Global Beauties isanzwe ikora ubucukumbuzi n’intonde ku byerekeye amarushanwa y’ubwiza yagaragaje ko Pologne [itegura irushanwa] iri ku mwanya wa mbere ku rutonde rusange rw’uko ibihugu byitwaye hagati y’umwaka wa 2009 na 2017 mu gihe u Rwanda ruri ku mwanya wa 53.

Mu mwaka wa 2016 u Rwanda rwari ku mwanya wa 47 n’amanota 2.1, nyuma y’uko Ingabire Habiba aruserukiye ubu rwamanutseho imyanya itandatu aho ubu ruhagaze ku mwanya wa 53 rusangiye na Tahiti, Moldova, Jamaica na Finland.

Ubwo Miss Akiwacu Colombe yaserukiraga igihugu mu 2016 yacyuye umwanya mwiza aho yabonetse mu bakobwa icumi ba mbere, muri 2015 nabwo Sonia Gisa wagiyeyo yatahanye ikamba rya Miss Supranational Africa, umwe mu myanya myiza u Rwanda rwabonye mu myaka irindwi ishize.

Ku rutonde rusange rw’uko ibihugu byitwaye mu myaka icyenda ishize, Poland iri imbere ndetse ni nayo iyoboye ibihugu byitabiriye irushanwa ubudasiba kuva ryatangizwa. Colombia yari iya 10 umwaka ushize ubu iri ku mwanya wa Gatandatu, Philippines nayo yatunguranye yinjira mu bihugu bitanu bya mbere bihagaze neza muri Miss Supranational.

U Buhinde bufite abakobwa babiri batwaye ikamba buri ku mwanya wa Gatatu. Portugal yagize amanota meza cyane aho yavuye ku mwanya wa 47 igera ku wa 33. Igihugu cyagaragaje imbaraga kurusha ibindi ni Korea[ifite ikamba], yavuye ku mwanya wa 53 muri 2016 ubu yageze ku mwanya wa 15.

Ni ku nshuro ya Karindwi u Rwanda rwitabiriye Miss Supranational, muri 2011 rwaserukiwe na Uwamahoro Yvonne, muri 2012 hajyayo Simbi Sabrina wabaye Miss Personality; Miss Mutesi Aurore[2013], Umwali Neema Larissa [2014], Gisa Sonia[2015 aba Miss wa Afurika], Akiwacu Colombe[2016] na Habiba Ingabire[2017].

Habiba Ingabire uherutse guserukira u Rwanda

Simbi Sabrina ni we watumye u Rwanda rutangira kuzamuka mu bihugu byagize amanota meza muri Miss Supranational