutesi yagize ati “Nta na kimwe abakobwa bazahomba ahubwo ni inyungu, irushanwa rije mu gihe cyiza banarikeneye. None se niba umukobwa abonye uko yiga, akabona akazi, akabona ibifasha umushinga we ubwo usibye gushyiramo ingufu agahatana ikindi ni iki?”

Umuhire Rebecca

Umuhire Rebecca witabiriye irushanwa rya Miss Rwanda asigaye ari umunyamakuru w'imyidagaduro ku Isango Star

Umuhire Rebecca witabiriye irushanwa rya Miss Rwanda, akaba ari umunyamakuru w’imyidagaduro kuri Isango Star, asanga iyo biba ibishoboka iri rushanwa ryashoboraga gusubikwa nkuko hari ibihugu byinshi byafashe iki cyemezo.

Icyakora ku bwe asanga kuba irushanwa rigiye kuba hifashishije ikoranabuhanga bizaba inyungu ku mukobwa.

Ati “Niba irushanwa rya Miss Rwanda rigiye kuba hifashishijwe ikoranabuhanga, abakobwa bazungukira ku kuba hari ibyo bazahisha abagize akanama nkemurampaka kandi biri mu bireberwaho kugira ngo urenge icyiciro kimwe ujya mu kindi.”

Umuhire yifashishije urugero rwo kureba niba umukobwa ashobora kuvugira mu ruhame, uburebure, ingendo y’abakobwa(catwalk), kuba nta bafana n’ibindi bizatuma bigorana kumenya umukobwa wifitiye icyizere.

Ati “Niba bagendera ku bwenge uburanga n’umuco, birumvikana ko ubwenge ari bwo buzibandwaho kuko bigoye kubona umuco n’ubwiza nyabwo ku ifoto.”

Ikindi Umuhire yavuze nk’imbogamizi muri Miss Rwanda igiye kuba hifashishijwe ikoranabuhanga, ni abakobwa bazagorwa no kubona uko bohereza amashusho kubera ibibazo by’ikoranabuhanga.

Ati “Abakobwa bose batagira ikoranabuhanga bazagira n’ikibazo. Hari umwana wo mu cyaro cyangwa mu mujyi utazi no gukoresha iryo koranabuhanga kandi nawe ashaka kwitabira ubwo ntazaba yiciwe amahirwe.”

Kwiyandikisha biteganyijwe ko birangira kuri uyu wa 8 Gashyantare mu gihe ibikorwa by’amajonjora y’ibanze byo bizatangira kuva kuya 9 Gashyantare kugeza ku ya 18 Gashyantare. Kuva ku ya 19 Gashyantare, abategura bazatangira kwerekana abahagarariye intara zitandukanye bazaba batsinze amajonjora y’ibanze.

Gutora kuri murandasi na SMS bizatangira ku ya 22 Gashyantare kugira ngo hamenyekane abazaba batsindiye imyanya ya mbere 20. Abahatana bazinjira mu muhezo ku ya 3 Werurwe mu gihe ‘pre-selection’ yo gutoranya izaba ku ya 6 Werurwe.

Abahatana 20 ba mbere bazagera mu cyiciro cya nyuma, bazajya mu mwiherero uzatangira kuya 6 Werurwe kugeza ku ya 20 Werurwe, ubwo hazaba ari ku munsi wa nyuma w’irushanwa. Gusoza irushanwa bizabera muri Kigali Arena kandi bizatambuka kuri Televiziyo y’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .